Marcus 15 - Ann An Gàidhlig an Latha An-diugh 1986

Iosa agus Pìlat

¹ Aʼ cheud char sa mhadainn, thàinig na h‑àrd-shagairt, na h‑athraichean 's na sgrìobhaichean an ceann a chèile; bha an àrd-chomhairle gu lèir cruinn. Cheangail iad Iosa, 's shlaod iad leo e, ga thoirt thairis do Phìlat.

² Dh'fhaighnich Pìlat dheth, “An tusa rìgh nan Iùdhach?” Fhreagair esan, “'S tu‑fhèin a thubhairt e.”

³ Bha na h‑àrd-shagairt a' cur mòran rudan ás a leth.

⁴ Dh'fhaighnich Pìlat dheth a‑rithist, “Nach eil nì sam bith agad ri ràdh? Seall na tha iad a' togail nad aghaidh.”

⁵ Ach cha tuirt Iosa an còrr, 's chuir seo ioghnadh air Pìlat.

“Ceus e!”

⁶ A‑nis, aig a h‑uile Fèill-Càisge, bha e na chleachdadh aig Pìlat aon phrìosanach a leigeil ma sgaoil, fear sam bith a dh'iarradh iad.

⁷ Bha fear ris an canadh iad Barabas air a churnail fo ghlais còmhla ris na reubaltaich eile a rinn mort ann an ar‑a‑mach an aghaidh an riaghaltais.

⁸ Thàinig an sluagh far an robh Pìlat agus dh'iarr iad air dèanamh dhaibh mar a chleachd e.

⁹ Thuirt esan riu, “Am bu mhath leibh gun leiginn rìgh nan Iùdhach ma sgaoil dhuibh?”

¹⁰ Oir bha e a' tuigsinn gum b'e farmad a thug air na h‑àrd-shagairt Iosa a chur an sàs.

¹¹ Ach phiobraich na h‑àrd-shagairt an sluagh feuch an leigeadh e ás Barabas dhaibh an àite Iosa.

¹² Thuirt Pìlat riu a‑rithist, “Dè bu mhath leibh mi a dhèanamh leis an fhear ris an can sibh rìgh nan Iùdhach?”

¹³ Dh'eubh iadsan ris, “Ceus e!”

¹⁴ Thuirt Pìlat riu, “Carson; dè an t‑olc a rinn e?” Ach dh'eubh iadsan na b'àirde buileach, “Ceus e!”

¹⁵ Bha Pìlat air son an sluagh a riarachadh, 's leig e ás Barabas dhaibh. Thug e orra Iosa a chuipeadh, 's an‑uairsin thug e thairis e gu bhith air a cheusadh.

Na Saighdearan a' Magadh air

¹⁶ Dh'fhalbh na saighdearan leis a‑steach dhan lùchairt ris an canadh iad am Praetorium, agus ghairm iad còmhla an còrr dhen àireamh.

¹⁷ Chuir iad cleòca purpaidh air, 's dh'fhigh iad crùn dhrisean 's chuir iad ma cheann e.

¹⁸ Thòisich iad air fhàilteachadh, ag ràdh ris, “Slàn gum bì thu, a rìgh nan Iùdhach!”

¹⁹ Bha iad ga bhualadh air a' cheann le slait-chuilc. Bha iad a' tilgeil smugaidean air 's a' dol air an glùinean mar gum biodh iad a' toirt urraim dha.

²⁰ An dèidh dhaibh magadh a dhèanamh air, thug iad dheth an cleòca purpaidh, 's chuir iad aodach fhèin air. Dh'fhalbh iad leis airson a cheusadh.

Iosa air a Cheusadh

²¹ Thachair gun robh Iùdhach à Cirene a' gabhail seachad 's e air a shlighe a‑steach bhon dùthaich. Rinn iad grèim airsan, 's thug iad air crann-ceusaidh Iosa a ghiùlan. ('Se Sìmon an t‑ainm a bh'air, athair Alasdair is Rùfais.)

²² Thug iad Iosa a dh'ionnsaigh an àite ris an canadh iad Golgòta, 'se sin ri ràdh, Aite a' Chlaiginn.

²³ Bha iad a' tairgse dha fìon air a mheasgadh le mirr, ach cha ghabhadh e idir e.

²⁴ Agus cheus iad e. Roinn iad a chuid aodaich nam measg fhèin, a' cur chrann feuch dè gheibheadh gach fear.

