Zekaria 6 - Angami Naga CL (Re-edited) Bible (BSI)

Ziemho Thethau: Kierbagei Diau

¹ Süsie a meho la sie ru kierbagei dia kijüthou kenie, mese pie kechü kijüthounie donunu par.

² Kierbagei kerieu nu kiernie merie, kierbagei kenieu kiernie tei.

³ Kierbagei seu kiernie kra, mu kierbagei diau kiernie rürhü rümho.

⁴ Sitse ae teigeidielie a rüchü kethau ki, “A niepuu, hako kedipuo ga?”

⁵ Siru teigeidielieu a die kela di, “Hako kijü pete Niepuu mhodzünu uko thuo uko khashükewa sie, takepra teigei teikhrie diako zo.

⁶ Kier keteiko ze ketuo kierbageiu ta rüna pesotsa va voya, kekrako ta niakratsa rüna va voya, mu rürhü rümhocüko ta rüna pekhrotsa vaya.”

⁷ Siro kierko par tse, ukoe tatatuoü meyhumezhieta mu kijüu pfhe whi votuo üdi. Sitse puo sie, “Volie, di kijüu pfhe whi voshülie.” Süla uko kijüu pfhe whi voshü.

⁸ Süsie puo melie peto di sie a ki, “Harie, rüna pesotsa vakecükoe a ruopfü bu pesotsa kijüko nu rüleiliete.”

Puoco-u bu Dikelie

⁹ Jihova die a ki vor di sie:

¹⁰ rakachüko siro suna, miadie chüketuoko, Heldai, Tobija, mu Jedaia-Babilon nunu kevorko kinu pielie, sidi no sünhie Zefania nuou Josia ki volie.

¹¹ Rakachü mu suna pielie di keditsüre puo chülie, sidi süu pie Jehozadak nuou Joshua zievokezhatho-u tsügei shüshülie.

¹² Sidi puo ki krodiko Jihovae puya: Haki mia puo puo za Puoco ükecüu ba; kekreilamonyü puoe süu geinu puo dza chü thepratuo, mu puoe Jihova rüsuokiu chütuo.

¹³ Jihova rüsuokiu chüshüketuou sü puo zo; puo kedi therhu pfütuo, mu puoe kediba gei balie di mha kekhatuo. Siro puo kediba nu zievo puo batuo, unie donu kezekevi kepfhesikelie se di.

¹⁴ Siro keditsüreu Heldai, Tobija, Jedaia, mu Zefania nuou Josia dzie nu se kemenuo batuo, Jihova rüsuoki nu rükraketuo puo chütuo.

¹⁵ Kepetse nu ketuoko vor di Jihova rüsuoki kechü nu kekhruohituo; sitse noe krodiko Jihova a ketsepie n ki shü ücü silietuo. Noe menuo di Jihova n Kepenuopfü pfhe zelie ro mha hau chülietuo.