Zekaria 1 - Angami Naga CL (Re-edited) Bible (BSI)

Israel bu Thenou Kedilienu Pukeshü

¹ Darius dikelie cie kenie cie, khrü thethau nu Jihova die Ido tsuu, Berekia nuou Zekaria siedzekesiu ki vor di pukecü:

² Jihova nie puonuoko gei puo nei mo sete.

³ Süla uko ki pushülie, krodiko Jihovae puya: Rürei a ki vorlie, krodiko Jihovae puya, sitse a rei rürei nieko kitsa vortuo, krodiko Jihovae siya.

⁴ Nieko puonuoko kemhieta hie, siedzekesiko uko ki pukecü, “Krodiko Jihovae puya, nieko kekrükecü chako nu mu nie mhatho kesuoko nunu rüreiliecie.” Derei uko a pfhe morei a die rünyü mvüte, Jihovae siya.

⁵ Nie puonuoko, uko kirapuo tuota ga? Siro siedzekesiko, kechachie rhei batuo me?

⁶ Derei a dieko mu a zhoko, a kituo siedzekesiko ki pukeshüko, süko nieko puonuokoe sanyü mota mo üme? Siro uko thenou kedilie di sie, “Krodiko Jihovae chütuo üdi rhükelie mhiei u zhoko mu u mhathoko medzi di u gei mhachüshü.”

Ziemho Kerieu: Kierkeseko

⁷ Khrü kerepuokrüu nu zha mepfüedia nhie, Shebat-u khrü, Darius kedi chükelie cie kenie cie, Jihova die Ido tsuu Berekia nuou Zekaria siedzekesiu ki vor di sie,

⁸ theva geinu mia puo kier kemerie puo seketuo a ngu! Puoe razha nu mürtel seibo donu tha; mu puo sietsatie kier merie, rürhü tsiu kracü puo tuo.

⁹ Sitse a sie, “A niepuu, hako kedipuo ga?” Siru teigeidieliemia a rüchü kethau sie a ki, “Hako kedipuo shicü thapie n kieshütuo.”

¹⁰ Süla themia mürtel seiboko donu kethau a die kela di, “Hako Jihova uko bu kijü nu rühou ketuo la ketsekeshüko.”

¹¹ Süsie uko Jihova dielieu mürtel seibo donu kethau rüchü di sie, “Hieko kijüu gei rühou vowate, mu harie, kijü pete nu rei menetshüi ba zo,” si.

¹² Sitse Jihova dielieu sie, “He-i krodiko Jihova, Jerusalem mu Juda nadiko gei cie hiethenie n nei mo vorketau gei no kichiepuo ngukemezhieu khase ba zotieya ga?”

¹³ Sitse Jihovae teigeidielie a ze kerüchü kethau gei kemenuo mu thukepeluo dieko pushü.

¹⁴ Süla teigeidielie a ze kerüchü kethau a ki, dielie hau pushülie: Krodiko Jihovae puya; Ae Jerusalem mu Zion la a rothor bate.

¹⁵ Mu seyie rüütshüi kebako gei a nei mothor bate; kekreilamonyü a nei mo za bakecü ki, ukoe mha pekakecüu chü pesuokuoshü.

¹⁶ Jihovae puya, a ngukemezhie se rürei Jerusalem nu vor; a ki süu nunu chütuo, krodiko Jihovae siya, mu kemejüro-u teshüpie Jerusalem gei shütuo.

¹⁷ Tsie rei pu sashülie: Krodiko Jihovae puya: A nadiko kinyi bu ketsukeli chü lalietuo; Jihovae Zion thupeluo latuo mu Jerusalem keda lalietuo.

Ziemho Kenieu: Chükia mu Rükreimiako

¹⁸ Siro a mehoshü ru chükia dia ngu.

¹⁹ Ae teigeidieliemia a ze kerüchü kethau ketso di, “Mha hako kedipuo ga?” sishü ru puo a die kela di sie, “Chükia hako Juda, Israel mu Jerusalem kezapie lukihaki shüwaketako zo.”

²⁰ Süsie Jihova rükreimia dia thashü a kie.

²¹ Sitse a sie, “Uko kedipuo chütuo üdi vorzhü ga?” Puo a die kela di sie, “Chükia hako Juda bie kezakewako zo, süla miapuorei puo tsü pie sielie mota; derei hako uko kedeketuo la, seyieko uko kia pie Juda kezawatuo üdi petsoukecü kiako biekhrüshüketuo la vorte.”