1 Korin 7 - Aria New Testament

Pelengon ane la ke elio gingen

¹ Eknikane ma ngakoli lumu pelengon ka umosogoe ke pas gesa. Langka gute gesa gi kovok are itau.

² E dau elio okwa polou pula. Deka langane. Wan ka itau ma gute kene kene due ila asap e ma apmang kene kene due ila boget blang.

³ Gute arang pampamu ine ila asap ina. E apmang pampamu ine ila boget ina blang. E gute arang ma iye dangdang pampamu ine ke ila asap kovok. E apmang ma iye dangdang pampamu ine ke ila boget kovok.

⁴ Apmang plau iye tona pampamu ine kovok. Aurou. Ila boget plaue. E gute arang plau iye tona pampamu ine kovok. Aurou. Ila asap plaue.

⁵ Langka umorwo umegi deka amkaranga ompul dogur ke eswom e amdangdang pampamu lugom ke iye kovok. E langka umorwo aitno lumu kene e umadangdang pampamu lumu isuk boto ma umakaranga umawai itau ke Pmada ke elio gesa elio langane itau. E mase umorwo blang umodue pampamu lumu tineklep pulu blang. Lama umakaranga umaplau pampamu lumu itau kovok e Satan tok umu.

⁶ Pelengon ka ngawai ine ma lua umu. E pelengon ane dong langka parangan kovok. Aurou. Ngapalongo lumu ine vala.

⁷ Ngawaiki ma umegi kovok langka ngong ngagi kovok. E Ida Tapolngon kar kerengen kene kene ke osep kene kene. Langka gute kene due kerengen kene ka iye gi e gute silang due kerengen silang ka iye gi kovok.

⁸ E ke apmang koke arang ka tigi kovok e ke apmang ka sasarak timete kodong ngawai langane. Langka tidong e tigi kovok langka ngong are itau lokono.

⁹ E langka tikaranga tiplau pampamu lisak itau kovok deka ma tigi. Lama elio isungon polou langka eiou ke pampamu lisak.

¹⁰ Ke osep arang koke apmang ka tigi kodong ngakar isak pelengon dagar. Ane langka lou pelengon dagar kovok. Aurou. Ane Ida Puda ila pelengon dagar. Pelengon dagar tonari langane. Ma apmang songon ila boget kovok.

¹¹ E langka iye songon ila boget kodong ma iye dong vala e gi blang kovok. Langka aurou ma iye ilik la ma iye dong kap ila boget blang. E gute arang blang ma iye sapir ila asap kovok.

¹² Deka lou pelengon ke osep langane. Ane Ida Puda ila pelengon kovok. Ngong vala ngawai langane. Langka gute Kristen gesa gi apmang gesa ka aitno dagar ke Yesus kovok e apmang waiki dong kap iye deka gute Kristen ma sapir iye sakam.

¹³ E langka apmang Kristen gesa gi ila boget ka aitno dagar ke Yesus kovok e gute waiki dong kap iye deka apmang ma songon iye kovok.

¹⁴ Umeile langka gute ka aitno dagar ke Yesus kovok e neklep ke ila asap ke elio langane ma gute langka iye dong olwo boto ke Ida Tapolngon. Langka apmang ka aitno dagar ke Yesus kovok e neklep ke ila boget ke elio ka langane ma apmang langka iye dong olwo boto ke Ida Tapolngon. Langka aurou ane ma langka titorok tidong itau ke Ida Tapolngon bitna kovok. E eknikane tidong olwo boto ke Ida Tapolngon.

¹⁵ E langka gute arang koke apmang ka aitno dagar ke Yesus kovok waiki songon apmang koke arang ka esna iye karanga didi aitno e songon iye. Iye karanga songon iye la kesua Ida Tapolngon waiki ma umodong itau kap osep leklou blang.

¹⁶ Wom apmang emile kovok langka ma amkaranga omlua lem boget ma iye polou Kristen koke aurou. E wom arang emile kovok langka ma amkaranga omlua lem asap ma iye polou Kristen koke aurou.

Itedidi elio kene kene ka Ida Tapolngon kare ke ite kente kente

¹⁷ Umu kenmu kenmu ma umodong vala ke lumu mosongon ka Ida Puda kare ke umu kodong. Mosongon lange ka umodong ine alo ka Ida Tapolngon rere umu ila osep umu. Ngawai pelengon dagar ane ke sios ka pula keniye.

¹⁸ Langka osep tiulang gute gesa otne kodong e Ida Tapolngon rere iye ila gute ma iye mosi otne tarna ina amal blang e ma kukwop wan ka osep tidue ke iye kovok. E langka gute gesa ka tiulang iye kovok e Ida Tapolngon rere iye ma iye didi elio ulangngan ina kovok.

¹⁹ Elio ka gute didi elio ulangngan ina langka wan adai. E elio ka gute didi elio ulangngan ina kovok elio langane wan adai blang. E elio ka osep tididi Ida Tapolngon ila pelengon dagar ane wan ombatno lokono.

