1 Korin 4 - Aria New Testament

Ida Puda Krais ma wade udo elio isuk isuk

¹ Aitno lumu mter ke imi langane. Imi Krais ila osep boko-ngon ina. E imoboko ma imaplau Ida Tapolngon ila pelengon ka kukwop.

² Langka gute gesa plau gute silang ila bokongon deka lokono ma iye didi pelengon ka ina gute kare ka la ke ila bokongon.

³ E langka umawaiki umawade lou elio isuk isuk koke langka osep tiwaiki tiwade lou elio ke osep amtarsak ma aitno lungong kro ine kovok. Ngong blang ngawade lou elio kovok.

⁴ E ngaile lou elio soulu gesa ka vri ke ngong kovok. E dau ngakaranga ngawai langane kovok. “Ngong gute itau.” Bokongon ka wade ngong ane Ida Puda ila bokongon vala.

⁵ Kesua kot ina taim dau kovok e umawade gute silang ila elio kovok. Ma umapara ke alo ka Ida Puda ma me. Ma iye due wan ka dong kukwop ke aivoro dong malak lokono. Langka gute kukwop ila elio ma iye due polou malak blang. Ke alo ari ma Ida Tapolngon wai ke ite kente kente langka udo bokongon itau koke soulu.

Osep Korin ina tikakai angainsak

⁶ Sipmi. Ngawaiki ngalua umu deka ngawai ke umu ke pelengon ane ka la ke ngong orwo Apolos. E ngawaiki ma aitno lumu mter ke imorwo limem elio itau ma umeile Ida Tapolngon ila pelengon ka wai langane lana ine. Ma umoklou pelengon kovok. E ngawaiki aitno lumu vri ke umu kovok. E umakakai gute gesa angaine tito e umepes gute silang angaine duru kovok.

⁷ Sei bitna ngen wom langka wom gute namor? Omdue lem wan ka pula keniye ke Ida Tapolngon. E langka lokono omdue wan ka pula keniye ke Ida Tapolngon limla deka ina lange amkakai angain wom ine?

⁸ Aitno lumu lange? Lumu wan ka pula keniye bon kodong i? Lumu wan ka pula keniye dong e umodong itau lokono. Langka umomole imi kodong e umopolou langka osep ka tivri mgo ke omur omur. Aitno lumu langane i? Aisudo. Ngawaiki ma umodong umopolou langka osep ka tivri mgo ke omur omur lokono. Ma imi blang imopolou imodong langka osep ka tivri mgo ke omur omur blang kap umu.

⁹ E imodong langane kovok. Aitno lungong langka Ida Tapolngon due imi osep aposel imodong ke batne lokono e imodong langka osep ka kot wai kodong langka imi ma imemete. Ma osep timluk imi ma imemete ke osep pula e ensel blang amtarsak.

¹⁰ Aitno limi dagar ke Krais deka osep aitno lisak mter langka imi osep ka kaka e umodong langka osep ka umeile omur ke Krais. Limem arit kovok e lumu arit omba. Angainmi daudeng e angainmu omba.

¹¹ Ke oglou me iding ke eknikane imodong langka sapanga due imi e kre limi kakrak lokono. E imetnei klos ka itau kovok. Osep timluk imi e limem ninu gesa dong ka imodong ine kovok.

¹² E imoboko engil lokono ke lipmi va e bokongon opru imi. Osep tiwai soulu ke imi e imepmi Ida Tapolngon ma iye kere isak. Tidue elio soulu ke imi e imawai ine kovok e imodong vala.

¹³ Tiluk imi soulu e imokoli urok pelengon ke pelengon itau vala. E imopolou kodong langka tokonkon ka sasi lokono ka osep tisere la. Ke osep pula amtarsak imodong langka tokonkon vala e langka wan ka sasi lokono. Imodong langane ke oglou la lama iding ke eknikane.

Pol waiki osep Korin ina tikana ila elio isuk isuk

¹⁴ Ngasogo pelengon ane ma umu mnak umu ine kovok. Aurou. Ngasogoe kesua aitno lungong itau lokono ke umu ka dirgu umu e ma ngawaiki ngasruk aitno lumu vala.

¹⁵ Lama lumu plaungan pula pula tiplau umu kodong dau sipmomu pula ke Krais dong kovok. Aurou. Ke Krais Yesus ila elio ngong kenngong vala ngadong pmomu lokono. E umopolou langka dirgu alo ka nganapapra Ida Tapolngon ila omon itau ke umu.

¹⁶ Deka ngawai dagar ke umu ma umavati lou elio e ma umakana ngong.

¹⁷ E ngapagei gute Timoti uti ke umu. Iye langka erigu e aitno lungong itau lokono ke iye e iye didi Ida Puda ila pelengon keniye. Ma iye sruk aitno lumu ke elio ka ngadue kesua nganeklep ke Krais. Elio ka langka nganapapra Yesus ila osep ke sios pula e ke armok ka pula keniye ma tididie.

¹⁸ E supmu leklou aitno lisak mter langka ma ngauti ke umu kovok e aitno lisak vri ke isak e tikakai angainsak vala.

¹⁹ E langane kovok. Langka Ida Puda waiki ngauti ke umu ma ngauti paide ke umu. Alo ka ngauti ma ngaklingen osep tonari ka aitno lisak vri ke isak urok pelengon kovok. Aurou. Ngauti ma ngaile omur urok arit lange.

²⁰ Kesua elio ka Ida Tapolngon plau osep didi pelengon vala kovok. Aurou. Ane didi Ida Tapolngon ila arit.

²¹ E umawaiki ma ngadue elio ka lange? Umawaiki ma ngadue kanda e ma ngaules umu ine koke aurou? Koke umawaiki ngauti ke umu e ngong lana ngong ke umu e aitno lungong epen ke umu?