TAITUS, 1_1 - Niu Testamen

¹ PAULO, ta fetshicou o Atua, ma tasi apostolo o Iesu Kristo, hepe ta fakarogrogo o tagata Atua neikasubina, ma ta acitiafakarafia o ta mari aia komaganerefia i Atua;

² Ia kamentua tsha nopoge amo anea mouri tou ma tou, aia Atua sekorefu, neitucua aia keitufwa mokagi ta nontafito o fanua wararonei;

³ Kaia ia nopoge iateia aia nakafakareake tshana fasao ia ta nokova, aia neitufwa iatavou ia ta fasao mukei o Atua tshote tatane kapare acitia;

⁴ Ia Taitus, tshaku nontariki wamuri ta fakarogrogo tshote; Karofa, ma seioria magane, ma aroto merino, nokotufwa ia Atua ta Mana, ma ta Teriki sore Iesu Kristo tshote tatane kapare acitia.

⁵ Ia avere nei avou neinagi akoi ia Krite, pe akoi penpena ma nagi totonu ane iotshi iai kojimra, ma nagi aelter ia umrai iotshi, hepe avou nifakairo akoi;

⁶ Pe faru takou semaganisa emoa tagata, ta nunwane o tasi ana inahune, nokoamo erecriki semagane safi, tagata sekoutucua acre kavaro mo maganisa.

⁷ Ma ta muri tatane tapu fakairo erefia aia semagane safi, hepe ta fetshicou sore o Atua; jimra aroto mukei, jimra milowa fakainina, jimra acitiafakarafia sore weina, jimra nokotshi tagata, jimra nokocitiafa karafia sore anea mane isa;

⁸ Kaia erefia aia acitiafakarafia keitufwa karofa ia tagata, acitiafakarafia tagata erefia, sekona, magane totonu, erefisa ia tamori, magane totonu iotshi;

⁹ Nokopurutshia mukei afasao mari, hepe nifakairo aia, pe aia tomatua ia fakairo erefia keifakairo ma imna arotorea merama o acre kofiatu.

¹⁰ Ma tagata nalupai fasao palo ma fasao nokano jimra, ma acre karasia, maganera sore kage o acre o ta segeakage;

¹¹ Erefia pofna tshare rogoutu; acre furi iotshi tagata o faru afare, nokofakairo amagane itapu iacre, acre acitiafakarafia ana ioria acre anea mane iateia.

¹² Tasi o acre, tasi o niare aprofita, neitucua, Tagata o Kriti tou ma tou korefu, aneiro isa, nokokeina akai sore su.

¹³ Tatane ra neitucua ta mari; Ianenei keiseciria mukei iacre, pe acre magane totonu ia ta fakarogrogo;

¹⁴ Sefakarogrogo afasao nokano jimra o tagata Juteia ituai, ma afasao mukei o tagata, pe kotafuri feke ta mari.

¹⁵ Iacre aroto koma erefia ane iotshi koma erefia; kaia iacre aroto isa ma sefakarogrogo jimra ane tishana koma erefia; kaia niare fenagaro ma aroto kosa.

¹⁶ Acre koutucua acre keiro Atua; kaia i avere acre vetea aia. Acre isa ana, ma semagane hepe nifakairo, ma ia avere iotshi erefia acre isa.