1 Korin 2 - Aria New Testament

Pol palongo osep ke Ida Tapolngon ila omon itau

¹ Sipmi. Oglou alo ka nga-napapra Ida Tapolngon ila pelengon ka oglou osep tile ine kovok ke umu nganapapra pelengon bitna bitna ke umu kovok. E silang nganapapra pelengon omba ka osep ka tile omur ke ilengen ka taklak ina tidue kovok. Aurou.

² Aitno lungong langane. Alo ka ngadong kap umu aitno lungong mter ke wan silang blang kovok. Aurou. Aitno lungong la dagar ke Yesus Krais e elio ka iye mana ke ina akai e mete ine.

³ E alo ka ngadong kap umu lou arit kovok. Aurou. Anngong nesik e nganakarkar omba.

⁴ E pelengon ka ngawai ine e nganapapra ine ke umu didi osep taklak ina urok ilengen kovok. E ngong langka ma ngapalele aitno lumu kovok. Aurou. Lou elio nis umu ke Ano Itau ila arit.

⁵ Ngadue langane ma langka osep urok ilengen ma due aitno lumu dagar ke urok ilengen tonari kovok. Aurou. Ngawaiki Ida Tapolngon ila arit vala ma due aitno lumu tipolou dagar lokono.

Ida Tapolngon Ano Itau lua ite ke ilengen itau

⁶ Lokono. Osep ka tipolou dagar lokono ke Ida Tapolngon ila pelengon tile ilengen ke pelengon ka imanapapra ine. Ilengen ka tidue ka imanapapra ke isak ine ane langka ilengen ka taklak ane ina kovok. E ilengen ane gesa langka ilengen ka osep ka tivri mgo ke ite ke taklak urok ilengen kovok. Osep tonari ma timete deka isak yagos.

⁷ Imanapapra pelengon itau e Ida Tapolngon ila ilengen itau ka oglou iye kukwope ke osep ke umu. Alo ka Ida Tapolngon dau tapol taklak kovok iye ile kodong e iye rere oklou ka ma iye due umu umodong kap iye ke omur heven.

⁸ E pelengon tonari langka osep leklou ka tivri mgo ke ite ke taklak ane urok kovok. Aurou. Io langka tile omur ine ma tidue Ida Puda iye mana ke ina akai kovok. Iye Ida Puda ka ila arit e ila bublongon ombatno.

⁹ Imawai ke pelengon ane ka Ida Tapolngon ila pelengon wai ine langane. “Wan ka oglou osep tivati kovok e tiklingen pelengon ine kovok e ka polou ke osep aitno lisak kovok isak wan itau lokono. Ida Tapolngon rere isak ke osep ka isak lana isak ke iye ma urok wan.”

¹⁰ Pelengon ke wan tonari oglou dong kukwop. Io Ida Tapolngon Ano Itau due tipolou malak deka iteile omur ke isak. Ano Itau vati wan ka pula keniye e iye vati Ida Tapolngon ila ilengen ka kukwop.

¹¹ Gute gesa karanga ile gute silang aitno kovok. Aurou. Gute tona ano vala ile aitno kesua iye dong ke iye. E silang blang langane. Gute gesa karanga ile Ida Tapolngon aitno kovok. Aurou. Ano Itau ka iye Ida Tapolngon Ano vala ile.

¹² E itodue ilengen ka taklak ane ina kovok. Aurou. Itodue Ano Itau ma iteile kerengen ka Ida Tapolngon kare ke ite.

¹³ Imawai malak ke kerengen tonari. E limem pelengon me ke osep urok ilengen kovok. Ano Itau vala kare ke imi. E imawai pelengon tonari ke osep ka Ano Itau dong ke aitno lisak.

¹⁴ Langka Ano Itau dong ke gute gesa aitno kovok iye karanga due kerengen ke Ida Tapolngon Ano Itau kovok. Kesua aitno mter langka kerengen tonari wan adai vala. Itodue kerengen ke Ida Tapolngon Ano Itau. Deka osep ka Ano Itau dong ke aitno lisak isak vala tikaranga tiwade e tile Ida Tapolngon ila kerengen.

¹⁵ Gute ka Ano Itau dong ke aitno iye wade wan ka pula keniye. Lokono gute gesa karanga wade elio bitna bitna ka osep ka Ano Itau dong ke aitno lisak tidue kovok.

¹⁶ Ida Tapolngon ila pelengon wai langane. “Gute sei ile ke Ida Puda aitno ma iye karanga parere Ida Puda? Aurou lokono.” E dau iteile Krais aitno.