1 Jon 3 - Aria New Testament

¹ Umoklingen. Pmada lana iye ke ite omba deka sir ite titno. E lokono ite Ida Tapolngon titno ite. Osep ka taklak ina tile Ida Tapolngon kovok e ke batne langane tile ite blang kovok.

² Lou saten. Ngong lana ngong ke umu e ngawai ke umu langane. Oku ane ite Ida Tapolngon titno. E iteile mase ma itodong langka wansua kovok e dau iteile langane. Alo ka Krais me polou ma itodong eriar langka iye kesua ma itavati iye malak deka ma iteile omur ke iye.

³ Osep keniye ka tipara ke alo ka Krais iding me ma tidong itau lokono vala e tidue elio epmes ina kovok langka Krais dong itau lokono e due elio epmes ina kovok.

⁴ Osep ka tidue elio epmes ina are tidar Ida Tapolngon ila pelengon blang. Kesua elio epmes ina iye elio ka osep tidar Ida Tapolngon ila pelengon.

⁵ Umeile omur langane. Krais polou langka itosep ma iye pi udo elio epmes ina la. E elio epmes ina dong ke Krais kovok.

⁶ Gute gesa ka dong kap Krais due elio epmes ina aling aling kovok. E gute ka due elio epmes ina aling aling iye vati Krais kovok e iye ile Krais kovok.

⁷ Lou mimi daudeng. Umaplau umu itau lama osep tiyak umu. Gute ka aling aling iye due elio ka itau e osuk vala dong itau e iye dong osuk ke Ida Tapolngon bitna eriar langka Krais dong itau e osuk.

⁸ E gute ka aling aling iye due elio epmes ina iye Satan ila gute vala. Kesua oglou oglou ari alo ka Ida Tapolngon due wan ka pula keniye tipolou lila me ke eknikane Satan due elio epmes ina. E Ida Tapolngon Otno Arang polou ma iye due pogle ke Satan ila bokongon ma yagos.

⁹ Gute gesa ka Ida Tapolngon due polou ila gute due elio epmes ina aling aling kovok. Kesua Ida Tapolngon ila elio dong ke iye kodong e iye karanga due elio epmes ina aling aling kovok kesua iye Ida Tapolngon ila gute.

¹⁰ Ke batne langane itakaranga iteile osep seisei isak Ida Tapolngon ila osep e osep seisei isak Satan ila osep. Osep ka aling aling tidue elio itau e osuk kovok isak Ida Tapolngon ila osep kovok. E silang blang osep ka isak lana isak ke sisrok kovok isak Ida Tapolngon ila osep kovok blang.

Elio ka ite lana ite ke osep

¹¹ Oglou oglou ari lila me ke oku ane umoklingen pelengon ka langane. “Ma ite lana ite pulu.”

¹² E itodue elio langka oglou gute Kein ka iye Satan ila gute due kovok. Ke oglou Kein due burwa ke ina aiver. Ina lange Kein due burwa ke ina aiver? Iye due burwa ke iye batne langane. Ina aiver ila elio itau e osuk e Kein ila elio soulu.

¹³ Sipmi. Langka osep ka taklak ina aitno lisak soulu e engil ke umu deka umedigrik ine kovok.

¹⁴ Oglou itodong langka osep ka timete e oku ane itodong ke mosongon ka dong vala dong. E iteile itodong ke mosongon tonari kesua ite lana ite ke Ida Tapolngon ila osep. E osep ka isak lana isak ke osep leklou kovok isak dau tidong langka osep ka timete.

¹⁵ Gute gesa ka aitno soulu e engil ke iye sisrok iye langka gute ka due burwa. E umeile gute ka due burwa ke gute silang iye due mosongon ka dong vala dong kovok.

¹⁶ Yesus lana iye ke ite e pli tarna deka mete ma lua ite. E ila elio tonari nis ite ke elio ka ma ite lana ite ke sudo. Ma itepli tarna lite ma itolua osep leklou.

¹⁷ E langka gute gesa dong ka ila wan dong ke iye ka lua iye ke taklak ane. E iye vati ila aten gesa ka wan opru iye kesua ila wan isuk boto vala deka iye pono aitno ke gute tonari. Deka iteile elio ka Ida Tapolngon lana iye ke osep dong ke gute tonari aitno kovok.

¹⁸ Lou mimi daudeng. Itawai ite lana ite ke osep leklou vala kovok. Aurou. Ite lana ite ke osep ke elio isuk isuk ka itodue e ke pelengon ka lokono.

Itodong dagar ke Ida Tapolngon bitna

¹⁹ Langka ite lana ite ke sudo deka iteile omur ite Ida Tapolngon ila osep lokono. Iteile itodong itau ke Ida Tapolngon bitna deka aitno lite mtong ine.

²⁰ E langka aitno lite waiki mulu ite ke elio gesa deka aitno lite mtong ine vala. Aitno lite mtong ine kesua Ida Tapolngon ile wan ka pula keniye ka itodue e iye mole aitno lite.

²¹ Sipmi ka ngong lana ngong ke umu. Langka aitno lite mulu ite kovok deka itakaranga itodong ke Ida Tapolngon bitna e itelim kovok.

²² E langka itepmi Ida Tapolngon ke wan bitna bitna deka iye koli udo pmingen. Iye due langane kesua iteini ke ila pelengon e itodue elio isuk isuk ka aitno itau ine.

²³ E Ida Tapolngon ila pelengon dagar ka me ke ite langane. Aitno lite dagar ke Otno Arang Yesus Krais e ite lana ite pulu langka iye wai ine.

²⁴ Osep ka pula keniye ka tini ke ila pelengon tidong kap iye e iye dong ke aitno lisak. E iye kar Ano Itau ke ite ma iteile omur iye dong ke aitno lite.