1 Korin 15 - Aria New Testament

Yesus mete deka iye poga tito ke ina denga

¹ Sipmi. Ngawaiki ngasruk aitno lumu ke omon itau ka oglou nganapapra ke umu. Alo ari aitno lumu la dagar ke omon itau deka umodong dagar ine.

² Langka aitno lumu la dagar ke omon itau ka nganapapra ke umu deka ke omon itau tonari Ida Tapolngon lua umu ke lumu elio epmes ina. Lama aitno lumu orwo ine deka omon tonari karanga lua umu kovok.

³ Pelengon ka omba lokono ka oglou Ida Puda kare ke ngong io ngakare ke umu langane. Krais mete ma klok udo elio epmes ina langka oglou Ida Tapolngon ila pelengon wai ine.

⁴ E tiyas iye ke ina denga deka oklou eklu mela yagos deka iye poga tito ke ina denga blang. Ane langka oglou Ida Tapolngon ila pelengon wai ine.

⁵ Iye poga tito ke ina denga deka mase iye polou ke Pita e mase iye polou ke ila aposel songotno orwo.

⁶ Mase iye polou ke sisrok blang ma tivati iye ka inarak sasa langka 500. Osep tonari pula dau tidong e osep leklou timete kodong.

⁷ Mase iye polou ke Jems e iye vati iye deka mase iye polou ke osep aposel keniye blang e tivati iye.

⁸ E ke batne lokono iye polou ke ngong blang e ngavati iye. E ngong langka gute ka aiya divir iye soulu.

⁹ E osep aposel leklou timole ngong. Kesua oglou ngadue agegeng ke Ida Tapolngon ila osep. Deka osep tikaranga tisir ngong aposel kovok.

¹⁰ E Ida Tapolngon makai ngong e due ngong ngapolou ila aposel gesa deka ngadong langane. Ida Tapolngon ila makaingan ka me ke ngong la adai vala kovok. Aurou. Ngaboko dagar lokono deka lou bokongon mole osep aposel leklou urok bokongon. E ngong tona ngadue bokongon tonari kovok. Aurou. Ida Tapolngon makai ngong e lua ngong deka ngaboko ke ila bokongon.

¹¹ Langka ngaboko ine koke osep aposel leklou tiboko ine imi keniye imanapapra Ida Puda Yesus ina metengen e ila baulukngon ke umu. Deka umoklingen ine e aitno lumu la dagar ine.

Osep ka pula keniye ma timete deka mase ma tipoga titito ke inarak denga

¹² Imanapapra pelengon ka Krais mete e Ida Tapolngon due poga tito ke ina denga. E umu leklou umawai gute ka mete kodong ma iye karanga poga tito ke ina denga kovok.

¹³ E langka umawai pelengon lokono osep ka timete kodong tipoga titito ke inarak denga kovok deka ke oglou alo ka Krais mete iye poga tito ke ina denga kovok.

¹⁴ E langka Krais poga tito ke ina denga kovok deka pelengon ka imanapapra ke umu langka wan adai vala. Deka aitno lumu ila dagar ka la ke Krais langka wan adai blang.

¹⁵ E langane. Langka Krais poga tito ke ina denga kovok imopolou langka osep ka tiwai yakngan ke wan ka Ida Tapolngon due. Kesua imawai malak Ida Tapolngon due Krais poga tito ke ina denga. E langka Ida Tapolngon karanga due osep ka timete kodong tipoga titito ke inarak denga kovok ane langka iye due Krais poga tito ke ina denga kovok.

¹⁶ Langka Ida Tapolngon karanga due osep ka timete kodong tipoga titito ke inarak denga kovok oglou iye due Krais poga tito ke ina denga kovok blang.

¹⁷ E langka Ida Tapolngon due Krais poga tito ke ina denga kovok ane langka aitno lumu ila dagar ka la ke Krais langka wan adai. E eknikane umu dau umodong ke lumu elio epmes ina.

¹⁸ Deka osep ka aitno lisak dagar ke Krais e timete kodong isak blang inarak agegeng due isak.

¹⁹ E langka elio ka aitno lite dagar ke Krais lua ite ke udo mosongon ka taklak ane vala deka ma ite tona vala. Deka itodong soulu lokono.

²⁰ E langane kovok. Krais mete deka Ida Tapolngon due poga tito ke ina denga kodong. Iye poga tito ke ina denga mgo ke osep ka pula keniye ka timete ma isak blang tipoga titito ke inarak denga eriar langka iye due. Ane langka ngangon ka polou anino mgo ke yage.

²¹ E langane. Gute kene mgo ke elio ka osep timete e gute kene silang mgo ke elio ka osep tipoga titito ke inarak denga.

