1 Korin 5 - Aria New Testament

Gute Korin ina ka due okwa

¹ Ngaklingen pelengon langka elio soulu kene polou airavu ke umu. Elio ane soulu lokono e osep ka isak osep Yuda ina kovok tidue langane kovok kesua urok pelengon dagar dangdang isak ine. Elio tonari langane. Gute kene due elio soulu kap apmang ka timla esna.

² E aitno lumu vri ke umu vala. Wan ka itau umosongon elio ka umakakai angainmu e aitno lumu soulu e umekngis ine. Wan ka itau umasapir gute tonari ka due elio soulu ma iye karanga dong kap umu kovok.

^3-4 Lokono pampamu lungong dong mawa ke umu e dau aitno lungong vri kap umu. Ane langka ngong ngadong kap umu. E ke Ida Puda Yesus angaine ngawade gute tonari ila elio ka iye due kodong. Deka alo ka umoduni pulu ma aitno lungong vri kap umu e Ida Puda Yesus ila arit dong blang.

⁵ Deka umapaur gute tonari ma iye dong ke Satan limla ma Satan due agegeng ke pampamu ine. Umodue langane e alo ka Ida Puda ma polou lokono gute tonari ano ma dong itau kap iye.

⁶ Lumu elio ka umakakai angainmu soulu lokono. Batne lange? Umeile yis sasi boto vala karanga due bret pula song polou omba kovok?

⁷ E langane. Ma umasapir yis ka oglou ina e ma umodong langka bret ka oku ina ka yis dong ine kovok. E ngaile umodong langka bret ka yis dong ine kovok. Kesua osep tidue elio opmu ina ke Krais kodong. Ane langka osep timluk sipsip e tidue elio opmu ina ine ke oklou ka amtada sisir Ida Tapolngon lua osep Yuda ina tisongon omur Isip.

⁸ Ane langka pelengon ano ka la ke udo mosongon. Udo mosongon ma didi osep ka tikere isak ke oklou tonari. Ma itosongon udo elio isuk isuk ka soulu. Langka gute gesa ka sapir yis ka oglou ina la ke ila ninu alo ka timosi isak ke urok rogo ina oklou. E ma itedidi elio langka itawai deka itedidi udo pelengon lokono. Elio tonari ma dong langka bret oku ka yis dong ine kovok.

⁹ Ke pas silang ngasogo ke umu langane. Umodong kap osep ka tidue elio soulu langka okwa sakam.

¹⁰ E osep ka tidong ka tingale wan e tipanako osep leklou urok wan bitna bitna e osep ka aitno lisak la ke sapingen. Aitno lumu lange? Ngawai langka umosongon osep ka pula keniye ka taklak ane ina ka tidue elio soulu? Aurou. Langka umawaiki umosongon osep tonari deka ma umosongon taklak ane lokono.

¹¹ E langane. Lou pelengon batne langane. Langka gute gesa ka sir iye tona Kristen due elio okwa koke iye ngale wan koke aitno la ke sapingen koke bitna mluk gute silang koke iye inim aki dagar ma bitna balilu koke iye panako osep leklou urok wan bitna bitna deka ma umakaranga umodong kap iye kovok. E silang ma umangen kap gute ka ila elio langane kovok.

¹² Lange? Lou bokongon ma ngawade osep ka tidong ke dogur urok elio? Aurou va. Bokongon ka osep tiwade Yesus ila osep urok elio ane lumu bokongon lokono.

¹³ E osep ka tidong ke dogur Ida Tapolngon ma wade urok elio. Ida Tapolngon ila pelengon wai langane. “Ma umasapir gute ka due elio soulu ka dong airavu ke umu la.”