Marcus 11 - Ann An Gàidhlig an Latha An-diugh 1986

Iosa a' Dol a‑steach a dh'Ierusalem

¹ Nuair a thàinig iad faisg air Ierusalem, Betphage agus Betani, 's iad aig Beinn nan Craobh-ola, dh'iarr e air dithis dhe dheisciobail a bhith gabhail air thoiseach.

² 'S thuirt e riu, “Falbhaibh dhan bhaile a tha mur coinneamh, 's cho luath 's a thèid sibh a‑steach ann, lorgaidh sibh asal òg 's e air a cheangal. Cha robh duine riamh ga mharcachd. Fuasglaibh e 's thoiribh thugam e.

³ Ma dh'fhaighnicheas duine sam bith carson a tha sibh a' dèanamh seo, their sibh ris gu bheil feum aig an Tighearna air 's gun cuir e air ais e gun dàil.”

⁴ Dh'fhalbh iad 's fhuair iad an t‑asal 's e air a cheangal a‑muigh air an t‑sràid, aig doras taighe. Nuair a bha iad ga fhuasgladh,

⁵ thuirt feadhainn a bha nan seasamh an sin, “Dè tha sibh a' dèanamh, a' fuasgladh an asail?”

⁶ Fhreagair iadsan dìreach mar a thuirt Iosa riu, 's leig na daoine leo falbh.

⁷ Thug iad an t‑asal gu Iosa, 's nuair a thilg iad an còtaichean air, chaidh esan air a mhuin.

⁸ Sgaoil mòran dhaoine an còtaichean air an rathad. Sgaoil feadhainn eile geugan a bha iad air a ghearradh sna h‑achaidhean.

⁹ Bha feadhainn a' dol air thoiseach air agus feadhainn a' tighinn ás a dhèidh, 's iad ag eubhach, “Hosana! Beannachd air an fhear a tha tighinn ann an ainm an Tighearna!

¹⁰ Beannachd air an rìoghachd a tha tighinn, rìoghachd ar n‑athar Dàibhidh! Hosana anns na nèamhan!”

¹¹ Nuair a ràinig e Ierusalem, chaidh e a‑steach dhan teampall, 's sheall e man cuairt air gach nì. On a bha e nise a' fàs anmoch, chaidh e a‑mach a Bhetani còmhla ris an dà fhear dheug.

Iosa 's a' Chraobh-fhìge

¹² An ath là, 's iad air a thighinn a‑mach à Betani, thàinig an t‑acras air.

¹³ Astar bhuaithe chunnaic e craobh-fhìge 's i fo dhuilleach. Chaidh e a dh'fhaicinn am faigheadh e dad oirre, ach cha d'fhuair e nì ach duilleach, oir cha robh àm nam fìgean ann fhathast.

¹⁴ Thuirt Iosa ris a' chraoibh, “Chan ith duine sam bith toradh dhiotsa gu bràth tuilleadh.” Chuala na deisciobail an nì a thubhairt e.

Iosa san Teampall

¹⁵ Nuair a thàinig iad gu Ierusalem, chaidh Iosa a‑steach dhan teampall. Bha daoine ann an sin a' reic 's a' ceannach, 's thòisich e air an sadadh a‑mach. Thilg e bun-os‑cionn bùird na feadhainn a bha ag iomlaid an airgid agus suidheachain nan daoine a bha a' reic nan calman;

¹⁶ 's cha leigeadh e le duine sam bith dad a ghiùlan troimh chùirt an teampaill.

¹⁷ An‑uairsin thòisich e air na daoine a theagasg, 's thuirt e riu, “Nach eil e sgrìobhte: ‘'Se taigh-ùrnaigh dha na cinnich uile a bhios nam thaigh-sa’; ach rinn sibhse cùil dha na mèirlich dheth.”

¹⁸ Chuala na h‑àrd-shagairt 's na sgrìobhaichean seo, 's bha iad a' feuchainn ri dòigh fhaighinn air cur ás dha. Bha eagal orra roimhe a chionns gun robh a theagasg a' cur ioghnadh mòr air a h‑uile duine.

¹⁹ Ann an ciaradh an fheasgair, chaidh iad a‑mach ás a' bhaile.

A' Chraobh-fhìge air Crìonadh

²⁰ Tràth sa mhadainn nuair a bha iad a' dol seachad, chunnaic iad a' chraobh-fhìge 's i air crìonadh gu ruig na freumhan.

²¹ Chuimhnich Peadar air na thachair 's thuirt e ri Iosa, “A Mhaighistir, seall! Tha a' chraobh-fhìge a mhallaich thu air seargadh.”

²² Fhreagair Iosa iad, “Biodh creideamh agaibh ann an Dia.

²³ Gu cinnteach tha mi ag ràdh ruibh, ma chanas duine sam bith ris a' bheinn seo, ‘Eirich agus tilg thu-fhèin sa mhuir’, 'se sin a nì i ma bhios an duine gun teagamh aige na chridhe, 's e a' creidsinn gun tachair an rud a tha e ag iarraidh.

²⁴ San aon dòigh tha mi ag ràdh ruibh, ma dh'iarras sibh rud sam bith ann an ùrnaigh, creidibh gu bheil e agaibh, agus gheibh sibh e.

²⁵ 'S ma tha dad agaibh an aghaidh duine sam bith nuair a sheasas sibh ag ùrnaigh, thoiribh mathanas dha, 's bheir ur n‑athair anns na nèamhan mathanas dhuibhse air son ur peacaidhean.” [

²⁶ ]

“Dè an t‑Ughdarras a th'agad?”

²⁷ Thill iad a‑rithist gu Ierusalem. Nuair a bha e a' coiseachd anns an teampall, thàinig na h‑àrd-shagairt, na sgrìobhaichean agus athraichean an t‑sionagoig thuige,

²⁸ 's thuirt iad ris, “Dè an t‑ùghdarras a tha agad gu bhith a' dèanamh nan nithean seo, agus cò a thug an t‑ùghdarras seo dhut?”

²⁹ Thuirt Iosa riu, “Cuiridh mise dìreach aon cheist oirbhse, 's ma fhreagras sibh i, innsidh mise dhuibh dè an t‑ùghdarras a th'agam gu bhith a' dèanamh nan nithean seo.

³⁰ Nuair a bha Eòin a' baisteadh, an ann bho Dhia no bho dhaoine a bha an t‑ùghdarras aige? Thoiribh freagairt dhomh.”

³¹ Bha iad a' deasbad ri cach-a‑chèile: “Ma their sinn gur ann bho nèamh a bha e, their esan, ‘Carson a‑rèisd nach do chreid sibh ann?’

³² Ach ma their sinn gur ann bho dhaoine a bha e…” (Bha eagal orra ron t‑sluagh, oir bha a h‑uile duine dhen bheachd gur e fàidh a bha ann an Eòin an ceart da‑rìribh.)

³³ Mar sin thuirt iad ris, “Chan eil fhios againn.” Thuirt Iosa riu, “Cha mhò a dh'innseas mise dhuibhse dè an t‑ùghdarras a th'agamsa gu bhith dèanamh nan rudan seo.”