1 Korin 1 - Aria New Testament

Pelengon ane la ke osep Korin ina

¹ Ngong Pol ka Ida Tapolngon didi aitno e rere ngong Krais Yesus ila aposel gesa. Ngong imorwo udo aten Sostenes imosogo pas ane.

² Imosogo pas ane uti la ke umu ka Yesus ila osep ka umodong ke Korin. Ida Tapolngon rere umu ka umeneklep ke Krais Yesus ila osep ka itau lokono. Ida Tapolngon rere umu kap osep keniye ka aitno lisak la dagar ke Ida Puda Yesus Krais e ka tiwai itau ke iye ma umu ila osep ka itau lokono.

³ Ngawaiki Pmada ka Ida Tapolngon e Ida Puda Yesus Krais timakai umu e tidue aitno lumu epen.

Pol wai itau ke Ida Tapolngon

⁴ Aling pula ngawai itau ke Ida Tapolngon ke umu. Ngawai itau ke iye kesua iye makai umu itau ke ila makaingan batne Yesus Krais dong.

⁵ Ngawai itau ke Ida Tapolngon kesua umeneklep ke Krais kodong e iye kere umu itau. Iye kere umu deka umanapapra ila pelengon itau e umeile omur ke wan bitna bitna itau.

⁶ Imanapapra Ida Tapolngon ila omon ka la ke Krais ke umu deka umoklingen ine. Umoklingen ine deka aitno lumu la dagar lokono ine.

⁷ ­Deka Ida Tapolngon Ano Itau lua umu ke Ida Tapolngon ila kerengen keniye ka iye lua ila osep ine. E kerengen gesa dong kovok ka iye lua umu ine dau kovok. Umodong itau e umapara ke alo ka Ida Puda Yesus Krais ma polou ke omtomu.

⁸ Ma Ida Puda due aitno lumu ma aitno lumu dong dagar la lama oklou ka iye ma iding blang. Deka ke alo ari ma Ida Puda Yesus Krais vati elio gesa vri ke ite kovok.

⁹ E langane. Ida Tapolngon rere ite ma iteneklep ke Otno Arang Yesus Krais ka Ida Puda. Deka iye due ite iteneklep ke iye. Kesua iye tona didi ila pelengon keniye deka due polou lokono.

Ida Tapolngon ila osep aitno lisak kene pulu kovok

¹⁰ Sipmi. Ida Puda Yesus Krais iye kene deka ngawai ke umu langane. Ngawai ma aitno lumu kene pulu ke pelengon kene. Ma aitno lumu mter ke elio kene e ma lumu pelengon kene. Ma umadardar ke elio bitna bitna sakam.

¹¹ Sipmi. Ngawai ke umu langane kesua osep leklou ka isak apmang Kloe ila osua tipalongo lou ke lumu elio soulu. Tiwai umotuk opmu pulu ke pelengon gesa.

¹² Umotuk opmu pulu ke pelengon deka umu leklou umawai langane. “Ngadidi gute Pol.” E gute silang wai langane. “Ngadidi gute Apolos.” E gute silang blang wai langane. “Ngadidi gute Pita.” E gute silang blang wai langane. “Ngadidi Krais.”

¹³ Aisudo. Lange? Krais tuktuk polou pula? Aitno lumu lange? Ngong Pol ngamana ke ngau akai e ngamete ine ma ngalua umu? Koke umedidi elio paunimngen ina ke angain ngong? Oo. Langane kovok.

^14-15 Ngong kenngong ngapaunim osep pula kovok. Ngapaunim osep awal boto vala langka Krispus e Gaius. E ngawai tenkyu ke Ida Tapolngon ine. Lama osep leklou tiwai ngapaunim isak ke angain ngong.

¹⁶ Ai omtongu sisir. Ngapaunim Stefanas kap ila osua blang. E langka ngapaunim osep leklou blang koke aurou omtongu uli ine. Deka ngaile ine kovok.

¹⁷ Krais pagei ngong ma ngapaunim osep kovok. Aurou. Iye pagei ngong ke osep ma nganapapra Ida Tapolngon ila omon itau ke isak. E ngadidi ilengen ke taklak ina deka nganapapra ine kovok lama osep aitno lisak mter ke Krais ina metengen ke ina akai kovok.

Krais iye Ida Tapolngon ila arit ka itau

¹⁸ E langane. Osep epmes ina urok elio vri ke isak e aitno lisak mter Krais ina metengen langka wan adai. E osep ka Ida Tapolngon lua isak tile elio tonari Ida Tapolngon ila arit ka lua isak.

