Ephèsianach 1 - Ann An Gàidhlig an Latha An-diugh 1986

¹ Tha mise Pòl, abstol Iosa Crìosd a rèir toil Dhè, a' cur na litir seo gu sluagh Dhè ann an Ephesus, thugaibhse a tha a' cur ur n‑earbsa ann an Iosa Crìosd.

² Gun robh gràs agus sìth agaibh bho Dhia ar n‑Athair agus bhon Tighearna Iosa Crìosd.

Beannachdan spioradail ann an Crìosd

³ Nach sinn a bu chòir taing is moladh a thoirt do Dhia agus Athair ar Tighearna Iosa Crìosd. Ann an Crìosd, bheannaich e sinn leis a h‑uile beannachadh spioradail anns an rìoghachd nèamhaidh.

⁴ Oir mus robh an saoghal idir ann, thagh e sinn ann an Crìosd gu bhith naomh agus gun choire na fhianais. A chionns gu robh gràdh aige dhuinn

⁵ chomharraich e mach sinn ro‑làimh gu bhith nar mic dha fhèin tre Iosa Crìosd, oir b'e seo a thoil agus a rùn.

⁶ Mar sin bithidh sinn ga mholadh airson a ghràis ghlòrmhoir a thug e dhuinn cho fialaidh na Mhac gràdhach.

^7-8 A chionns gun deach fhuil-san a dhòrtadh, tha sinne air ar cur saor is ar peacaidhean air am maitheadh dhuinn. Sin cho fialaidh 's a tha Dia leis a' ghràs a thug e dhuinn ann am pailteas cho mòr. Le seo tha e a' sealltainn cho coileanta 's a tha a ghliocas agus a thuigse.

⁹ Roghnaich e gun toireadh e eòlas dhuinn air an nì sin a bha falaichte na rùintean fhèin, an nì a chuir e roimhe a thoirt gu buil ann an Crìosd.

¹⁰ 'S e sin gun stiùireadh e a h‑uile rud a dh'ionnsaigh na h‑uaire anns am bi Crìosd na cheann air gach nì, an dà chuid air nèamh agus air thalamh.

¹¹ Mar a rùnaich e bho thoiseach, thagh Dia sinn ann an Crìosd gu bhith nar sluagh dha fhèin, dìreach mar a tha e a' toirt gu buil a h‑uile nì a rèir a thoil agus a rùin,

¹² air dhòigh 's gum biodh sinne, a' chiad fheadhainn a chuir ar dòchas ann an Crìosd, a' moladh a ghlòire.

¹³ Agus nuair a chuala sibhse am facal fìrinneach, Deagh Sgeul ur slàinte, air dhòigh 's gun do chreid sibh e, chomharraich Dia sibh dha fhèin nuair a thug e dhuibh an Spiorad Naomh a chaidh a ghealltainn.

¹⁴ 'S e gu bheil an Spiorad againn a tha gar dèanamh cinnteach gum faigh sinn an oighreachd a gheall Dia dhuinn, 's gum bi an sluagh a bhuineas dha air an cur saor gu h‑iomlan, air a leithid a dhòigh 's gum bi a ghlòir air a moladh.

Urnaigh Phòil

¹⁵ Mar sin, riamh bho chuala mi mu dheidhinn ur creidimh anns an Tighearna Iosa agus an gràdh a th'agaibh do shluagh Dhè uile,

¹⁶ cha do sguir mi a thoirt taing do Dhia air ur son. Tha mi gur cuimhneachadh nam ùrnaighean,

¹⁷ ag iarraidh gun toir Dia ar Tighearna Iosa Crìosd, Athair na glòire, Spiorad tuigse agus foillscachaidh dhuibh, air dhòigh 's gum bi eòlas agaibh air fhèin.

¹⁸ Tha mi ag iarraidh gum bi sibh air ur soillseachadh nur cridheachan air dhòigh is gum bi fios agaibh air an dòchas gus a bheil Dia gur gairm, air cho saidhbhir 's cho glòrmhor 's a tha an oighreachd a tha Dia a' gealltainn dha shluagh fhèin,

¹⁹ agus cho anabarrach mòr 's a tha an cumhachd a tha ag obrachadh annainne a tha a' creidsinn. 'S e seo an dearbh chumhachd neartmhor

²⁰ a chleachd Dia nuair a thog e Crìosd bhon bhàs 's a chuir e na shuidhe e aig a dheaslaimh fhèin ann an nèamh.

²¹ Sin far a bheil e, fada os cionn gach tighearna is ùghdarras is cumhachd is riaghlair, os cionn gach ainm aig a bheil urram chan ann a‑mhàin san t‑saoghal seo ach cuideachd san t‑saoghal a tha romhainn.

²² Chuir Dia a h‑uile rud fo chasan Chrìosd, agus thug e dhan eaglais e mar an ceann a tha a' riaghladh thar gach nì.

²³ 'S i an eaglais a chorp, 's tha i ga dhèanamh iomlan mar a tha e fhèin a' dèanamh iomlan a h‑uile nì a th'ann.