Zekaria 2 - Angami Naga CL (Re-edited) Bible (BSI)

Ziemho Seu: Mha kemejüro Se Kethau

¹ A meho sie ru themia puo puo dzie nu mha kemejüro puo se ketha ngu.

² Sitse a sie, “No kirapuo votieya ga?” ishü. Puo a die kela di, “Jerusalem mejüketuo la, puocha puozha kedithechie shi mehotuo üdi lie.”

³ Sitse teigeidielie a rüchü kethau a ze kesetuoü tuo phir,

⁴ sidi puo a ki, “Tashülienukecü, khriesa luu ki pushücie: Jerusalem-e puo sozha sa kemo rünako mhietatuo, kekreilamonyü themia mu khunuo sünu ba seketa la.

⁵ Kekreilamonyü ae süu khie lutsahatsa pete mi sozha kemhietuo, tsiu sünu zapuzayie chülietuo, Jihovae siya.”

Miadie Chü Ketuoko ki Pukeshü

⁶ Sielie, sielie! Pesotsa kijü nunu tatalie, Jihovae siya; kekreilamonyü teigei teikhrie diako tuoi a nieko kelhapie chazou shüwaketa la, Jihovae siya.

⁷ Sielie! Zion nu vo rüshütalie, nie Babilon nuopfü ze lhou kebako.

⁸ Kekreilamonyü krodiko Jihovae puya (puo zapuzayieu la a ketseshücie) nie pekakewa seyieko dze pushü: Ketho zo, n biekeshüu a mhi shülouu biewe.

⁹ Süla tsie, a a dzie yhapie uko petsoutuo, mu ukoe u kituomia la kepeka chütatuo. Sitse niekoe krodiko Jihova a ketseshü ücü silietuo.

¹⁰ Kelilie mu nie neilie, he-i Zion nuopfü! Kekreilamonyü harie, a vor nieko donu lhoutuo, Jihovae siya.

¹¹ Sünhie seyie kekra u thuo vo Jihova zetatuo, sidi a themia chülietuo; mu a nieko donu lhou balietuo. Sitse niekoe krodiko Jihova thuo a ketsepie nieko ki shü ücü silietuo.

¹² Jihova kemesa kijü nu Juda pie puo yau chü di welietuo, mu Jerusalem keda lalietuo.

¹³ Themia pete, Jihova mhodzü kemekrietalie; kekreilamonyü puoe puo kemesa tha nunu sietakecü la.