Zekaria 5 - Angami Naga CL (Re-edited) Bible (BSI)

Ziemho Sorouu: Tijü di Rüse Suokecü

¹ Süsie a mehoshü ru leshütshü puo pruo ketuo ngu.

² Sitse puo a ki, “No kedipuo ngu ga?” A sie puo ki, “A leshütshü puo pruo ketuo ngu; puocha thu mepfü; mu puozha thu ker.”

³ Sitse puo a ki, “Rüse hau kijü pete mhogei voya, kekreilamonyü kehoupuorei rüguyakezhamia latsa thupie ketuo tuoi dathewatuo, mu kehoupuorei tijü di rüseyakezhamia kekreitsa thupie ketuo tuoi dathewatuo.

⁴ A süu ketseshüte, krodiko Jihovae siya, mu süu kerügumia ki nu letuo, mu a za se tijü di rüseyakezhamia kehoupuorei ki nu letuo; sidi ki sünu batatuo sidi puo cü pejüwatuo, sei mu ketsie rei.”

Ziemho Thenieu: Thenupfü Puo Merha nu Keba

⁵ Süsie teigeidielie a rüchü kethau tuo a ki phir di sie, “Tosie di kedipuo parzhü shi mehoshüyi”

⁶ Sitse a sie, “Hau kedipuo ga?” Puo sie, “Mha parkezhü hau merha puo.” Siro puo a ki “Hau kijü pete nu uko kephoumau.”

⁷ Süsie guli pie krapie keba puo kezeu hieshü, mu sünu thenumiapfü puo merha puo nu ba!

⁸ Sitse puo sie, “Haue kecürü,” sita. Süla puoe süpfü nepie merha nu shü lawa, mu krapie keba guli kemesiu negewa.

⁹ Süsie a meho la sie ru thenumia kenie tuo parkezhü ngu. Unie shü teikhrie gei tuo, unie zemvüü tuoi unie shü nyi; tsiu unie merhau kijü mu tei donu pie sieta.

¹⁰ Sitse a teigeidielie a rüchü kethau ki, “Unie merhau se kirapuo votazhü ga?”

¹¹ Puo a ki, “Shinar kijü nu, ki chüketuo la, mu hau chülieta tse, unie-e merhau pie puo mvüdze nu shüwatuo.”