1 Korin 8 - Aria New Testament

Ongwa okurne ka osep tikare ke sapingen

¹ E eknikane ma ngawai ke umu ke elio ka osep tingen ongwa okurne ka tidue elio opmu ina ke sapingen ine. Osep leklou tiwai langane. “Ite ka pula keniye iteile omur ke sapingen.” Pelengon ane lokono e dau ilengen vala due ite ma aitno lite vri ke ite e itakakai angainte ine. E elio ka ite lana ite ke sudo leklou due ite ma aitno lite polou dagar lokono.

² Gute gesa ka aitno mter iye ile wan bitna bitna iye dau ile omur itau kovok.

³ E langka gute gesa lana iye ke Ida Tapolngon are Ida Tapolngon ile itau ke gute tonari aitno.

⁴ Ke elio ka itangen ongwa okurne ka osep tidue elio opmu ina ke sapingen gesa ine ngawai langane. Iteile sapingen isak wan lokono kovok. Wan langka sapingen isak adai vala. E tapolngon pula tidong kovok. Aurou. Tapolngon kene dong ka Ida Tapolngon lokono.

⁵ Iteile wan pula langka osep tisire tapolngon e wan pula blang langka osep tisire puda tidong ke omur heven e ke taklak blang.

⁶ E iteile omur Ida Tapolngon kene vala dong ka iye Ida Tapolngon ka Pmada. Iye wan ka pula keniye batne e aitno lite la ke iye vala. E Ida Puda kene vala ka Yesus Krais dong. Iye due wan ka pula keniye e iye udo mosongon batne.

⁷ E osep leklou dau tile omur ine kovok. Kesua ke oglou lila me ke eknikane tididi sapingen gesa langka isak wan lokono. E eknikane alo ka tingen ongwa okurne aitno lisak langka tidue elio opmu ina lokono ke sapingen gesa. Tile omur ine kovok e aitno lisak kaka. E elio ka tikaranga tiwade elio itau e elio soulu iye dagar kovok e tinamani langka tidue elio soulu.

⁸ E langane. Ngangon karanga due Ida Tapolngon aitno itau ke ite kovok. Langka itangen ngangon kovok elio langane karanga due ite itodong soulu ke Ida Tapolngon bitna kovok. E langka itangen ngangon elio langane blang karanga due ite itodong itau ke Ida Tapolngon bitna kovok.

⁹ Deka ma umeile umu itau lama lumu elio ka umangen wan bitna bitna due supmu ka aitno lisak ila dagar dau dagar kovok ma tidue elio epmes ina.

¹⁰ Langka umu ka umeile omur umala ke sapingen gesa ina duningen ina ninu e umodong umangen ngangon e langka gute gesa ka aitno ila dagar dau dagar kovok vati umu ane langka lumu elio ma sruk aitno. Deka iye blang ma ngen wan ka osep tidue elio opmu ina ke sapingen ine.

¹¹ Deka lumu ilengen due agegeng ke supmu ka aitno lisak ila dagar dau dagar kovok. Kesua isak supmu ka Krais mete ke isak e kasip amunsak.

¹² Deka langka umodue elio langane umodue elio soulu ke supmu e umodue agegeng ke aitno lisak ila dagar. Ane langka umodue elio soulu ke Krais.

¹³ Deka langka ngangon ka ngangene due agegeng ke osep leklou ma tidue elio epmes ina ma ngangen ongwa okurne aling silang blang kovok. Lama lou elio due isak tidue elio soulu.