Marcus 16 - Ann An Gàidhlig an Latha An-diugh 1986

“Chaidh a thogail o na Mairbh”

¹ Nuair a bha an t‑Sàbaid seachad, cheannaich Màiri à Magdala, Màiri màthair Sheumais, agus Salome cungaidhean cùbhraidh airson a dhol ga ungadh.

² Glè thràth sa mhadainn air a' cheud là dhen t‑seachdain, nuair a dh'èirich a' ghrian, chaidh iad chun na h‑uaighe.

³ Bha iad ag ràdh ri cach-a‑chèile, “Cò chuireas car dhen chloich a th'aig doras na h‑uaighe?”

⁴ Ach nuair a thug iad sùil, chunnaic iad gun robh a' chlach air a gluasad air falbh, 's b'e clach mhòr, mhòr a bh'innte.

⁵ Nuair a chaidh iad a‑steach dhan uaigh, chunnaic iad fear òg na shuidhe air an taobh dheas ann an aodach fada geal, 's ghabh iad an t‑eagal.

⁶ Ach thuirt esan riu, “Na biodh eagal sam bith oirbh. Tha sibh a' lorg Iosa o Nàsaret, a bha air a cheusadh. Chaidh a thogail o na mairbh, chan eil e ann an seo. Seallaibh, sin an t‑àite far an do chàirich iad e.

⁷ Falbhaibh, 's canaibh ri a dheisciobail agus ri Peadar gu bheil e a' dol air thoiseach orra a Ghalile, 's gum faic iad ann an sin e, mar a thuirt e‑fhèin riu.”

⁸ Chaidh iad a‑mach 's theich iad bhon uaigh, oir bha iad air chrith leis an ioghnadh a ghabh iad, 's cha leigeadh an t‑eagal leo guth a ràdh ri duine.

Iosa a' Coinneachadh ri Màiri

⁹ An dèidh do dh'Iosa èirigh o na mairbh, tràth sa mhadainn air a' cheud là dhen t‑seachdain, b'e Màiri à Magdala, an tè ás an do chuir e seachd deamhain, a' cheud neach dhan do nochd e e‑fhèin.

¹⁰ Dh'fhalbh ise 's dh'innis i e dhan fheadhainn a bha air a bhith còmhla ris, 's iad fhathast a' caoidh 's a' gal.

¹¹ Ach nuair a chuala iadsan gun robh e beò, 's gum faca ise e, cha robh iad ga creidsinn.

Dithis ga Fhaicinn

¹² An dèidh seo chaidh a nochdadh ann an cruth eile do dhithis dhiubh, 's iad a' gabhail an rathaid a‑mach dhan dùthaich.

¹³ Thill iadsan, 's dh'innis iad e do chàch, ach cha do chreid iad iadsan na bu mhotha.

Na Deisciobail ga Fhaicinn

¹⁴ Mu dheireadh, chaidh a nochdadh dhan aon fhear deug iad-fhèin, 's iad nan suidhe a' gabhail am bìdh. Chronaich e iad airson an cion creidimh agus cruas an cridhe, nach do chreid iad an fheadhainn a bh'air fhaicinn an dèidh dha èirigh o na mairbh.

¹⁵ Thuirt e riu, “Rachaibh a‑mach air feadh an t‑saoghail, agus searmonaichibh an Deagh Sgeul do gach creutair.

¹⁶ An neach a chreideas 's a thèid a bhaisteadh, bidh e air a shàbhaladh, ach an neach nach creid, bidh e air a dhìteadh.

¹⁷ Bidh na comharran seo rim faighinn air an fheadhainn a chreideas: tilgidh iad a‑mach deamhain nam ainm-sa; bruidhnidh iad le cànanan ùra;

¹⁸ togaidh iad nathraichean-nimhe len làmhan agus ma dh'òlas iad puinnsean marbhtach, cha dèan e cron sam bith orra. Cuiridh iad an làmhan air daoine tinne, 's thèid an slànachadh.”

Iosa air Nèamh

¹⁹ An dèidh dhan Tighearna Iosa a bhith a' bruidhinn riu, chaidh a thogail suas gu nèamh, agus shuidh e aig deaslàimh Dhè.

²⁰ Chaidh iadsan a‑mach 's shearmonaich iad anns gach àite. Bha an Tighearna ag obair còmhla riu, 's a' dearbhadh leis na comharran a lean na luib gun robh am facal fìor.