Zekaria 11 - Angami Naga CL (Re-edited) Bible (BSI)

¹ N kikhako khrüshülie, he-i Lebanon, sitse mi-e n sedarboko thewatuo!

² Kralie, he-i saipresboko, kekreilamonyü sedarboko tetsute, kekreilamonyü seibo keviko pekawate! Kralie, Bashan nu phrieboko, kekreilamonyü tsapoko pekawate!

³ Rünyülie, kuopfheko kekra pfhe, kekreilamonyü uko thetshetherhu bie pesuowate! Rünyülie, loshako kemeho pfhe, kekreilamonyü Jordan tsa kesouko pekawate!

Kuopfhe Rhi Kenie

⁴ Jihova a Kepenuopfüe puya: Dukhriwaketuo tekuokro-u kepfhe chülie.

⁵ Süko khrükeliekoe uko dukhriya rei siazha pie tsüya mo; siro uko zekeshükoe sie, “Jihova bu keviu chülie, kekreilamonyü a mhanyilieketa la,” siya; tsiu uko kepfheko thuo zorei uko ngumezhieshü mo.

⁶ Kekreilamonyü ae kijü nu lhou ketuoko ngumezhie salie lho, Jihovae siya. A uko mia puopuokecü pie puo zanuou dzie nu shütuo, mu uko kha phrepie kediu dzie nu shüwatuo, sidi ukoe kijüu pekawatuo, mu uko dzie nunu a miapuorei kelashülie lho.

⁷ Süla a tekuo lhi chüyakezhako sou nu, dukhriwatuo ükezha tekuokro-u kepfhe chüte. A kethe kenie selie, puo za thopie Keneiu chü, kekreiu za pie Kezepuokechü üdi kie, sidi a tekuo vachü.

⁸ Siro thekhrü puo nu ae kuopfhemia se khawata; kekreilamonyü a uko gei shügeshühielie kenjüta, mu uko rei a mecüta.

⁹ Süla a sie, “A nieko kepfheu chülie lhote; siaketuou bu siatalie; pekawaketuoko pekawaliecie; mu peshapie keba kehoupuo bu rei huoniehuo chü cütacie!”

¹⁰ Ae a the Keneiu chülie di bietshewa, a themia pete ze dietseidiekho chükelieu rhüwata.

¹¹ Sünhie süu rhüwa, mu a meho ketha tekuo lhikechüko, süu Jihova die ücü silie.

¹² Sitse ae sie uko ki, “Süu n la puotouü liro, a zhako pie a tsüwalie, derei mhanuü si moüliro süko pie balie.” Sidi ukoe a zha rakachü shekel ser mejüshü.

¹³ Sitse Jihova a ki, “Süu kelhoupie kinyibou nu shüwalie.” Süue uko a ma tho pevikeshüu. Süla a rakachü shekel serko pielie di kelhoupie Jihova kiu kinyibouu nu shüwa.

¹⁴ Süsie a a the kenieu Kezepuokechüu bietshe lawa, Juda mu Israel unie kikru keseyie kebau bierhuowa.

¹⁵ Sitse Jihovae a ki pukecü: Va puo kuopfhemia kemethuo zokecüu vienyako chüse latacie.

¹⁶ Kekreilamonyü ae kijüu gei kuopfhemia puo pie siershütuo, puoe kakezhüko meholie lho, morei yoketuoko pfhülie lho, morei lalhiketau chü keshürho lho, morei keshürho-u vachülie lho, derei keluoko chü cülietuo, uko mouko zorei ciekhowatuo.

¹⁷ He-i, a kuopfhe kemethuokemeruo, puo kuokro khakewau! Zhiecha bu puo bou mu puo mhi puo zatsa biewalie! Puo bou bu sia tseitalie, puo mhi puo zatsatie bu cie tseitalie!