TAITUS, 2_1 - Niu Testamen

¹ KAIA koutucua akoi anera o fakairo erefia;

² Pe takou sore fatshigeia erefia niare magane, sekowkata sore, arapakou, totonu ia ta fakarogrogo, ia ta karofa tagata, ia arotorea sefakainina milowa.

³ Fafine sore ma, pe tshare magane totonu hepe amagane erefia ia Atua, jimra acre koutucua afasao korefu ia faruke, secitiafakarafia sore weina, fakairo ane iotshi erefia;

⁴ Pe erefia acre fakairo atumafine amagane totonu arapakou, keicitiafakarafia niare anunwane, keicitiafakarafia niare erecricki,

⁵ Arapakou, maganerefia, keinofo ia niare umrai, erefia, fakarogona afasao o niare anunwane, pe tafasao o Atua sefasosa tapu iateia.

⁶ Foci fakairo atumtane erefia niare afenagaro totonu.

⁷ Ia ane iotshi fakeriake acre akoi magane totonu erefia i avere iotshi erefia; ia fakairo sekoutucua safi, aroto semama ia kowkata, sefakamana,

⁸ I afasao totonu komari erefia, pe tagata setomatua kofiatu iateia; pe aia magane foci keimna koma, senokoamo ane isa koutucua iatakoi.

⁹ Fakairo afitshicou fakarogona afasao o niare fateriki, ma maganerefia iacre ia ane iotshi; ma sefasao foci ioria niare fasao;

¹⁰ Jimra kotshigo niare ane, kaia kamaganerefia totonu iacre; pe acre maganerefia ia afasao fakairo o Atua tshote kapare acitia ia ane iotshi.

¹¹ Ma ta karofa o Atua amomai anea mouri nakafakariake ia tagaotshi

¹² Nokofakairo acitia pe nokovetea amagane isa ia Atua ma ane isa tagata o fanua wararonei acitiafakarafia sore, acitia konofo ia maganerefia, ma totonu, ma acitiafakarafia Atua ia tenei fanua wararonei;

¹³ Nokowcitia ane erefisa nokomai, ma ta sore nokomai foci o ta Atua sore ma tshote tatane kapare acitia Iesu Kristo;

¹⁴ Aia neitfwa tshana anea mouri iacitia, pe aia kapare acitia ia ane isa iotshi, ma penpena iateia faru tagata tomatua sore, ma nokocitiafakarafia avere erefia.

¹⁵ Ane iotshi ra koutucua, ma fakairo, ma eiseciria ia iotshi tomatua. Itapu tatane tasi feimacowa akoi.