1 Korin 13 - Aria New Testament

Ite lana ite ke osep ka pula keniye

¹ Elio tonari langane. Langka ngawai ke tokples bitna bitna e ke ensel urok pelengon e dau ngong lana ngong ke osep kovok elio langane bitna langka ngong langka belo ka wai omba adai vala e langka kude ka wai adai.

² E langka ngakaranga nganapapra Ida Tapolngon ila pelengon e ngaile Ida Tapolngon ila pelengon ka kukwop e ngaile ilengen bitna bitna keniye blang. E langka aitno lungong ila dagar omba lokono ma ngakaranga ngadue gigri yari la ke omur silang. E dau ngong lana ngong ke osep kovok ngong langka wan adai vala.

³ E langka ngakar lou wan keniye ke osep ka urok wan isuk boto vala e langka ngasongon osep tidue agegeng ke pampamu lungong. Langka ngadue langane e dau ngong lana ngong ke osep kovok lou elio bitna bitna karanga lua ngong kovok.

⁴ Gute ka lana iye ke osep leklou ma aitno engil suong kovok e ma koli osep urok elio soulu ka tidue ke iye kovok. Ma iye due mada ke isak. Ma aitno rim ke osep kovok. Ma iye kakai iye tona angaine kovok e ma aitno vri ke iye kovok.

⁵ Ma iye due elio soulu ke osep kovok. Ma iye omsu kovok. Aurou. Iye due tovro ke osep. Ma aitno nevlik paide kovok. Ma aitno la ke elio soulu ka osep tidue ke iye kovok.

⁶ Ma aitno itau ke elio soulu kovok. Aurou. Aitno itau ke elio itau vala.

⁷ Gute ka lana iye ke osep leklou io wan gesa karanga mole iye kovok. Aling aling aitno dagar ke Ida Tapolngon e iye para ma elio itau polou ke iye. E alo ka elio polou ka opru iye ma iye vri dagar ine.

⁸ Elio ka ite lana ite ke osep leklou karanga polou yagos kovok. E elio ka itanapapra Ida Tapolngon ila pelengon ma polou yagos. E tokples bitna bitna ma tipolou yagos blang. E osep urok ilengen bitna bitna ma polou yagos blang.

⁹ Eknikane iteile ke wan bitna bitna emkil emkil vala. E itanapapra Ida Tapolngon ila pelengon emkil emkil vala.

¹⁰ Mase alo ka wan lokono polou deka wan ka emkil emkil ka eknikane tidong ma tipolou yagos.

¹¹ Ane eriar langka mimi ka polou omba. Alo ka ngong dau ngadong mimi daudeng boto lou pelengon langka agau urok pelengon. E aitno lungong mter ke elio langka agau aitno lisak mter ine. E ngawade ke elio bitna bitna langka agau tiwade ine. E alo ka ngapolou gute ngongle kodong ngasongon elio langka agau tidue e ngadue elio ka osep ngongle tidue.

¹² E eknikane iteile emkil emkil ke Ida Tapolngon ila elio. Eriar langka itavati amtada ke glas ka itavati ite malak ine kovok e itavati langka rurut. E mase ma ite e Ida Tapolngon itavati amtada pulu e ma iteile lokono ke iye eriar langka eknikane iye ile ke ite.

¹³ E eknikane elio eklu tidong. Elio ka aitno lite ila dagar dong dagar ke Ida Tapolngon e elio ka itapara ke Ida Tapolngon ma iye due elio itau ke ite e elio ka ite lana ite ke osep leklou. Elio eklu tonari tidong vala. E elio ka mgongon lokono iye elio ka ite lana ite ke osep leklou.