1 Korin 6 - Aria New Testament

Osep Kristen ma tikotim isak pulu kovok

¹ Langka airavu ke umu gute gesa aitno soulu ke gute silang e sin elio vri ke iye. Ma iye klou osep ka Ida Tapolngon ila osep e kotim ila aten ke osep ka isak Ida Tapolngon ila osep kovok amtarsak? Elio langane itau kovok.

² Lange? Umeile langane kovok? Ida Tapolngon ila osep ma tiwade osep ka tidong ke taklak ane urok elio. E langka umodue langane ina lange umakaranga umawade elio isuk isuk ka polou airavu ke umu tona kovok?

³ Umeile mase ma itawade ensel urok elio blang. E langka itodue langane itakaranga itawade pelengon ke wan bitna bitna ka taklak ane ina.

⁴ E langka pelengon gesa polou airavu ke umu ina lange umawaiki gute ka dong ke sios kovok wade pelengon tonari?

⁵ Ngawai pelengon langane ma umu mnak umu ine. Ina lange? Gute gesa dong airavu ke umu ka iye karanga wade pelengon ka polou airavu ke osep orwo kovok?

⁶ Ina lange gute Kristen kene paur ila aten ka Kristen blang la ke kot e lasu ke osep ka aitno lisak dagar ke Krais kovok amtarsak?

⁷ Lokono umapaur osep leklou blang ka tidong ke Yesus limla kla ke kot. Lumu elio ane nisngen langka umegene kodong. Wan ka itau umosongon isak ma tidue elio soulu ke umu. E silang umosongon isak ma tipi lumu wan.

⁸ E umawaiki umedidi elio langane kovok. Aurou. Umu blang umodue elio soulu ke osep leklou e umepi urok wan. E umodue langane ke supmu ka isak osep Kristen.

⁹ Umeile langane. Osep ka tidue elio soulu ma tikaranga tisep ke Ida Tapolngon ila omur kovok. Deka umayak umu pulu ine kovok. Osep ka tidue okwa e osep ka aitno lisak la ke sapingen e osep ka tisu apmang pasinga e osep ka tidue elio ka soulu langka isak mnak isak ine ke osep leklou. Langka arang tidue elio kap arang e apmang tidue elio kap apmang.

¹⁰ E osep ka tipanako e osep ka tingale osep leklou urok wan e osep ke tinim aki dagar ma amtarsak balilu e osep ka amtarsak mluk osep leklou e osep ka tinak osep leklou urok wan. Osep ka langane ma tikaranga tidong ke omur ka Ida Tapolngon plaue kovok.

¹¹ Ke oglou umu leklou umodong langka osep tonari. E Ida Tapolngon ris umu kodong e rere umu ila osep lokono. Deka ke Ida Puda Yesus Krais angaine e ke Ida Tapolngon Ano Itau iye due umu umopolou itau e osuk ke bitna.

Ida Tapolngon Ano Itau dong ke pampamu lite

¹² Osep leklou tiwai langane. “Wan ka pula keniye itau ma ngadue.” E wan ka pula keniye lua ngong ma ngadong itau kovok. Wan ka pula keniye itau ma ngadue e dau ngasongon wan gesa ma karanga plau ngong kovok.

¹³ Osep leklou tiwai ngangon wan ka itangen e itodue sep ke pele lite e pele lite dong ma itodue ngangon sepe. Pelengon ane lokono e Ida Tapolngon due agegeng ke isak orwo. E ke pampamu lite ma itodue elio soulu kovok. Aurou. Pampamu lite Ida Puda ila wan. E ma itoboko ila bokongon ine.

¹⁴ Ida Tapolngon didi ila arit e due Ida Puda poga tito ke ina denga deka iye blang ma due ite itopoga itetito ke ida denga.

¹⁵ Lange? Umeile langane ko-vok? Pampamu lumu kene kene Krais pampamu ine ongwa ine. E langka ngadue Krais pampamu ine ongwa ine e ngadue neklep ke apmang ekreng palma ina elio langane itau? Aurou lokono.

¹⁶ Gute ka neklep ke apmang ekreng palma ina iye polou langka isak orwo pampamu lisak kene vala. Lange? Umeile elio langane kovok? Ida Tapolngon ila pelengon wai langane. “Isak orwo ma tipolou langka pampamu lisak kene vala.”

¹⁷ E langka gute gesa neklep ke Ida Puda ano ma iye polou langka kene vala kap Krais.

¹⁸ Aling aling ma umopul dogur ke elio okwa. Kesua gute ka due elio okwa due agegeng ke pampamu ine. E elio isuk isuk ka soulu leklou ka osep tidue isak tidue agegeng ke pampamu lisak kovok.

¹⁹ Lange? Umeile langane kovok? Pampamu lumu Ida Tapolngon Ano Itau ila ninu. Ida Tapolngon kar Ano Itau ke umu e iye dong ke aitno lumu. E pampamu lumu umu tona lumu wan kovok.

²⁰ Pampamu lumu Ida Tapolngon ila wan kesua iye kli umu kodong. Deka wan ka pula keniye ka umodue ke pampamu lumu ma umakakai Ida Tapolngon angaine ine.