Marcus 14 - Ann An Gàidhlig an Latha An-diugh 1986

Dòigh air a Ghlacadh

¹ Bha dà là ann mus tòisicheadh a' Chàisg agus Fèill an Arain Neo-ghoirtichte, 's dh'fheuch na h‑àrd-shagairt 's na sgrìobhaichean ri dòigh chealgach fhaighinn air Iosa a ghlacadh 's a mharbhadh.

² Oir bha iad ag ràdh, “Chan eil math dhuinn a ghlacadh aig àm na fèille, gun fhios nach bi aimhreit a‑measg an t‑sluaigh.”

Iosa ann am Betani

³ Nuair a bha e ann am Betani, 's e na shuidhe a' gabhail a bhìdh ann an taigh Shìmoin, an lobhar, thàinig boireannach a‑steach le soitheach alabastair làn de dh'fhìor ola nàrd, a bha glè chosgail. Bhrist i an soitheach, 's dhòirt i an ola air ceann Iosa.

⁴ Bha feadhainn ann a bha ag ràdh gu diumbach, “Carson a chaidh an ola a chur gu mì‑fheum mar seo?

⁵ Dh'fhaodte a reic air tuilleadh is trì cheud denàrius, 's an t‑airgead a thoirt dha na bochdan.” Bha iad a' cànran ma deidhinn.

⁶ Ach thuirt Iosa, “Leigibh leatha; carson a tha sibh ga sàrachadh? Rinn i deagh ghnìomh dhòmhsa.

⁷ Tha na bochdan agaibh daonnan, agus faodaidh sibh an cuideachadh uair sam bith a thogras sibh, ach cha bhi mise agaibh daonnan.

⁸ Rinn i na b'urrainn dhi; thàinig i roimh-làimh a dh'ungadh mo chuirp air son na h‑uaighe.

⁹ Gu cinnteach tha mi ag ràdh ruibh, bidh an rud a rinn i air innse mar chuimhneachan oirre 's gach àite san tèid an Deagh Sgeul a shearmonachadh air feadh an t‑saoghail gu lèir.”

Iùdas agus na h‑Ard-shagairt

¹⁰ Dh'fhalbh Iùdas Iscariot, aon dhen dà fhear dheug, far an robh na h‑àrd-shagairt, 's e airson Iosa a thoirt thairis dhaibh.

¹¹ Nuair a chuala iadsan seo, chuir e sunnd math orra, 's gheall iad airgead a thoirt dha. Bha esan a' feitheamh cothrom ceart air Iosa a thoirt seachad dhaibh.

Ullachadh na Càisge

¹² Air a' cheud là de dh'Fhèill an Arain Neo-ghoirtichte, nuair a bhiodhte a' marbhadh uan na Càisge, thuirt a dheisciobail ris, “Càite am bu mhath leat sinn ullachadh a dhèanamh dhut airson biadh na Càisge ithe?”

¹³ Chuir e air falbh dithis dhiubh, 's thuirt e riu, “Rachaibh a‑steach a dh'Ierusalem, agus coinnichidh duine ruibh 's e giùlan soitheach uisge. Leanaibh e.

¹⁴ Nuair a thèid e a‑steach a thaigh, canaibh ri fear an taighe, ‘Tha am Maighistir ag ràdh, “Càite bheil an rùm agamsa, far an ith mi‑fhìn 's mo dheisciobail biadh na Càisge?” ’

¹⁵ Seallaidh e dhuibh rùm mòr shuas an staidhre, 's e air a dheasachadh. Dèanaibh ullachadh dhuinn ann an sin.”

¹⁶ Dh'fhalbh na deisciobail a‑steach dhan bhaile. Thachair gach nì dìreach mar a thuirt e riu, 's dheasaich iad biadh na Càisge.

“Nì Fear agaibh mo Bhrath”

¹⁷ Anmoch feasgar, thàinig Iosa còmhla ris an dà fhear dheug.

¹⁸ Nuair a bha iad aig a' bhòrd ag ithe, thuirt e riu, “Gu cinnteach tha mi ag ràdh ruibh gu bheil fear agaibh a nì mo bhrath, fear dhe na tha ag ithe còmhla rium.”

¹⁹ Dh'fhàs iad dubhach, 's thuirt fear ma seach, “Chan e mise th'ann, an e?”

²⁰ Thuirt esan riu, “'Se fear dhen dà fhear dheug a th'ann, a tha bogadh arain anns an aon t‑soitheach rium.

²¹ Oir tha Mac an Duine a' falbh mar a tha e sgrìobhte ma dheidhinn, ach 's mairg dhàsan a nì a bhrath. B'fheàrr dhan fhear sin nach d'rugadh riamh e.”

Suipear an Tighearna

²² Nuair a bha iad ag ithe, thog e pìos arain, 's thug e taing do Dhia air a shon. Bhrist e na chriomagan e, 's thug e dhaibh e, ag ràdh, “Gabhaibh e, is e seo mo chorp-sa.”

