Zekaria 13 - Angami Naga CL (Re-edited) Bible (BSI)

¹ Sünhie David kiu gei kephouma mu mesa kemoko khrü kemesaketuo la dzüluo puo partuo.

Terhuorhi Kerüsuo Khakewa

² Sünhie krodiko Jihovae puya, ae kijüu gei terhuorhi zako dathewatuo, sitse süko rükra sa motatuo; süsie rei a kijü süu geinu siedzekesiko mu mesa kemo ruopfüko biewatatuo.

³ Mu siedzekesimia huo la sierta ro, uko puonuoko mu uzuonuoko sie uko ki, “Nie rhei balie kenjü, nie Jihova za nu kemeda pu rei si momu,” isituo; siro uko puonuoko mu uzuonuokoe uko siedzekesi pukecü ki uko rhükhriwatuo.

⁴ Sünhie siedzekesiko, mia puopuokecü, u ziemhoko se siedzedie pukecü ki mengalietuo; uko miasekedoketuo la pfhemie pie u whese tuolie lho,

⁵ derei uko pete rei sie, “Ae siedzekesimia mo, ae lieciemia zo; kekreilamonyü a khriesa nu kijüu pie a vie chü sesierte,” situo.

⁶ Sidi mia puoe uko ketso di, “N merü gei rüza hako kedipuo ga?” isi ro, uko diekelakeshüu sie, “A zemiako kikru nunu a rüza hako pfüliewe,” isituo.

Kuopfheu Vüwa, Tekuoko Cüreta

⁷ “Sielie, he-i zhiechau, a kuopfheu petsoulie, a dziese themiau petsoushücie,” idi krodiko Jihovae puya. Kuopfheu vüshücie, sitse tekuoko ta cüretatuo; a a dzie chapie nhicuko gei shütuo.

⁸ Jihovae puya, kijü pete nu se-zakenie dathewatuo sidi katatuo, mu se-zapuo bu rhei balietuo.

⁹ Sidi a za se hau pie mi nu shütuo, rakachü chü kemesakecü tuoi chü kemesatuo, tsiu suna kevikesuo mehokecü tuoi mehotuo. Ukoe a za kietuo, mu a uko pfhekhoshütuo. Ae sie, “Ukoe a themia zo,” ituo, mu ukoe sie, “Jihova sü úko Kepenuopfü zo,” situo.