Zekaria 8 - Angami Naga CL (Re-edited) Bible (BSI)

Kepenuopfü Zion ki Phrakeshü

¹ Krodiko Jihova die a ki vor di sie;

² Krodiko Jihovae puya: Ae a rothorkecü se Zion gei a ro bate, mu a noupfhü kemeriekecü se puo gei a ro bate.

³ Jihovae puya: A Zion gei la vortuo, sidi Jerusalem metsuo nu lhoutatuo; Jerusalem üse kedietho nadi üdi kietuo, mu krodiko Jihova kijüthouu üse kemesa kijüthou ütuo.

⁴ Krodiko Jihovae puya: Jerusalem chaüko nu ketsamia mu ketsapfümia phichüthorketa ki ze u dzie nu u the se phretatuo.

⁵ Siro nadi chaüko nu thepfunuomia mu thenunuomia thuo tshu di chaü nu rüzhü ba latuo.

⁶ Krodiko Jihovae puya: Tsiedoki themia lhiekelieko la we chülie kenjükecü puo, süu a la rei chülie kenjü me? Sidi krodiko Jihovae puya.

⁷ Krodiko Jihovae puya: Ae rüna niakratsa mu niathutsa nu a themiako kelalietuo;

⁸ tsiu uko ze vor Jerusalem nu lhoushütuo. Kedietho siro kemiatho nunu ukoe a themia chütuo mu a uko Kepenuopfü chülietuo.

⁹ Siro krodiko Jihovae puya: Nie dzie bu meteilie, niekoe tsie mhodzüki nu rüsuoki, krodiko Jihova kiu mvüdze dzekeshü nhie süki ketha siedzekesiko tie nunu die hako sishüta zo.

¹⁰ Kekreilamonyü sümhodzü themia morei khunuoko zha khrüya mo, morei themia ketsukevo chükecü kemichie nyi, ae uko pete bu huoniehuo perhiekecü chükeshü la.

¹¹ Derei tsie we a, themia lhiekelie hako gei thiedzü keriekiko gei keshü tuoilie lhote, krodiko Jihovae siya.

¹² Kekreilamonyü kezekevi prushütuo; khubebo puo si vülietuo, kijüu puo si vüshütuo, mu teikoe thezei pekrüshütuo; mu a themia lhiekelie hako bu mha hako pete pevielietuo.

¹³ Siro niekoe seyieko donu rüsepfü tuoketa mhiei, he-i Juda mu Israel kinuko, sükemhie a nieko kelalietuo, sidi nieko bu thejakepfümia chülietuo. Michieta hie, derei nie dzie bu meteilie.

¹⁴ Kekreilamonyü krodiko Jihovae puya: Nieko puonuoko a nou chü kemeyieshü mu a ketheta mo di kepeka se nieko gei vortuo ükeshü mhie, krodiko Jihovae siya.

¹⁵ Sütuoi teisozha hako nu ae Jerusalem mu Juda kiu gei mha kevi chüshütuoü rhü laliete; michieta hie.

¹⁶ Mha hako nie chütuo: Nie huoniehuo gei ketho-u pulie, nie kharuko nu ketho capi mu vitho chüshülie,

¹⁷ nie nou nu huoniehuo perhietuo üdi mha kesuo rhü hie, mu kekrükecü rüseko khrieta hie; kekreilamonyü mha hako pete ae rütseya, Jihovae siya.

Mevokecü Kenei

¹⁸ Krodiko Jihova die a ki vor di sie:

¹⁹ Krodiko Jihovae puya: Khrü diau nu mevokecüu, tsiu khrü pengouu nu mevokecüu, mu khrü thenieu nu mevokecüu, siro khrü ker nu mevokecüu bu Juda kiu la kenei mu thenou kemvü teiu, tsiu u kenei thenyiko chütuo; süla ketho mu kezekevi u neilie.

Themia Kekra Jerusalem nu Voketa

²⁰ Krodiko Jihovae puya: Themiako vor, nadiko nu kelhouko;

²¹ nadi puo nu kelhoumia kekreiu ki votuo, sidi sie, “Vorlie, úko Jihova ki vo puo medo ketso khe mu krodiko Jihova pfhü khe; a thuo rei votuo,” situo.

²² Themia kekra mu seyie kekuo kekra Jerusalem nunu krodiko Jihova pfhütuo, tsiu Jihova ki chatuo.

²³ Krodiko Jihovae puya: Süteiki seyieko nunu mia ker Judamia puo pfhe teshülie di, “Hie bu nie ze vocie, Ukepenuopfü nie ze tuokecü hie sikecü la,” situo.