Marcus 4 - Ann An Gàidhlig an Latha An-diugh 1986

Fear-cur an t‑Sìl

¹ Turas eile thòisich e air teagasg ri taobh an loch. Chruinnich urad a shluagh man cuairt air 's gum b'fheudar dha bàta a ghabhail agus suidhe innte air an loch, 's an sluagh cruinn air a' chladach.

² Bha e a' cleachdadh mòran shamhlaidhean gan teagasg 's thuirt e riu,

³ “Eisdibh. Chaidh fear a‑mach a chur sìl,

⁴ agus nuair a bha e ga chur, thuit cuid dheth air an rathad, 's thàinig na h‑eòin agus shluig iad e.

⁵ Thuit cuid eile dheth air talamh creagach far nach robh mòran ùrach, agus dh'fhàs e suas an ùine ghoirid a chionns nach robh doimhneachd talmhainn aige.

⁶ Nuair a dh'èirich a' ghrian, chaidh a losgadh, 's a chionns nach robh bun aige, shearg e ás.

⁷ Thuit cuid eile a‑measg nan drisean, 's dh'fhàs na drisean agus thachd iad e, 's cha tàinig bàrr sam bith air.

⁸ Thuit cuid eile air talamh math. Dh'fhàs e suas 's thàinig toradh air, a dheich-ar‑fhichead urad 's a thrì fichead urad 's a cheud urad.”

⁹ 'S thuirt e riu, “Ma tha cluasan agaibh gu èisdeachd, èisdibh.”

Adhbhar nan Samhlaidhean

¹⁰ Nuair a dh'fhalbh an sluagh, chuir an fheadhainn a bha còmhla ris agus an dà fhear dheug ceistean air mu na samhlaidhean.

¹¹ Thuirt e riu, “Fhuair sibhse eòlas air nithean mu rìoghachd Dhè a bha falaichte thuige seo, ach dhan fheadhainn a tha an taobh a‑muigh tha gach nì air a chur ann an samhlaidhean,

¹² gus am bi iad ‘a' coimhead 's a' coimhead 's gun iad a' faicinn, 's ag èisdeachd 's ag èisdeachd 's gun iad a' tuigsinn, air eagal gum feum iad tionndadh gu Dia agus mathanas fhaighinn’.”

An Samhladh air a Mhìneachadh

¹³ Thuirt e riu, “An e nach eil sibh a' tuigsinn an t‑samhlaidh seo? Ciamar mar sin a thuigeas sibh na samhlaidhean uile?

¹⁴ 'Se facal Dhè an sìol a tha am fear seo a' cur.

¹⁵ Seo mar a tha an fheadhainn far a bheil am facal ga chur air uachdar an rathaid: nuair a tha iad ga chluinntinn, tha an Sàtan a' tighinn sa mhionaid 's a' togail leis an fhacail a chaidh a chur annta.

¹⁶ Seo mar a tha an fheadhainn far an do chuireadh an sìol air talamh creagach: nuair a chluinneas iadsan am facal, tha iad a' gabhail ris le aoibhneas.

¹⁷ Ach a chionns nach eil freumh aca annta fhèin, chan eil iad a' seasamh ach ùine ghoirid, 's nuair a thig trioblaid agus sàrachadh air sgàth an fhacail, tha iad a' tuiteam.

¹⁸ Tha cuid eile far an do chuireadh an sìol a‑measg nan drisean. Tha iad sin a' cluinntinn an fhacail,

¹⁹ ach tha urad a chùram orra mu thimcheall na beatha seo, agus urad a thlachd aca ann an saoibhreas agus urad a shannt airson nithean eile, 's gu bheil na rudan sin uile a' tighinn a‑steach 's a' tachdadh an fhacail, 's chan eil toradh sam bith a' tighinn air.

²⁰ Ach seo mar a tha an fheadhainn far a bheil an sìol air a chur ann an talamh math: tha iadsan a' cluinntinn an fhacail 's ga ghabhail thuca fhèin, 's a' toirt a‑mach toraidh, a dheich-ar‑fhichead urad 's a thrì fichead urad 's a cheud urad.”

