1 Jon 5 - Aria New Testament

Ida Tapolngon ila osep timole elio bitna bitna ka taklak ina

¹ Osep ka aitno lisak dagar ke elio ka Yesus iye gute Krais ka Ida Tapolngon rere ma iye lua osep ke urok elio epmes ina isak Ida Tapolngon ila osep. E osep ka isak lana isak ke gute timla isak lana isak ke gute tonari blang.

² Langka ite lana ite ke Ida Tapolngon e iteini ila pelengon dagar deka elio tonari nisngen langane. Ite lana ite ke titno blang.

³ Langka ite lana ite ke Ida Tapolngon ma iteini ila pelengon dagar. E ila pelengon dagar opru ite kovok.

⁴ Osep ka isak Ida Tapolngon ila osep timole elio bitna bitna ka taklak ina. Aitno lite ila dagar mole elio bitna bitna ka taklak ina.

⁵ Osep seisei timole elio bitna bitna ka taklak ina? Osep ka aitno lisak dagar ke Yesus e tile iye Ida Tapolngon Otno Arang isak osep ka timole elio bitna bitna ka taklak ina.

Ida Tapolngon nis ite malak ke Yesus

⁶ Yesus Krais me dong ke taklak e osep tipaunim iye ke aki. Mase iye mana ke ina akai e ina marau baser. Alo ka iye me osep tipaunim iye vala kovok. Aurou. Iye mete e ina marau baser blang.

⁷ Ano Itau ka iye pelengon lokono batne palongo udo elio ane lokono.

⁸ Wan eklu tipalongo udo ke Yesus. Ano Itau palongo udo e aki ka paunimngen ina palongo udo e ina marau ka baser palongo udo. E isak eklu tonari isak langka pelengon kene vala.

⁹ Alo ka gute gesa wai ke ite ke wan gesa aitno lite la dagar ke ila pelengon. E pelengon ka Ida Tapolngon wai ine mole osep urok pelengon. E pelengon ka Ida Tapolngon wai ine kodong la ke Otno Arang.

¹⁰ Langka gute gesa aitno dagar ke Ida Tapolngon Otno Arang deka Ida Tapolngon ila pelengon dong ke aitno. E langka gute aitno dagar ke Ida Tapolngon ila pelengon kovok ane langka iye sir Ida Tapolngon gute yakngan ina. Kesua aitno dagar ke pelengon ka Ida Tapolngon wai ine ka la ke Otno Arang kovok.

¹¹ Pelengon tonari langane. Ida Tapolngon kar mosongon ka dong vala dong ke ite e mosongon tonari batne ke Otno Arang.

¹² Deka langane. Gute ka neklep ke Otno Arang due mosongon tonari. E gute ka neklep ke Otno Arang kovok due mosongon tonari kovok.

Udo mosongon dong vala dong

¹³ Ngasogo pelengon ane uti ke umu ka aitno lumu dagar ke Ida Tapolngon Otno Arang ma umeile omur langane. Aitno lumu dagar ke iye deka umodue mosongon ka dong vala dong.

¹⁴ E iteile omur langane. Alo ka itepmi Ida Tapolngon ke wan ka didi aitno ma iye kare ke ite.

¹⁵ E iteile langane. Alo ka itepmi iye ke wan gesa iye klingen udo pmingen deka ma iye kar wan ka itepmi iye ine ke ite.

¹⁶ Langka gute gesa vati ila aten due elio epmes ina e elio epmes ina tonari due gute tonari mete kovok ma iye wai itau ke Ida Tapolngon ine ma gute tonari mete kovok. Lou pelengon ane la ke osep ka tidue elio epmes ina ka timete ine kovok. Aurou. E osep leklou tidue elio epmes ina ka timete ine e ngawai ma umawai itau ke isak kovok.

¹⁷ Elio soulu bitna bitna isak keniye elio epmes ina. E dau elio soulu leklou dong ka osep tidue e timete ine kovok.

¹⁸ Iteile omur langane. Osep ka isak Ida Tapolngon ila osep tidue elio epmes ina aling aling kovok. Kesua Ida Tapolngon Otno Arang kis isak e plau isak itau e Satan karanga due elio soulu ke isak kovok.

¹⁹ E silang blang langane. Iteile Ida Tapolngon ila osep ite e dau Satan ila arit plau osep ka pula keniye ka taklak ina.

²⁰ Iteile Ida Tapolngon Otno Arang duru me ke taklak e kar ilengen ke ite ma itakaranga iteile Ida Tapolngon ka lokono. E itodong kap iye ka lokono e itodong kap Otno Arang Yesus Krais. Ida Tapolngon iye tona Tapolngon ka lokono e itodue mosongon ka dong vala dong batne ke iye.

²¹ Lou mimi daudeng ngawai ke umu langane. Umaplau umu itau ke tapolngon yakngan ina.