1 Jon 4 - Aria New Testament

Ma itawade osep urok pelengon

¹ Sipmi. Ngong lana ngong ke umu e ngawai ke umu langane. Osep napaprangan yakngan ina tidong ke taklak. E langka gute gesa wai ke umu langane. “Ngawai ke Ano Itau ila pelengon.” Deka umawade ila pelengon ma umeile omur langka ila pelengon ka iye wai batne ke Ida Tapolngon koke aurou.

² Umoklingen. Osep ka tiwai Yesus Krais duru ke taklak e polou langka itosep urok pelengon ina poloungon batne ke Ida Tapolngon.

³ E osep ka tiwai Yesus duru ke taklak e polou langka itosep kovok tiyakyak. Time ke Ida Tapolngon kovok. Time ke Krais ina oul kene ina ka umoklingen ma iye me. E oku ane iye me polou ke taklak kodong.

⁴ Lou mimi daudeng. Umu Ida Tapolngon ila osep e umomole osep napaprangan yakngan ina kodong. Kesua Ano Itau ka dong ke aitno lumu mole ano ka dong ke osep ka taklak ina.

⁵ Osep napaprangan yakngan ina urok poloungon batne ke taklak e tiwai pelengon ka taklak ina deka osep taklak ina tiklingen urok pelengon.

⁶ E ite Ida Tapolngon ila osep ite. Gute ka ile Ida Tapolngon ma klingen udo pelengon e gute ka ile Ida Tapolngon kovok ma klingen udo pelengon kovok. Ke batne langane itakaranga iteile omur ke osep ka tididi Ano Itau ila pelengon e osep ka tididi osep napaprangan yakngan ina urok pelengon.

Ma ite lana ite pulu

⁷ Sipmi. Ngong lana ngong ke umu e ngawai langane. Ite lana ite pulu kesua elio ane ina poloungon batne ke Ida Tapolngon. Osep ka isak lana isak ke osep leklou tidue langane kesua isak Ida Tapolngon ila osep e tile iye.

⁸ Gute ka iye lana iye ke osep leklou kovok iye ile Ida Tapolngon kovok kesua Ida Tapolngon ila elio langane. Iye lana iye ke osep.

⁹ Ida Tapolngon nis ite malak iye lana iye ke osep ke elio langane. Iye pagei Otno Arang ka kene vala me ke taklak ma itodue mosongon ka itau lokono batne ke iye.

¹⁰ Ida Tapolngon lana iye ke ite lokono va. E ite lana ite ke Ida Tapolngon mgo kovok. Aurou. Iye lana iye ke ite mgo deka pagei Otno Arang duru ke taklak ma kli udo elio epmes ina.

¹¹ Sipmi. Ngong lana ngong ke umu e ngawai ke umu langane. Ma ite lana ite ke osep leklou kesua Ida Tapolngon lana iye omba ke ite.

¹² Gute gesa vati Ida Tapolngon kovok. E langka ite lana ite pulu Ida Tapolngon dong kap ite e elio ka iye lana iye ke osep polou dagar ke aitno lite.

¹³ Ida Tapolngon kar Ano Itau ke ite kodong e ke batne langane iteile itodong kap iye e iye dong kap ite.

¹⁴ Itavati elio pula ka Pmada due kodong. Iye pagei Otno Arang me ke taklak ma iye lua osep ke urok elio epmes ina. E itapalongo osep ine.

¹⁵ Gute ka wai Yesus iye Ida Tapolngon Otno Arang Ida Tapolngon dong kap iye e iye dong kap Ida Tapolngon.

¹⁶ Deka iteile Ida Tapolngon lana iye ke ite e aitno lite dong dagar ine. Aling aling Ida Tapolngon lana iye ke osep. E osep ka isak lana isak ke osep leklou tidong kap Ida Tapolngon e iye dong kap isak.

¹⁷ Ite lana ite ke osep leklou deka elio tonari res polou omba ke ite. Deka alo ka Ida Tapolngon wade osep ka pula keniye urok elio ma itelim ine kovok. Kesua iteile alo ka itodong ke taklak itodue elio eriar langka Krais due.

¹⁸ Langka ite lana ite ke osep ma itelim kovok. Osep ka tidong dagar ke elio ka isak lana isak ke osep leklou urok elio tonari dangdang elio ka tilim ke wan bitna bitna. Kesua osep ka tilim tidue batne langane. Tilim lama Ida Tapolngon ules isak ke urok elio isuk isuk. E iteile langane. Osep ka tilim tidong dagar ke elio ka isak lana isak ke osep leklou kovok.

¹⁹ Ite lana ite ke osep leklou batne Ida Tapolngon lana iye ke ite mgo.

²⁰ Langka gute gesa wai langane. “Ngong lana ngong ke Ida Tapolngon.” E dau iye lana iye ke ila aten kovok deka iye gute yakngan ina. Kesua langka iye lana iye kovok ke ila aten ka iye karanga vati lange ma iye karanga lana iye ke Ida Tapolngon ka iye karanga vati kovok? Aurou.

²¹ Krais kar pelengon dagar ke ite langane. “Gute ka iye lana iye ke Ida Tapolngon ma iye lana iye ke ila saten blang.”