²⁰ Mosongon lange ka umodong ine alo ka Ida Tapolngon rere umu ila osep umu io umodong ke mosongon langare vala.

²¹ Umu leklou umodong langka wokboi nating alo ka Ida Tapolngon rere umu? E langka langane aitno lumu kro ine kovok. E langka gute ka plau umu waiki songon umu io umala vala.

²² E gute ka dong wokboi nating alo ka Ida Puda rere iye ila gute io ke Ida Puda bitna iye dong langka iye fri. E gute ka dong fri alo ka Ida Puda rere iye ila gute iye polou langka Ida Puda ila wokboi nating.

²³ E Ida Puda kli umu kodong e ma umopolou langka wokboi nating kovok.

²⁴ Sipmi. Mosongon lange ka umodong ine alo ka Ida Tapolngon rere umu ila osep umodong ke mosongon langane ke Ida Tapolngon bitna vala.

Osep ka isak dau tigi kovok

²⁵ Ida Puda kar pelengon dagar gesa ke ngong kovok ka la ke umu ka umegi kovok. E ngawaiki ma ngakar aitno lungong ke umu kesua Ida Tapolngon aitno due ngong e ngadidi aitno e nganapapra ila pelengon ka lokono vala.

²⁶ Ke oku ane elio bitna bitna ka opru polou deka wan ka itau ma umodong ke lumu mosongon ka oku ane ina.

²⁷ Langka emgi lem asap kodong amsapir iye kovok. E langka wom dau emgi lem asap kovok aitno lugom mter langka omdue lem asap kovok.

²⁸ E langka emgi ane langka omdue elio epmes ina kovok. E langka apmang bela gi ane langka iye due elio epmes ina kovok. E osep arang e apmang ka tigi kodong ma tinamani wan ka opru isak ke taklak ane e ngawaiki elio ka opru langane ma polou ke umu kovok.

²⁹ Sipmi. Ngawai langane. Dau tauni kovok e ma taim ane yagos. Deka ke eknikane osep ka tigi sasarak kodong ma tidong langka sasarak kovok.

³⁰ E osep ka tikngis omba ma tidong langka tikngis kovok. E osep ka tisandir ma tidong langka tisandir kovok. E osep ka tikli wan ma tidong langka osep ka urok wan dong kovok.

³¹ E osep ka tiboko ke wan ka taklak ina ma aitno lisak mter ke bokongon tonari kovok. Iteile isuk boto ma taklak ane e wan ka pula keniye ine ma polou yagos.

³² Ngawaiki ma taklak ina wan bitna bitna due aitno lumu kro ine kovok. Gute ka gi kovok aitno dagar ke Ida Puda ila elio bitna bitna. Iye waiki due elio ka Ida Puda aitno itau ine.

³³ E gute ka gi aitno mter ke wan ka taklak ina e iye waiki due elio ka ila asap aitno itau ine.

³⁴ Deka aitno orwo. E apmang bela e apmang leklou ka tigi kovok aitno lisak dagar ke Ida Puda ila elio. Tiwaiki pampamu lisak e aitno lisak la ke Ida Puda vala. E apmang ka gi aitno mter ke wan bitna bitna ka taklak ane ina e iye waiki due elio ka ila boget aitno itau ine.

³⁵ Lou pelengon ane ma lua umu ma umodong itau. E ngawaiki pelengon ane gesa ma dangdang umu kovok. Aurou. Ngawaiki ma umedidi elio itau e umodue Ida Puda ila bokongon aling aling. Ngawaiki aitno lumu kene ke Ida Puda vala.

³⁶ Langka gute gesa aitno mter langka iye due elio ka itau kovok ke apmang bela ka osep tirere ma iye gi iye. E langka iye karanga plau aitno itau kovok ma iye didi aitno e gi apmang tonari. Iye due elio epmes ina kovok.

³⁷ E langka gute gesa aitno dagar e wan gesa blang pagei iye kovok e iye karanga plau aitno. E aitno dagar langka iye waiki gi apmang bela ka osep tirere ke iye kodong kovok deka isak orwo ma tidong langka auram e bela vala. E elio langane itau.

³⁸ Deka gute ka gi apmang bela ka tirere ke iye due elio itau. E langka iye gi apmang tonari kovok ane iye due elio ka itau lokono.

³⁹ Langka apmang gesa ila boget dong dau ma apmang dong kap iye. E langka ila boget mete apmang langka neklep ke iye kovok. Langka iye waiki gi gute silang iye karanga gi iye e dau iye karanga gi gute ka aitno dagar ke Ida Puda vala.

⁴⁰ E aitno lungong langane. Langka iye gi kovok ane langka iye dong e aitno itau vala. Aitno lungong langane. Ida Tapolngon Ano Itau dong ke ngong deka ngapalongo lumu ke pelengon ane.