Zekaria 9 - Angami Naga CL (Re-edited) Bible (BSI)

Israel Ngumvüko Ketsokecü

¹ Die puo pukeshü. Jihova die Hadrak kijüu petsou, mu Damaska gei batatuo. Kekreilamonyü Aram seluoba Jihova viekecü la, Israel seyie peteko tuoi di;

² Hamat rei sa, süu puo tierie nu kebau, Tur mu Sidon, unie thuo mhasi se ba rei.

³ Tur-e badi chüliete, sidi nyophe tuoi rakachü pfhekengulie, tsiu sunae chaü nu mha kerhuko tuoite.

⁴ Derei tsie we, Jihovae puo vieko chüsetatuo, siro puo kinyiko kelhoupie dzükezha nu shüwatuo, sidi mi bu puo pekawatuo.

⁵ Ashkelon-e süu ngu di michietatuo, Gaza rei puo nousuo di meyhumezhietatuo; Ekron rei sa, puo kemerüko thenga chüketa la. Kediu Gaza nunu katatuo. Ashkelon nu themia lhou motatuo;

⁶ themia kereikecü Ashdod nu lhoutatuo, tsiu ae Filistinko kemiakokecüu pie puo thela chüwatuo.

⁷ Ae puo me nunu puo zieu, siro puo hu donu mharhi kemo kemecüu chüsetatuo; puo rei úko Kepenuopfü la lhiekelieu chütuo; puoe Juda nu chienuo puo mhietuo, mu Ekron-e Jebusmia mhietatuo.

⁸ Sitse ae kipfhemia puo kemhiei a kiu nu balietuo, sitse miapuorei tuo kho mu ke motatuo; mia kepesemia puorei süko pfüthe la volie lho, kekreilamonyü tsie we a a mhipie nguwaketa la.

Ukepenuopfü Themiako Kekhaketuou

⁹ N nei philie, He-i Zion nuopfü! Shie petoshülie, He-i Jerusalem nuopfü! Harie, n kediu n ki vorzhie; zapuzayie mu kuokelie sü puo zo, menenuoi di gada geinu, gada kemedzü yopuo gei tuo.

¹⁰ Puoe Efraim nu kierbagei, siro Jerusalem nu terhü kier pekawatuo; tsiu terhü theü dathewatuo, sidi puoe seyieko bu vitho chünushütuo, puo kedirüvie-e dzükezha nunu vo dzükezha ketsotuo, mu Kerüu nunu vo kijü vala ketsotuo.

¹¹ Siro n la zowe, a zie se n ze dietseidiekho chükelie la, ae dzü kejü kheho nunu n diemiako ze parshütuo.

¹² Nie dahou gei votalie, he-i kemerü keba kediemiako; thie a n gei puo de kenie khashüketuo pushüya.

¹³ Kekreilamonyü a theü tuoi Juda galiete; a Efraim pie puo theütsie chüshü. A n nuonuoko piesieshütuo, He-i Zion, süko bu n nuonuoko petsoutuo, He-i Gris, sidi n chüpie terhümiavimia zhiecha mhieshütuo.

¹⁴ Sitse Jihova uko mho geinu partuo, siro puo theütsie teikemela tuoi votuo; tsiu Niepuu Jihovae ketsü khoushütuo, mu pekhrotsa khriedi ze mele votuo.

¹⁵ Krodiko Jihova uko yalietuo, ukoe ketsie deiyakezhako peka mu kedewatuo; ukoe zu tuoi süko zie krietuo, siro mhabou mhiei tshulietuo, tsiu ruosuoba puokeko mhie thezie üse petsewatuo.

¹⁶ Sünhie Jihova uko Kepenuopfü uko kelalietuo, kekreilamonyü ukoe puo kuokro-u zokecü la; ukoe keditsüre gei ketsie puoma kerepfü tuoi, puo kijü nu zieshüketuo la.

¹⁷ Kekreilamonyü puo kevi mu puo zivi kide zha shi! Telhae khriesamia chüpie vilieya, tsiu khubezu kesae rüüko chüpie vilieya.