1 Korin 16 - Aria New Testament

Osep Korin ina tituktuk urok mani ma tilua osep Kristen leklou

¹ Ma ngawai ke mani ka umawaiki umotuktuke ma umolua Ida Tapolngon ila osep ka tidong ke Jerusalem ine. Ngapalongo Yesus ila osep ka tidong ke provins Galesia ine kodong e ngawaiki ma umu blang umodue elio eriar langka tidue.

² Ke Sande kene kene umu kenmu kenmu umotuk lumu mani ka umawaiki umolua osep ine. Deka umodue mani tonari dong para ke alo ka ngauti ke umu.

³ Umu tona umerere osep leklou ma tipaur lumu mani la ke Ida Tapolngon ila osep ka tidong ke Jerusalem. Deka alo ka ngauti ke umu ma ngakar pas gesa ke osep tonari ma tikalke la.

⁴ E alo ari langka aitno lungong mter langka itau ma ngala blang deka ma tigosok ngong imala.

Pol waiki la vati osep Korin ina

⁵ Ma ngala ngavati osep ka tidong ke provins Masedonia paide. Deka mase ngauti ngapolou ke umu.

⁶ Langka ma ngadong sasi boto kap umu koke aurou ngaile kovok. Koke ma ngadong kap umu la lama alo ka omur epen e engen ka dagar yagos. E alo ka ngala ke armok silang ma umolua ngong ma ngala.

⁷ Ngawaiki ma ngadong sasi boto kap umu vala kovok. Langka Ida Puda waiki ngadong tauni boto kap umu ma ngadong kap umu.

⁸ E ngawaiki ma ngadong ke armok Efesus la lama oklou Pentikos yagos.

⁹ Kesua Ida Tapolngon kar bokongon omba ke ngong. E iye waiki ngadue bokongon tonari ma ngalua osep pula ma tipolou osep Kristen. E silang blang osep pula aitno lisak soulu ke lou bokongon e tiwaiki tidangdang ngong ine.

¹⁰ Langka Timoti polou ke umu deka ma umolua iye ma iye dong itau kap umu e iye ulou tarna kovok. Kesua iye due Ida Puda ila bokongon eriar langka ngadue.

¹¹ E ngawaiki supmu leklou tipul dogur ke iye kovok. E aitno lumu itau ke iye ma umolua iye ke ila langan ma iye bauluk me ke ngong blang. Ma ngapara ke alo ka iye me kap sudo leklou.

¹² E udo aten Apolos aitno langane. Ngawai dagar ke iye ma iye la kap sudo leklou alo ka isak kla tivati umu. E aitno itau ine dau kovok. Mase langka aitno itau ine ma iye uti la ke umu.

¹³ E ma umaplau umu itau e umodong dagar lokono ke aitno lumu ila dagar ka la ke Ida Tapolngon. Ma umodong dagar e ma umoulou tarna lumu ke wan gesa kovok.

¹⁴ Aling aling ma umu lana umu ke osep ka pula keniye. Deka elio ane ma kading lumu elio ka pula keniye ka umodue.

¹⁵ Sipmi. Umeile gute Stefanas e ila osua. Tipolou osep Kristen mgo ke osep ka tidong ke provins Akaia. Ke aitno lisak tidue boko-ngon ka lua Ida Tapolngon ila osep.

¹⁶ Ngawai dagar ke umu ma ume-didi osep ka langane urok elio. E osep ka tilua osep leklou e ka tidue bokongon kap isak.

¹⁷ Gute Stefanas e gute For-tunatus e gute Akaikus time ke ngong e aitno lungong neser alo ka ngavati isak. Kesua umu ka pula keniye umakaranga umomo umavati ngong kovok.

¹⁸ E tipolou ke ngong e tidue aitno lungong itau langka tidue aitno lumu itau blang. E ma aitno lumu itau ke osep ka langane e umoklingen urok pelengon.

¹⁹ Yesus ila osep urok sios keniye ka tidong ke provins Esia tiwai “oklou itau” ke umu. Gute Akwila orwo esna Prisila tigosok Yesus ila osep ka tiduni pulu ke urok ninu tiwai “oklou itau” ke umu kesua Ida Puda dong.

²⁰ Sudo ka tidong kap imi tiwai “oklou itau” ke umu. E umu ka Yesus ila osep umawai “oklou itau” pulu e umesekan pulu.

²¹ Ngong Pol ngasogo pele-ngon ane ke lungu. Ngawai “oklou itau” ke umu.

²² Langka gute gesa lana iye ke Ida Puda kovok ma agegeng polou ke iye. E ngawaiki Ngau Puda suong me.

²³ Ngawaiki ma Ida Puda Yesus ila makaingan dong kap umu.

²⁴ E ngong lana ngong ke umu kesua ite Krais Yesus ila osep ite.