²² Eriar langka osep ka pula keniye ka tidong ke Adam ila osua timete deka osep ka pula keniye ka tidong ke Krais ila osua ma tipoga titito ke inarak denga.

²³ Deka langane. Ite ka pula keniye ma itopoga itetito ke ida denga alo ka Ida Tapolngon rere ke ite ma iye due langane. Mgongon iye due Krais poga tito ke ina denga e mase alo ka iye iding me ite ka pula keniye ka ila osep ma itopoga itetito ke ida denga.

²⁴ Alo ari ma Ida Tapolngon due taim ane ma yagos. Deka Krais ma due osep ka tivri mgo ke omur omur isak yagos e ma iye due angelo soulu ka urok arit omba isak yagos. E ma iye due wan ka pula keniye ka urok arit dong ke isak yagos. Deka ma iye kar wan tonari keniye ke Timla ka Ida Tapolngon.

²⁵ Deka Krais ma plau wan ka pula keniye la lama Ida Tapolngon mole Krais ina oul ka pula keniye.

²⁶ Ma Krais mole ina oul keniye yagos deka ma iye due agegeng ke elio metengen ma yagos blang.

²⁷ Ida Tapolngon ila pelengon wai langane. “Ida Tapolngon due Krais ma iye mole wan ka pula keniye e plau wan ka pula keniye.” Pelengon ane wai langane e dau iteile pelengon tonari lana ine langka Krais ma mgo ke Ida Tapolngon kovok. Aurou. Ida Tapolngon rere Krais ma iye mole wan ka pula keniye e Ida Tapolngon vala mgo ke Krais.

²⁸ Deka mase ma Ida Tapolngon due Krais ma iye mole wan ka pula keniye. E Krais ka Ida Tapolngon Otno Arang ma iye mgo ke Ida Tapolngon kovok. Aurou. Ma Ida Tapolngon mgo ke Krais e Krais ma didi iye. Kesua Ida Tapolngon due Krais ma iye mole wan ka pula keniye. E Ida Tapolngon dong mgo ke wan ka pula keniye.

²⁹ Langka osep ka timete kodong tikaranga tipoga titito ke inarak denga kovok batne lange osep leklou tidue elio paunimngen ina ma lua osep ka timete kodong?

³⁰ E ina lange ke imi? Langka osep ka timete kodong tipoga titito ke inarak denga kovok ina lange imi dau imodue limem bokongon e imosongone kovok? Kesua osep pula tiwaiki tidue agegeng ke imi batne ke limem bokongon. E aitno limi dagar ke limem bokongon.

³¹ Sipmi. Aitno lungong langka oklou aling aling osep tiwaiki tidue burwa ke ngong batne ke lou bokongon. Ite ka pula keniye itodong ke Ida Puda Yesus ila osua deka aitno lungong neser omba ke umu. E ngabisi pelengon ane ke umu kovok.

³² Langka ngadidi aitno lungong vala e ngadue bokongon ane ina lange ngadue evlei ke ongwa kevena ke armok Efesus? Langka osep ka timete kodong tikaranga tipoga titito ke inarak denga kovok deka ma itedidi osep leklou urok pelengon ka wai langane vala. “Eknikane ma itangen ida ngangon e iteinim ida aki kesua masalang ma itemete.”

³³ Umeile umu itau lama osep leklou tipagolgol aitno lumu. Umeile pelengon langane. Langka umodong kap osep soulu bitna ma tidue agegeng ke lumu elio itau.

³⁴ Umeile umu itau e umosongon lumu elio epmes ina bitna bitna e umodue elio itau vala. Umodue elio soulu e supmu leklou tile ke Ida Tapolngon dau kovok. Ngawai pelengon ane ke umu ma umu mnak umu ke lumu elio soulu.

Pampamu lite ka oku ina

³⁵ E gute gesa ma pmi ite langane. “Osep ka timete kodong ma tipoga titito ke inarak denga lange? Ma pampamu lisak lange alo ka tipoga titito ke inarak denga?”

³⁶ Osep ka tiwai langane isak kaka vala. Umeile alo ka gute usak wit londo deka wit londo tonari ma polou okus mgo deka ma iye nobolbol tito.

³⁷ E londo ka gute usake langka wit londo koke wansua londo ane langka londo vala. Deka londo eriar langka wan ka nobolbol tito kovok.

³⁸ E Ida Tapolngon didi aitno e due wan bitna bitna pampamu lisak tidong ke isak. E londo kene pampamu ine eriar langka londo silang pampamu ine kovok.

³⁹ Wan bitna bitna keniye pampamu lisak eriar kovok. Itosep pampamu lite eriar e ongwa pampamu lisak silang e monuk pampamu lisak silang blang e lodu pampamu lisak silang blang.