²⁵ Bha e naoi uairean sa mhadainn nuair a cheus iad e.

²⁶ 'Se an nì a bha sgrìobhte mar adhbhar a dhìtidh: RIGH NAN IUDHACH.

²⁷ Còmhla ris cheus iad dithis robairean, fear air a làimh dheis, 's am fear eile air a làimh chlì. [

²⁸ ]

²⁹ Bha an fheadhainn a bha a' dol seachad a' dèanamh fanaid air, 's iad a' crathadh an cinn, 's ag ràdh, “Huh! 'S tusa am fear a bha a' dol a leagail an teampaill, 's ga thogail a‑rithist an ceann trì là!

³⁰ Sàbhail thu-fhèin, 's thig a‑nuas dhen chrann!”

³¹ Air an aon dòigh bha na h‑àrd-shagairt 's na sgrìobhaichean a' fanaid air nam measg fhèin, 's ag ràdh, “Shàbhail e daoine eile, ach chan eil e na chomas e‑fhèin a shàbhaladh.

³² Thigeadh a‑nis an Crìosd, Rìgh Israel, a‑nuas bhon chrann-cheusaidh 's gum faic sinn e ga dhèanamh, 's gun creid sinn ann.” Bha an fheadhainn a chaidh a cheusadh còmhla ris a' dèanamh tàir air cuideachd.

Bàs Iosa

³³ Aig meadhon-là, thàinig dorchadas thairis air an tìr gu lèir, a mhair gu trì uairean feasgar.

³⁴ Aig trì uairean, dh'eubh Iosa le guth mòr, “Eloi, Eloi, lama sabachthani?”, 'se sin ri ràdh, “Mo Dhia, mo Dhia, carson a tha thu air mo thrèigsinn?”

³⁵ Nuair a chuala feadhainn dhe na bha nan seasamh man cuairt an glaodh aige, thuirt iad, “Eisdibh! Tha e a' gairm air Eliah.”

³⁶ Ruith fear thuige le spuinns air a lìonadh le fìon geur. Shìn e dha air cuilc i, feuch an òladh e, 's e ag ràdh, “Fàgaibh e 's gum faic sinn an tig Eliah ga thoirt a‑nuas bhon chrann.”

³⁷ Leig Iosa eubh mhòr ás, 's dh'fhalbh an anail ás.

³⁸ 'S bha cùirtear an teampaill air a shracadh na dhà leth, bho mhullach gu bonn.

³⁹ Nuair a chunnaic an t‑oifigeach a bha na sheasamh ma choinneamh mar a chrìochnaich e, thuirt e, “Chan eil teagamh nach e Mac Dhè a bha san fhear seo.”

⁴⁰ Bha boireannaich ann cuideachd a bha ga choimhead pìos bhuaithe. Nam measg bha Màiri à Magdala, Màiri màthair Sheumais Oig is Ioseis, agus Salome.

⁴¹ Nuair a bha e ann an Galile, bhiodh iad seo ga leantainn 's a' frithealadh dha. Bha mòran bhoireannaich eile ann cuideachd a thàinig suas a dh'Ierusalem còmhla ris.

Iosa san Uaigh

⁴² Nuair a thàinig am feasgar, a chionns gur e là an ullachaidh a bh'ann, an là ron t‑Sàbaid, nochd Iòseph à Arimatèa,

⁴³ fear a bha ainmeil anns a' chomhairle. Bha dùil aigesan e‑fhèin ri rìoghachd Dhè. Bha de mhisneach aige 's gun deach e a‑steach gu Pìlat, 's dh'iarr e corp Iosa air.

⁴⁴ Chuir e ioghnadh air Pìlat gun robh Iosa marbh cho luath. Chuir e fios air oifigeach, 's dh'fhaighnich e dheth an robh Iosa dha-rìribh marbh.

⁴⁵ Nuair a chuala e bhuaithe gun robh e marbh, thug e an corp do dh'Iòseph.

⁴⁶ Cheannaich esan lèine-mharbh, 's nuair a thug e Iosa a‑nuas, phaisg e san anart e. Chàirich e an‑uairsin e ann an uaigh a chaidh a chladhach a‑mach ás a' chreig, 's rinn e clach a charadh gu doras na h‑uaighe.

⁴⁷ Bha Màiri à Magdala agus Màiri màthair Ioseis a' gabhail beachd air an àite far an deach an corp a chur.