An Solas ga Fhalach

²¹ Thuirt e riu, “Cò an duine a bheireadh a‑steach lampa 's a chuireadh i fo mhìs no fon leabaidh? Nach ann a chuireadh e air a' bhòrd i?

²² Chan eil nì sam bith air fhalach ach gus a thoirt am follais, 's chan eil nì sam bith ga chur à sealladh nach bi air fhoillseachadh.

²³ Ma tha sibh toileach èisdeachd, èisdibh.”

²⁴ Thuirt e, “Thoiribh an aire dha na tha sibh a' cluinntinn. 'Sann a‑rèir an tomhais a bhios sibh a' cleachdadh a bheir Dia dhuibh fèin, agus tuilleadh a bharrachd air a sin.

²⁵ Am fear aig a bheil rud, gheibh e tuilleadh bho Dhia, ach am fear aig nach eil, caillidh e am beagan a th'aige.”

An Sìol a' Fàs

²⁶ Thuirt e, “Seo mar a tha rìoghachd Dhè. Tha i mar gun sgapadh fear sìol air an talamh,

²⁷ 's fhad 's a bhios esan a' cadal san oidhche 's ag èirigh san là, tha an sìol a' beothachadh 's a' fàs, 's gun fhios aige ciamar.

²⁸ Tha an talamh a' cur bàrr dheth leis fhèin, an toiseach am fochann, an‑uairsin an dias, 's an‑uairsin an t‑arbhar làn-abaich anns an dèis.

²⁹ Ach cho luath 's a tha am bàrr abaich, tha e ga bhuain leis a' chorran, oir tha am foghar air tighinn.”

Gràinne a Shìol Mustard

³⁰ Thuirt e a‑rithist, “Cò ris a chanas sinn a tha rìoghachd Dhè coltach, no dè an dealbh a nì sinn oirre?

³¹ Tha i coltach ri gràinne a shìol mustard. Chan eil sìol air thalamh cho beag ris an t‑sìol seo nuair a thathar ga chur.

³² Ach an‑uairsin tha e a' fàs nas àirde na preas sam bith 's a' cur a‑mach gheugan a tha cho mòr 's gum faod eòin an adhair neadachadh fodha.”

³³ Bha e a' cur an cèill an fhacail dhaibh le iomadh samhladh dhen t‑seòrsa seo, a‑rèir 's mar a b'urrainn dhaibh a ghabhail a‑steach.

³⁴ Cha robh e a' bruidhinn riu uair sam bith as aonais samhlaidh. Ach nuair a bhiodh e‑fhèin 's a dheisciobail leo fhèin, bhiodh e a' mìneachadh a h‑uile nì dhaibh.

Stoirm air a Casg

³⁵ An là sin fhèin, nuair a thàinig am feasgar, thuirt e riu, “Rachamaid a‑null chun an taobh eile.”

³⁶ Dh'fhàg iad an sluagh 's thug iad leo e, mar a bha e, anns a' bhàta, 's bha bàtaichean eile ann cuideachd.

³⁷ Thàinig sgal gharbh air a' ghaoith, 's bha am bàta gu bhith làn leis mar a bha na tuinn a' sadadh a‑steach innte.

³⁸ Bha Iosa na chadal san deireadh 's a cheann air cluasaig. Thug iad air dùsgadh, 's thuirt iad ris, “A Mhaighistir, a bheil thu coma gu bheil sinn gu bhith bàithte?”

³⁹ Dhùisg esan, 's chuir e casg air a' ghaoith, 's thuirt e ris na tuinn, “Bithibh sàmhach, 's bithibh aig fois.” Shìolaidh a' ghaoth, 's thàinig fèath mhòr.

⁴⁰ Thuirt e riusan, “Carson a tha a leithid a dh'eagal oirbh? An e nach eil sibh fhathast a' creidsinn?”

⁴¹ Thàinig fìor eagal orra an‑uairsin, 's thuirt iad ri cach-a‑chèile, “Dè an seòrsa duine a tha seo, nuair a tha a' ghaoth 's na tuinn fhèin a' toirt feairt air?”