²³ An dèidh sin thog e cupa, 's nuair a thug e taing air a shon thug e dhaibh e, 's dh'òl iad uile ás.

²⁴ Thuirt e riu, “Is e seo m'fhuil-sa, fuil a' chùmhnaint, a th'air a dòrtadh ás leth mòran dhaoine.

²⁵ Gu cinnteach tha mi ag ràdh ruibh nach òl mi tuilleadh de thoradh an fhìonain gus an là san òl mi ùr e ann an rìoghachd Dhè.”

²⁶ Nuair a sheinn iad salm, chaidh iad a‑mach gu Beinn nan Craobh-ola.

“Nì Thusa m'Aicheadh”

²⁷ Thuirt Iosa riu, “Gabhaidh sibh uile nàire dhiom, oir tha e sgrìobhte: ‘Marbhaidh mi am buachaille, agus bidh na caoraich air an sgapadh.’

²⁸ Ach nuair a thèid mo thogail bho na mairbh, thèid mi romhaibh a Ghalile.”

²⁹ Thuirt Peadar ris, “Ged a ghabhadh a h‑uile duine nàire dhiot, cha ghabh mise.”

³⁰ Thuirt Iosa ris, “Gu cinnteach tha mi ag ràdh riut, air an dearbh oidhche seo fhèin, mus gairm an coileach dà uair, gun dèan thusa m'àicheadh trì uairean.”

³¹ Ach thuirt esan na bu dàine buileach, “Ged a dh'fheum-ainn bàsachadh còmhla riut, cha dèan mise t'àicheadh.” 'S thuirt iad uile an aon rud.

An Urnaigh an Getsemane

³² Nuair a thàinig iad gu àite ris an cainte Getsemane, thuirt e ri dheisciobail, “Suidhibhse ann an seo, gus an dèan mi ùrnaigh.”

³³ Thug e Peadar agus Seumas agus Eòin còmhla ris, 's thàinig àmhghair agus imcheist eagalach air.

³⁴ 'S thuirt e riu, “Tha urad a bhròn air mo spiorad 's gur gann nach eil mi a' bàsachadh. Fanaibhse ann an seo, 's bithibh ri faire.”

³⁵ Chaidh e beagan na b'fhaide, 's leig e e‑fhèin sìos air an talamh. Rinn e ùrnaigh gun rachadh an uair seachad air nam faodadh sin a bhith.

³⁶ Agus thuirt e, “Abba, athair, tha a h‑uile nì nad chomas. Thoir air falbh bhuam an cupa seo, ach biodh do thoil-sa air a dèanamh, 's chan e mo thoil-sa.”

³⁷ Thàinig e 's fhuair e iad nan cadal. Thuirt e ri Peadar, “A Shìmoin, a bheil thu nad chadal? Nach robh e nad chomas a bhith ri faire fiù 's aon uair-a‑thìde fhèin?

³⁸ Bithibh ri faire 's ùrnaigh, air eagal 's gun tig buaireadh nur rathad. Tha an spiorad deònach gun teagamh, ach tha a' cholainn lag.”

³⁹ Dh'fhalbh e bhuapa an dara uair, 's rinn e an aon ùrnaigh 's a rinn e roimhe.

⁴⁰ Thàinig e 's fhuair e iad nan cadal a‑rithist, oir bha an sùilean air fàs trom, 's cha robh fhios aca dè theireadh iad ris.

⁴¹ Thàinig e an treas uair, 's thuirt e riu, “An e gu bheil sibh fhathast nur cadal 's a' gabhail fois? Fòghnaidh sin! Tha 'n uair air tighinn! Seallaibh! Tha Mac an Duine ga thoirt thairis do làmhan dhaoine peacach.

⁴² Eiribh is falbhamaid. Seallaibh! Tha am fear a tha gam thoirt thairis gu bhith againn.”

Iosa air a Ghlaradh

⁴³ Dìreach anns na facail, thàinig Iùdas, fear dhen dà fhear dheug, 's gràisg dhaoine còmhla ris, le claidheamhan 's le bataichean. 'Se na h‑àrd-shagairt 's na sgrìobhaichean 's na h‑athraichean a chuir ann iad.

⁴⁴ Bha am fear-brathaidh air comharra a thoirt dhaibh: thuirt e riu, “Am fear dhan toir mi pòg — sin an duine. Cuiribh an sàs e, 's thoiribh leibh e fo gheàrd.”

⁴⁵ Nuair a thàinig e, rinn e dìreach air Iosa. Thuirt e, “A Mhaighistir!” agus thug e dha pòg.

⁴⁶ Rug iadsan air Iosa, 's chuir iad an grèim e.

⁴⁷ Tharraing fear dhe na bha an làthair a chlaidheamh. Bhuail e seirbhiseach an àrd-shagairt, 's gheàrr e dheth a chluas.