¹⁹ Osep ka tisogo Ida Tapolngon ila pelengon tisogo langane. “Ma ngapaiavu osep ka isak osep ka tile omur ke wan ka taklak ina urok ilengen. Ma ngapaiavu osep ka aitno lisak mter tile itau e tilege itau ke ilengen bitna bitna urok ilengen. Ma ngapaiavu osep tonari urok ilengen.”

²⁰ ­Deka ma osep ka urok ilengen ombatno tiusine? E osep ka tile omur ke Moses ila sogongon ma tiusine? E osep ka tididi ilengen ka taklak ina deka urok pelengon kalaila ma tiusine? Kesua Ida Tapolngon nis itosep ilengen ka taklak ina wan adai vala.

²¹ Ida Tapolngon ile omur ke wan bitna bitna deka ila ilengen ombatno lokono. E iye didi ila ilengen tonari e dangdang osep ke elio ka tididi aitno lisak ma tile omur ke iye. Imanapapra Ida Tapolngon ila pelengon ke osep e Ida Tapolngon aitno itau ma iye lua osep ka aitno lisak la dagar ke iye ke urok elio epmes ina. E osep ka tididi aitno lisak tiwai pelengon ka imanapapra ine iye pelengon adai vala.

²² Langka osep Yuda ina tiwaiki tivati elio arit ina ka nisngen. E langka osep Grik ina tiwaiki tidue ilengen bitna bitna.

²³ E imanapapra pelengon kene ka la ke Krais ina metengen ke ina akai. Deka pelengon ka imanapapra ine due osep Yuda ina aitno lisak soulu e due osep Grik ina ma tiwai pelengon tonari pelengon adai vala.

²⁴ E osep ka Ida Tapolngon rere isak ila osep aitno lisak langane kovok. Osep Yuda ina e osep Grik ina ka Ida Tapolngon rere isak ila osep tile pelengon tonari la ke Krais e Ida Tapolngon ila arit e ila ilengen dong ine.

²⁵ E Ida Tapolngon ila ilengen ka osep leklou tiwai wan adai mole osep ka pula keniye urok ilengen. E Ida Tapolngon ila arit ka osep tiwai dong ke iye kovok ila arit mole osep ka pula keniye urok arit.

²⁶ Sipmi. Omtomu sisir ke lumu mosongon ka oglou ina. Alo ka Ida Tapolngon rere umu ila osep iye due langane. Iye rere osep pula ka urok ilengen ombatno ila osep isak kovok. E iye rere osep pula ka urok arit dong ke isak ila osep isak kovok. E iye rere osep pula ka angainsak omba ila osep isak kovok. Iye rere osep awal boto vala ke osep tonari ka tidong langane ma isak ila osep.

²⁷ Osep pula aitno lisak soulu ke osep ka Ida Tapolngon rere isak ila osep. Ida Tapolngon rere ila osep tonari ma timole osep ka aitno lisak mter tile omur ke ilengen ka taklak ina. Deka ma isak mnak isak ke Ida Tapolngon ila osep. Iye rere ila osep ma timole osep ka tiwaiki urok arit dong ke isak. Kesua ma ila osep tidue osep pula isak kensak kensak isak mnak isak ine.

²⁸ Ida Tapolngon rere osep ka langane ma isak ila osep. Osep ka angainsak omba kovok e osep leklou ka aitno lisak soulu ke isak e tivati isak langka wan adai vala. Ida Tapolngon rere osep ka langane kesua iye waiki osep ka pula keniye tile osep ka isak kensak kensak aitno lisak itau ke isak tidong langka wan adai.

²⁹ Ida Tapolngon due elio langane deka osep ka pula tikaranga tikakai angainsak ke Ida Tapolngon bitna kovok.

³⁰ E Ida Tapolngon due umu umeneklep ke Krais Yesus. E Krais tona udo ilengen ka itau batne. Krais due ite itopolou itau e osuk ke Ida Tapolngon bitna. Iye due ite itopolou Ida Tapolngon ila osep ka itau lokono. Deka udo elio epmes ina munu pes ite kovok.

³¹ Ida Tapolngon lua ite itau lokono ke Krais. E iye waiki ma itedidi ila pelengon ka oglou osep leklou tisogo ine ka wai langane. “Gute ka waiki aitno itau ke elio gesa ma iye kakai Ida Puda angaine tito la egim. Kesua batne ke ila elio itau ka iye lua ite ine.”