1 Korin 14 - Aria New Testament

Elio ka itanapapra Ida Tapolngon ila pelengon

¹ E aitno lumu dagar ma umu lana umu ke osep. E ma aitno lumu itau lokono ma umodue kerengen ke Ano Itau. E kerengen ka mgongon ina ka ngawaiki umodue ane kerengen ka umanapapra Ida Tapolngon ila pelengon ke osep.

² Iteile langka osep tiwai tokples gesa ka tile ine kovok tiwai pelengon tonari ke osep kovok. Aurou. Tiwai ke Ida Tapolngon vala kesua osep leklou tikaranga tile pelengon ka tiwai ine kovok. Tiwai Ida Tapolngon Ano Itau ila pelengon ka kukwop.

³ E osep ka tinapapra Ida Tapolngon ila pelengon ma urok pelengon due osep aitno lisak dagar lokono e sruk aitno lisak ma tidue elio itau e due aitno lisak itau.

⁴ Gute ka wai tokples gesa ka iye ile ine kovok ane langka due iye tona aitno dagar vala. E osep ka tinapapra Ida Tapolngon ila pelengon ma urok pelengon due Yesus ila osep aitno lisak dagar lokono.

⁵ Ngawaiki ma umu ka pula keniye umawai tokples bitna bitna ka umeile ine kovok. E dau aitno lungong itau lokono ma umanapapra Ida Tapolngon ila pelengon. Gute gesa ka napapra Ida Tapolngon ila pelengon iye mole gute ka wai tokples gesa ka iye ile ine kovok lama gute gesa dong ka karanga bauluk tokples tonari. Ma Yesus ila osep aitno lisak tipolou dagar lokono.

⁶ Sipmi. Ma umeile umu itau ke pelengon ane. Langka ngame ke umu e ngawai ke umu ke tokples gesa ka umeile ine kovok lange ma ngalua umu? Langka ngawaiki ngalua umu ma ngawai ke umu ke Ida Tapolngon ila pelengon ka iye nis ngong ine koke ngakar ilengen itau ke umu koke nganapapra Ida Tapolngon ila pelengon ke umu koke ngaparere umu.

⁷ Ane eriar langka iteklingen wan bitna bitna ka langka piloli e gita. Langka tiwai osuk kovok ma itakaranga iteile ke sakul ka tidue kovok.

⁸ E langka kuliep wai osuk kovok osep ma timosi evlei ina wan bitna bitna kovok.

⁹ Umu blang langane. Langka umawai tokples bitna bitna ka osep tile ine kovok lange ma tile pelengon tonari lana ine? Ane langka lumu pelengon la adai vala.

¹⁰ Tokples bitna bitna tidong ke taklak e isak kene kene lana ine dong lisak.

¹¹ E langka ngaile gute gesa ila tokples kovok ma aitno mter lou omur batne omur silang. Deka ngong blang aitno lungong mter langka gute tonari ila omur batne omur silang blang.

¹² Ngaile aitno lumu itau lokono ma umodue kerengen ke Ano Itau. Deka umoboko dagar ma umodue kerengen ka ma due Yesus ila osep tivri dagar.

Tokples bitna bitna

¹³ E gute ka wai tokples gesa ka osep tile ine kovok ma iye pmi Ida Tapolngon ma iye lua iye ma iye karanga bauluk tokples tonari.

¹⁴ Aitno lumu mter langane. Langka ngawai itau ke tokples ka ngaile ine kovok are langka anngong wai itau e aitno lungong dong adai vala.

¹⁵ Deka ma ngadue sua? Ma ngawai itau ke anngong e ngawai itau ke aitno lungong blang. E ma ngadue sakul ke anngong e ngadue sakul ke aitno lungong blang.

¹⁶ Deka langka umawai tokples gesa ka osep tile ine kovok e umawai ke Ida Tapolngon langka aitno lumu itau ke wan gesa. E langka gute gesa dong e iye ile tokples ka umawai ine kovok lange ma iye ile langka umawai aitno lumu itau ke Ida Tapolngon ke wan gesa e iye karanga wai lokono ke lem pelengon? Kesua iye ile ke pelengon ka umawai ine kovok.

¹⁷ E umawai aitno lumu itau ke wan gesa e elio langane ma due lumu aten aitno dagar kovok.

¹⁸ Aitno lungong itau ke Ida Tapolngon kesua ngawai pula ke tokples bitna bitna ka osep tile ine kovok e ngamole umu lokono ke elio langane.

¹⁹ E alo ka Yesus ila osep tiduni pulu ke duningen e langka ngawai pelengon sasi boto ka osep tikaranga tile ine e ngaparere isak ane itau. E langka ngawai pelengon pula pula ke tokples ka tile ine kovok ane ma lua isak kovok.

²⁰ Sipmi. Aitno lumu mter ke elio pula langka agau aitno lisak mter ine kovok. E ke aitno lumu umodong langka osep ngongle. E umodong langka agau aren aren ke elio bitna bitna ka soulu.