⁴⁸ Thuirt Iosa riu, “An tàinig sibh gam ghlacadh le claidheamhan 's le bataichean mar gum b'e robair a bh'annam?

⁴⁹ 'S iomadh là bha mi còmhla ruibh san teampall a' teagasg, 's cha do chuir sibh an sàs mi. Ach feumaidh na sgriobtairean tighinn gu buil.”

⁵⁰ Chuir na deisciobail uile cùl ris agus theich iad.

⁵¹ Bha duine òg ga leantainn, 's gun stiall air ach aon fhilleadh aodaich. Rug iad air,

⁵² ach leig esan ás an t‑aodach, 's theich e rùisgte.

Iosa air beulaibh na Comhairle

⁵³ Thug iad leo Iosa à dh'ionnsaigh an àrd-shagairt, 's bha na prìomh-shagairt eile, na seanairean 's na sgrìobhaichean a' tighinn an ceann a chèile.

⁵⁴ Lean Peadar e pìos math bhuaithe a‑steach gu ruig a' chùirt air beulaibh taigh an àrd-shagairt. Bha e na shuidhe còmhla ris na geàird, ga gharadh fhèin ris an teine.

⁵⁵ Bha na prìomh-shagairt agus a' chomhairle gu lèir a' feuchainn ri daoine a lorg a thogadh fianais an aghaidh Iosa, 's gum biodh cothrom aca a chur gu bàs, ach cha robh a' dol leo.

⁵⁶ Oir bha mòran a' togail fianais bhrèige na aghaidh, 's cha robh iad a' tighinn a‑rèir a chèile.

⁵⁷ Dh'èirich cuid 's chuir iad na breugan air, oir thuirt iad,

⁵⁸ “Chuala sinne e ag ràdh, ‘Cuiridh mise ás a chèile an teampall seo a chaidh a thogail le làmhan dhaoine, 's an ceann trì là togaidh mi teampall eile ris nach do bhean làmh duine’.”

⁵⁹ Aig a sin fhèin, cha robh iad a' tighinn a‑rèir a chèile nam fianais.

⁶⁰ Dh'èirich an t‑àrd-shagart nam measg, 's dh'fhaighnich e de dh'Iosa, “Nach eil freagairt agad idir? Dè tha na daoine seo a' cur ás do leth?”

⁶¹ Ach dh'fhan esan sàmhach 's cha tuirt e guth. A‑rithist dh'fhaighnich an t‑àrd-shagart dheth, “An tusa an Crìosd, Mac an Aoin Bheannaichte?”

⁶² Thuirt Iosa, “Is mi; agus chì sibh Mac an Duine na shuidhe aig deaslàimh an Uile-chumhachdaich, 's e a' tighinn le neòil nan nèamhan.”

⁶³ An‑uairsin shrac an t‑àrd-shagart a chuid aodaich, 's thuirt e, “Dè 'm feum a th'againn air tuilleadh fhianaisean?

⁶⁴ Chuala sibh an toibheum aige: dè ur beachd?” 'Se a' bhinn a thug iad uile a‑mach gun robh e airidh air a' bhàs.

⁶⁵ Thòisich cuid aca air smugaidean a thilgeil air. Chuir iad còmhdach air a shùilean, ghabh iad dha len dùim, 's iad ag ràdh ris, “Innis cò bhuail thu!” Thug na geàird an‑uairsin droch làimhseachadh dha.

Peadar ag Aicheadh Iosa

⁶⁶ Nuair a bha Peadar shìos ann an cùirt an taighe, thàinig tè de shearbhantan an àrd-shagairt 's chunnaic i e ga gharadh fhèin.

⁶⁷ Thug i sùil air 's thuirt i ris, “Bha thus' thu-fhèin còmhla ris an Nàsarach, Iosa.”

⁶⁸ Ach chaidh esan ás àicheadh, 's thuirt e, “Chan eil mi gad thuigsinn; chan eil fhios agam dè tha thu ag ràdh.” 'S ghabh e a‑mach gu trannsa an taighe. Ghairm coileach.

⁶⁹ Chunnaic an t‑searbhanta a‑rithist e, 's thuirt i ris an fheadhainn a bha nan seasamh man cuairt, “Seo fear eile dhiubh.”

⁷⁰ Chaidh esan ás àicheadh a‑rithist. An ceann treis eile, thuirt iadsan ri Peadar, “'Se fear dhiubh a th'annad gun teagamh, oir 'sann à Galile a tha thu.”

⁷¹ Thug Peadar a mhionnan, 's thuirt e, “Mallachd orm mas aithne dhomh idir am fear ma bheil sibh a' bruidhinn.”

⁷² 'S anns an dearbh mhionaid ghairm an coileach an dara uair. Chuimhnich Peadar mar a thuirt Iosa ris, “Mus gairm an coileach dà uair, nì thusa m'àicheadh trì uairean.” Cha b'urrainn dha cumail air, 's thòisich e air gal.