Zekaria 4 - Angami Naga CL (Re-edited) Bible (BSI)

Ziemho Pengouu: Mitubau mu Olivko

¹ Teigeidielie a rüchükethau la vor, sidi mia puo zekezhü nunu kesoukelie tuoi a kesoushü.

² Puo sie a ki, “No kedipuo ngu ba ga?” Sitse a sie, “Pete suna pie kechü mituba puo ngulie, süu mhogei mhabou puo ba, siro sügei mitu thenie ba, mu mitu thenieko puopuo gei puotie puopuo ba, süko puo mhogei ba.

³ Siro süu khieki olivbo kenie ba, puo liro mhabou thezatsa, mu kekreiu thevitsa ba.”

⁴ A teigeidielie a rüchü kethau ki, “A Niepuu, hako kedipuo ga?”

⁵ Sitse teigeidielie a rüchü kethau a die kela di sie, “No hako kedipuo shi si mo me?” Süla a sie, “A niepuu, a si molie.”

⁶ Siru puo a ki, “Hau Jihova die Zerubabel ki pukeshüu: Kemecakemekhro, morei kekuo geinulie lho, derei a ruopfü geinutuo, krodiko Jihovae siya.

⁷ No kedipuo ga? He-i kijüthou kezhau. Zerubabel mhodzü noe kijüthezha chütatuo; mu puoe ketsie pesotho-u se par shiekhoui di ‘Ngukemezhie, süu ngumezhielie!’ isituo.”

⁸ Sizomoü Jihova die a ki vor di sie,

⁹ “Zerubabel dzie thuo ki hau mvü dzeshü; puo dzie thuo süu rei chü tseishütuo. Sitse niekoe krodiko Jihova thuo a ketsepie nieko ki shü ücü silietuo.

¹⁰ Kekreilamonyü kehoupuorei mha kecü sedekelie zhau ngu u nou thesekecüko u neituo, uko Zerubabel dzie nu kemejüro ngulietuo. “Mha thenie hako Jihova mhiko zo, ta kijü pete nu votuoya.”

¹¹ Sitse a puo ki, “Mituba khie thevi thezatsa keba olivbonie kedipuo ga?”

¹² Süsie va kenieu a puo ki, “Suna pou kenie nunu tier rukeshü oliv suna co hanie kedipuo ga?”

¹³ Puo a ki, “No mha hako kedipuo shi si mo me?” A sie, “A niepuu, a si molie.”

¹⁴ Sitse puo sie, “Kenhekelie hanie, kijü pete nu Niepuu khieki thaya.”