Zekaria 14 - Angami Naga CL (Re-edited) Bible (BSI)

Thiesie Terhü Chüketuo mu Kuokelie Thelau

¹ Harie, Jihova teisozhau vorzhie, sünhie nie kinu pekakelieko nieko donunu kezawatuo.

² Kekreilamonyü a seyie pete kie kengupie Jerusalem ze kegeituo, mu nadiu lielietuo tsiu kiko nu mha ketalietuo mu thenuko shüwatuo; nadiu nu themia ketoupuoe miadie chü votatuo, derei themia lhiekeliekoe nadiu nunu pekawalie lho.

³ Sitse Jihovae par di seyie süko ze kegeituo, terhükegeikecü nhie tuoi di.

⁴ Sünhie puo phi-e Oliv Kijüthou gei thalietuo, süue niathutsa Jerusalem mhodzünu ba; siro Oliv Kijüthouue razha kezha puo bu puo keza kenie chüpie niathutsa mu niakratsa votatuo; sitse Kijüthouu ketoupuoe pesotsa vatatuo, mu kekreitsa ketoupuoe pekhrotsa vatatuo.

⁵ Siro niekoe ta Jihova kijüthoutsa razha nu tsutatuo, kekreilamonyü kijüthouko donu razhau vo Azal ketsotuo; mu niekoe Uzia Juda kediu teiki kiükishükecü nunu taketa tuoi tatatuo. Sitse Jihova, a Kepenuopfü vortuo, mu kemesako pete puo ze vortuo.

⁶ Sünhie kemeku morei thezei rei krülie lho.

⁷ Siro teiso sei batatuo (süue Jihova thuo si) teiso morei teizei chülie lho, kekreilamonyü thevatie rei ziekruoi batatuo.

⁸ Sünhie Jerusalem nunu kerhei dzüluou partuo, süko ketoupuoe niathutsa dzükezhatsa votatuo mu ketoupuoe niakratsa dzükezhatsa votatuo; süu teile ki rei teisei ki rei si zotuo.

⁹ Siro Jihova thuo kijüu pete mho kedi chütatuo, sünhie Jihovae puo mu puo za rei puo chütatuo.

¹⁰ Kijü pete Jerusalem pekhrotsa Geba nunu vo Rimon ketso chüpie razha kemezhü chüwatuo. Derei Jerusalem puo thau rükrie sietatuo, Benjamin kharu nunu vo thiedzü kharuu ketso, vo puokeu nu kharuu ketso, mu Hananel tsiepfhe nunu vo kediu khubedzü kethebou ketso.

¹¹ Siro sünu themia lhou batatuo, siro süu peka lotsokecü chü salie lho; Jerusalem-e khrukhre batatuo.

¹² Siro Jihovae thepe hau pie Jerusalem perhie di terhü kechü themia pete tsütuo; uko u phi gei tha zoluokecü nu uko chü jütatuo; uko mhi-e puo thau nunu jütatuo, mu uko meüe uko me nunu jütatuo.

¹³ Sünhie kemerie sekecü Jihova kinu uko gei vortuo, sitse mia puo mia puo sie u zanuou dzie telietuo, sitse mia puo dzie-e sie kekreiu dzie petsoutatuo;

¹⁴ Juda thuo zorei Jerusalem nunu kegeitatuo. Siro seyie puokhieümhou houpfü keba kinyiko pete, suna, rakachü, mu pfhemeneiko kekra se vor kengulietuo.

¹⁵ Siro thepe hamhiekecü pie kierko, khunuoko, utko, gadako, mu khunuo kehoupuorei razhüko nu keba pete gei shütuo.

¹⁶ Süsie seyie pete vor Jerusalem perhiekecü ki lhiekelieko teiciekepra kho kediu, krodiko Jihova rüsuotuo, mu pruunyiko nyituoü khotuo.

¹⁷ Kijü nu kikru huo Jerusalem nu vo kediu, krodiko Jihova rüsuo mota ro, süko gei teirüshü motatuo.

¹⁸ Mu Ijipt kikruu kho di uko khashülie mota ro, uko gei Jihova thepe pie seyieko pechükecüu khashütuo, uko kho di pruunyiko nyi kemo la.

¹⁹ Hauha Ijipt mu seyie pete kho pruunyiko nyi kemomia siazhautuo.

²⁰ Sünhie kier gei khepfüketuo thetseiko gei “Mesapie Jihova tsülie,” icüu tuotuo. Siro Jihova kiu nu galikoe mesapie ruosuobau mhodzünu mhabouko tuoitatuo;

²¹ tsiu Jerusalem mu Juda nu gali kehoupuorei krodiko Jihova mhodzünu mesatatuo, sitse rüsuo chüketuomia kehoupuorei vortuo sidi süko se rüsuoko belietuo. Sidi uko sünhie krodiko Jihova kiu nu thelhikechümia puo rei ba salie lhote.