²¹ Moses ila sogongon wai langane. “Ida Puda wai langane. ‘Ma ngadue osep ka tiwai tokples leklou ma tiwai ke lou osep. Ngadue langane e dau lou osep ma tiklingen lou pelengon kovok.’”

²² E elio ka gute wai tokples bitna bitna ka osep tile ine kovok nis Ida Tapolngon ila arit ke osep epmes ina e la ke Ida Tapolngon ila osep kovok. E elio ka itanapapra Ida Tapolngon ila pelengon nis ila arit ke ite e la ke osep epmes ina kovok.

²³ Deka langka osep ka pula keniye tiduni pulu ke duningen e umu ka pula keniye umawai tokples bitna bitna ka osep tile ine kovok deka osep leklou ka aitno lisak dagar ke Yesus kovok tisep ma tiwai langane. “Umu manga manga.”

²⁴ E langka umu keniye umanapapra Ida Tapol-ngon ila pelengon e gute gesa ka aitno dagar ke Yesus kovok koke gute ka dong ke dogur sep ke lumu duningen deka lumu pelengon ma mter gute tonari aitno langane. Ma iye ile ila elio epmes ina munu pes iye.

²⁵ E ila elio soulu ka dong kukwop ke aitno ma polou malak. Deka iye ma grum kamla e due otuk ine duru ke taklak e ma lotuim Ida Tapolngon. Deka iye ma wai malak langane. “Ngaile omur Ida Tapolngon dong kap umu.”

Itodue elio itau ke udo duningen

²⁶ Sipmi. Alo ka umoduni pulu ke duningen ma umodue sua? Ma umodue elio bitna bitna ka itau ka tilua umu vala. Gute kene due sakul e gute silang wai pelengon ka parere osep leklou e gute silang wai pelengon ka Ida Tapolngon nis iye ine ma iye napapra ine. E gute silang wai tokples gesa ka osep tile ine kovok e gute silang bauluk tokples tonari. Deka wan ka umodue ma due Yesus ila osep aitno lisak tidong dagar.

²⁷ E langka osep leklou tiwai tokples bitna bitna ka osep tile ine kovok deka osep orwo koke eklu vala ma tikaranga tiwai. E tikaranga tidue pelengon ke aling kene kovok. Aurou. Gute kene ma wai mgo deka gute silang wai batne. E gute silang ma bauluk urok pelengon tonari.

²⁸ E langka gute gesa dong ka karanga bauluk urok pelengon kovok deka osep ka tiwai tokples bitna bitna ka osep tile ine kovok ma tiwai kovok. Ma tiwai ke aitno lisak e ke Ida Tapolngon vala.

²⁹ E ma osep orwo koke eklu tinapapra Ida Tapolngon ila pelengon ke osep pula. E osep leklou ma tiwade urok pelengon.

³⁰ E langka Ida Tapolngon nis gute kene ke pelengon gesa deka gute ka vri e wai ma iye dong e wai kovok.

³¹ Umu kenmu kenmu umakaranga umanapapra kene kene ma osep ka pula keniye tidue ilengen ma tipolou dagar.

³² Osep ka tinapapra Ida Tapolngon ila pelengon ma tiplau isak e urok pelengon itau.

^33-34 Ida Tapolngon ma due wan bitna bitna ulik ulik kovok. Iye waiki ma ite ka pula keniye aitno lite itau pulu. Alo ka Yesus ila osep tiduni pulu ke duningen apmang ma tiwai kovok. Ma tidong vala. Yesus ila osep ka tiduni pulu ke omur omur tidue langane. E apmang ma plau duningen kovok. Kesua Moses ila sogongon wai ine.

³⁵ E langka tiwaiki tile ke pelengon gesa batne e lana ine ma tipmi urok soboget ine ke urok ninu. E langka apmang tiwai pelengon alo ka Yesus ila osep tiduni pulu ke duningen ane langka tidue elio soulu.

³⁶ Ina lange? Ida Tapolngon ila pelengon ina poloungon batne dong ke umu? Umu tona umodue Ida Tapolngon ila pelengon vala e osep leklou kovok?

³⁷ Langka gute gesa aitno mter langka Ida Tapolngon rere iye gute napaprangan ina koke aitno mter langka iye due kerengen ke Ano Itau ngawaiki iye ile langane. Pelengon ka ngasogoe ke umu ane Ida Puda ila pelengon.

³⁸ E langka gute gesa aitno kene ke pelengon ane kovok deka aitno lumu mter langka iye gute napaprangan ina kovok.

³⁹ Sipmi. Aitno lumu itau lokono ma umanapapra Ida Tapolngon ila pelengon. E langka osep leklou tiwai tokples bitna bitna ka osep tile ine kovok ma umadangdang isak ine kovok.

⁴⁰ E ma umedidi elio itau ke lumu duningen vala.