⁴⁰ Wan ka dong ke sirva pampamu lisak e wan ka dong ke taklak pampamu lisak la pulu kovok. E wan ka sirva ina urok elio eriar e wan ka taklak ina urok elio silang.

⁴¹ E oklou ina elio kene e taiko ina elio silang e gigimo urok elio silang. E gigimo blang isak kensak kensak urok elio silang blang.

⁴² E elio ka gute ka mete kodong e poga tito ke ina denga langane blang. Pampamu ka itayase ma polou okus. E pampamu ka poga tito ke ina denga ma karanga polou okus blang kovok.

⁴³ Pampamu ka itayase langka wan soulu. E pampamu ka poga tito ke ina denga itau lokono. Pampamu ka itayase ila arit kovok. E pampamu ka poga tito ke ina denga ila arit omba.

⁴⁴ E pampamu ka itayase wan ka taklak ina vala. E pampamu ka poga tito ke ina denga ane wan ka omur heven ina. Eriar langka pampamu ka taklak ina dong pampamu ka heven ina dong blang.

⁴⁵ Ida Tapolngon ila pelengon wai langane. “Gute ka mgongon ina angaine Adam. Ida Tapolngon due polou deka iye dong.” E Ano Itau due gute Adam ka orwo ina ka me batne polou deka iye dong ma iye kar mosongon lokono ke ite.

⁴⁶ E langane. Gute ka lua ite ke udo mosongon ka itau polou mgo kovok. Aurou. Gute ka ina poloungon ke taklak iye polou mgo deka gute ka polou ke Ano Itau polou ke batne.

⁴⁷ Gute ka mgongon ina iye gute taklak ina kesua Ida Tapolngon due taklak e kapo gute ine. E gute ka orwo ina iye gute omur heven ina.

⁴⁸ Osep ka pula keniye ka taklak ina isak eriar langka gute taklak ina. E osep ka omur heven ina isak ma tipolou langka gute omur heven ina.

⁴⁹ E eknikane itodong eriar langka gute taklak ina. E mase ma itodong eriar langka gute omur heven ina.

⁵⁰ Sipmi. Ngawai ke umu lang-ane. Pampamu lite ka okur lisak e inarak marau dong lisak tikaranga tipolou okus. E tikaranga tidong ke omur ka Ida Tapolngon plaue kovok kesua wan ka tipolou okus tikaranga tidong ke omur tonari kovok.

⁵¹ Umoklingen. Ngawaiki ngawai ke umu ke pelengon ka oglou itosep iteile ine kovok. Pelengon tonari langane. Ma ite leklou itemete kovok. E ite ka pula keniye pampamu lite ma tilumus tipolou oku.

⁵² Elio langane ma polou suong langka amtada nevlik aling kene alo ka kuliep wai ke oklou ka Ida Tapolngon rere ma wan ka pula keniye yagos ine. Kuliep ma wai e osep ka timete kodong ma tipoga titito ke inarak denga e ma tipolou yagos blang kovok. E ite ka itemete dau kovok ma pampamu lite tilumus tipolou oku.

⁵³ Pampamu lite ka tipolou okus ma tilumus tipolou oku e ma tikaranga tipolou okus blang kovok. E pampamu lite ka timete ma tilumus tipolou oku ma tikaranga timete blang kovok.

⁵⁴ Alo ari pampamu lite ka tipolou okus ma tilumus tipolou oku e tikaranga tipolou okus blang kovok. E pampamu lite ka timete ma tilumus tipolou oku e tikaranga timete blang kovok. Deka Ida Tapolngon ila pelengon ka wai langane ma polou lokono. “Ida Tapolngon mole mete-ngen lokono deka metengen yagos.

⁵⁵ Deka elio ka metengen mole ite ma yagos. E metengen ka ka-ranga due agegeng ke ite ila arit yagos.”

⁵⁶ Metengen karanga due agegeng ke ite kesua itodue elio epmes ina. E elio epmes ina due ila arit ke Moses ila sogongon.

⁵⁷ E Ida Tapolngon lua ite ma itomole metengen kesua batne ke Ida Puda Yesus Krais ila arit dong ke ite. Deka itakakai Ida Tapolngon angaine tito la egim ine.

⁵⁸ E langane. Sipmi. Ma umo-dong dagar ke Ida Tapolngon ila elio e aitno lumu orwo ine sakam. Umodong umoboko dagar ke Ida Puda ila bokongon vala. Kesua Ida Puda ila bokongon ka umodue ma la adai kovok. Aurou. Ma dong vala kesua bokongon tonari Ida Puda ila bokongon.