Zekaria 3 - Angami Naga CL (Re-edited) Bible (BSI)

Ziemho Diau: Joshua mu Satan

¹ Süsie Joshua phichükezhaue Jihova dielieu mhodzünu thakecü puo se a pengushü, mu Satan-e puo pejotuoü puo zatsa tha.

² Sitse Jihova sie Satanki, “Jihova n kerhieya, he-i Satan! Jihova Jerusalem kedakelieu n kerhieya! Themia haue mi chü se kepar zasi puo mo üme?”

³ Joshuae süteiki puo pfhenei kerütsekecü se di teigeidielieu mhodzünu tha.

⁴ Sitse teigeidielieu puo mhodzünu kethako ki, “Puo geinu pfhe kerhuko lhewalie.” Siro puoe puo ki, “Harie, ae n geinu kesuo kechüu lhewate; mu a pfhenei kesa se n wheshütuo.”

⁵ Sitse a sie, “Uko bu tsüze kemesa puo pie puo tsügei shülie.” Süla ukoe tsüze kemesa puo pie puo tsügei shüshü siro pfhenei kesa se puo wheshü; tsiu Jihova dielieu sükhieki tha.

⁶ Süsie Jihova dielieu Joshua chü kethepfu di sie,

⁷ “Krodiko Jihovae puya: No a zhoko nu tuolie siro a n ki se morokesuo pukeshüko se balie liro, no a kiu kekhalietuo tsiu a dienyaki rei sa meholietuo, mu haki kethako donu lelie kevi kekuo kha n tsütuo.

⁸ Süla tsie rünyüliecie, Joshua, zievokezhatho-u, no mu n mhodzünu ketha n kezemiako! Ukoe hasie vorketuo mha zasiko zokecü la: Ae a kituo Puoco-u se vorshütuo üzhie.

⁹ A ketsie pie Joshua mhodzü kezhüu, ketsie puo zo di puo zie thenie ba, a sügei puokhu thushütuo, krodiko Jihovae siya, mu a khunhie puo nu kijü hau kejokemou chüwatuo.

¹⁰ Sünhie, krodiko Jihovae puya, nieko huoniehuo kiepie nie khubebo mu chiedebo khro shülietuo.”