Zekaria 12 - Angami Naga CL (Re-edited) Bible (BSI)

Jerusalem Kuokelie

¹ Die pukeshü puo. Jihova die Israel la pukeshü: Jihovae puya, teiko kelhakeshüu mu kijü mvüdzekeshüu tsiu themia gei kerheiro khakeshüu:

² Harie, ae Jerusalem khieümhou houpfü kebako la puo chüpie perüsürüsakecü tehie puo chüshütuo; süu Jerusalem perhie di re keba ki Juda rei sa perhietuo.

³ Sünhie themia pete la Jerusalem pie ketsie kemesi puo chüwatuo; süu piekecümia kehoupuorei u thuo u pechü pesuo pfülietuo. Siro seyie pete rei vor kengulie di puo perhietuo.

⁴ Sünhie a kier pete chü kemidewatuo, mu puo keseu bu nyatatuo; Jihovae siya. Derei Juda kiu la zowe a meholietatuo, a süko kier pete mhi chü peciekewa ki.

⁵ Sitse Juda chienuokoe sie u thuo u üse, “Jerusalem nu kelhouko we uko Kepenuopfü, krodiko Jihova geinu u kekuo bate,” ituo.

⁶ Sünhie a Juda chienuoko pie sei khropie kezhü gei gali tu keba tuoishütuo, telha khropie keba nu mi tu sieketa tuoi, sidi süue thezatsa tsiu thevitsa lhou keba themiako pejüwatuo, derei Jerusalem we Jerusalem gei lhoulietuo.

⁷ Siro Jihova Juda pfhekiko bu kuolietuo, sitse David ki zayie kechüu mu Jerusalem nu keba themiako zayie kechüu bu u thuo u chü pezhapie Juda mhota molieketuo la zo.

⁸ Sünhie Jihovae Jerusalem nu kelhouko yalietuo, sitse sünhie uko donu kethachüthomia rei David tuoitatuo, mu David kiue Ukepenuopfü mhietatuo, Jihova dieliemia uko mhodzü ketuo tuoitatuo.

⁹ Sünhie ae Jerusalem petsoukecü seyie pete pekawatuoü pfhütatuo.

¹⁰ Siro ae David kiu gei mu Jerusalem nu kelhouko gei ngukemezhie mu u mezhiemelokecü ruopfüu rushütuo, siro ukoe uko thuo rüngou pie zekewau ngu tse, ukoe puo krükratuo, mia puoe puo nuo puo rübei zokecüu la krakecü tuoituo, sidi krapie mia puoe puo nuo nuorieu la krakecü tuoitatuo.

¹¹ Sünhie Jerusalem nu kra thekrü chü kemerie chü di Megido razha Hadad-rimon nu kra thekrü kechü tuoitatuo.

¹² Kijüue kratuo, kikru puopuokecü, mu David kikru zocüu rei; siro uko nupfünuoko rei, tsiu Nathan kikru rei, mu süko nupfünuoko rei;

¹³ Levi kikru rei, tsiu süko nupfünuoko rei; Shimei kikru rei, tsiu süko nupfünuoko rei,

¹⁴ mu kikru lhiepie kebako, puopuo, tsiu süko nupfünuoko rei tuo.