1 Korin 12 - Aria New Testament

Ano Itau lua ite ke ila kerengen

¹ Sipmi. Ngawaiki umeile omur ke Ano Itau ila kerengen deka ngawai ke umu ine.

² Umeile kodong alo ka umeile ke Ida Tapolngon kovok wan gesa nak umu e umedidi sapingen ka karanga wai kovok.

³ Deka ngawaiki ma aitno lumu la ke pelengon kene langane. Langka Ida Tapolngon Ano Itau dong ke gute gesa aitno gute tonari karanga wai pelengon soulu ke Yesus kovok. E gute ka Ida Tapolngon Ano Itau dong ke iye kovok karanga wai langane kovok. “Yesus iye Ngau Puda.”

⁴ Ida Tapolngon ila kerengen bitna bitna tidong e Ida Tapolngon Ano Itau kene vala.

⁵ E ma itodue Ida Puda ila bokongon bitna bitna e Ida Puda kene vala dong.

⁶ Wan bitna bitna ka tipolou ke bokongon tonari dong e Ida Tapolngon kene vala dong ka kar ila osep urok elio isuk isuk ma tikaranga tidue ila bokongon.

⁷ Ida Tapolngon Ano Itau kar ila arit ke ila osep kene kene ma tilua osep leklou ine.

⁸ Ke gute gesa Ano Itau kere iye ma ile omur ke elio itau deka iye lua osep leklou ine. E ke gute silang Ano Itau kere iye ke ilengen ke elio ka iye kere Ida Tapolngon ila pelengon lana ine ke osep.

⁹ E ke gute silang Ano Itau due aitno ila dagar polou dagar lokono. E Ano Itau kere gute silang ma iye karanga lua osep ka tipaia ma tipolou itau blang.

¹⁰ E gute silang due arit ma iye due elio arit ina ine. E Ano Itau kere gute silang ma iye napapra Ida Tapolngon ila pelengon ke osep. E gute silang due ilengen ma wade langka kerengen gesa polou ke Ano Itau koke aurou. E gute silang due ilengen ma iye wai tokples ka iye ile ine kovok. E gute silang due ilengen ma iye bauluk tokples tonari.

¹¹ Ano Itau kene ka dong ari due kerengen ka pula keniye tonari. Iye tona didi aitno e kere osep kene kene ke kerengen ka iye waiki dong ke isak.

Itosep Kristen ite Krais pampamu ine ongwa ine

¹² Gute pampamu ine kene vala e ongwa ine pula. Gute ongwa ine pula e dau pampamu ine kene vala. E Krais blang dong langane.

¹³ Kesua Ano Itau ka kene vala sep ke ite kente kente aitno lite e due ite iteneklep ke Krais deka itopolou langka pampamu ine ka kene vala. Ite ka osep Yuda ina e osep Grik ina e ite ka wokboi nating e ite ka itodong fri. Ida Tapolngon due Ano Itau ka kene vala sep ke ite kente kente aitno lite deka iye dong ine.

¹⁴ Iteile gute pampamu ine kene vala. E dau ongwa ine pula tidong.

¹⁵ Langka kamla wai langane. “Ngong limla kovok deka ngong langka pampamu ine emkil kovok.” Langka iye wai langane iye dau dong pampamu ine emkil.

¹⁶ E langka tala wai langane blang. “Ngong bitna kovok deka ngong pampamu ine emkil kovok.” Langka iye wai langane iye dau dong pampamu ine emkil.

¹⁷ Langka pampamu ine ongwa ine keniye langka bitna vala deka lange ma iye klingen pelengon? Langka pampamu ine ongwa ine keniye langka tala vala deka lange ma iye kun wan?

¹⁸ E pampamu lite langane kovok. Aurou. Ida Tapolngon due pampamu lite ongwa ine bitna bitna tidong langka pampamu ine kene vala langka aitno itau ine.

¹⁹ Langka pampamu lite emkil kene vala dong ane langka pampamu lite lokono kovok.

²⁰ E pampamu lite langane kovok. Aurou. Pampamu lite ongwa ine pula tidong e isak langka pampamu lite kene vala.

²¹ Deka bitna karanga wai ke limla langane kovok. “Langka wom omdong kovok ma ngong vala ngadong itau.” E apna blang karanga wai ke kamla langane kovok. “Langka wom omdong kovok ngong vala ma ngadong itau.” Aurou.

²² Langka pampamu lite ongwa ine kene gesa dong kovok ma soulu ke ite.

²³ E ongwa lite ka aitno lite mter langka isak wan gesa kovok ma itekere isak itau. E ongwa lite ka langka ite mnak ite ke isak ma itakading isak itau lokono.

²⁴ E ongwa lite leklou blang ka ite mnak ite ke isak kovok ma itodue isak tidong adai. Ida Tapolngon due ongwa lite bitna bitna ka pula keniye tidong langka pampamu ine ka kene vala. E ongwa lite leklou ka aitno lite mter langka isak omba kovok isak wan omba lokono.

²⁵ Iye due langane ma pampamu lite tikaranga tituktuk tipolou emkil emkil kovok. E pampamu lite ongwa ine kene kene ma plau ongwa ine leklou pulu e lua isak eriar.

²⁶ Deka langka pampamu lite ongwa ine gesa doro ma ongwa lite ka pula keniye isak doro blang. E langka ongwa lite gesa neser ma ongwa lite ka pula keniye neser kape.

²⁷ Deka umu ka pula keniye umodong langka Krais pampamu ine e umu kene kene umodong langka Krais pam-pamu ine ongwa ine.

²⁸ E Ida Tapolngon rere Yesus ila osep urok bokongon langane. Osep ka tidue ila bokongon mgo isak osep aposel e orwo ina isak osep napaprangan ina e eklu ina isak osep parerengen ina. E silang blang osep leklou ka tidue elio arit ina. E osep leklou blang ka tilua osep ka tipaia ma tipolou itau blang e osep ka tilua osep leklou blang. E osep leklou ma tiplau osep pula e osep leklou ka tiwai tokples bitna bitna ka tile ine kovok.

²⁹ Deka lange? Osep keniye isak osep aposel? Osep keniye isak osep napaprangan ina? Osep keniye isak osep parerengen ina? Osep keniye tidue elio arit ina?

³⁰ Osep keniye tilua osep ka tipaia deka paiangan tonari yagos? Osep keniye tiwai tokples bitna bitna ka tile ine kovok? Osep keniye tikaranga tibauluk tokples tonari? Aurou. Isak kensak kensak urok kerengen dong ke isak.

³¹ E dau aitno lumu dagar ma umodue kerengen ka mgo ke Ano Itau ila kerengen. E ngawaiki ngawai ke umu ke elio kene ka mgongon ina lokono.