Zefania 3 - Angami Naga CL (Re-edited) Bible (BSI)

Jerusalem Kerüzhü

¹ He-i mesa mo, mu perhukewa, pechüpenyükecü nadiu!

² Puoe mia pfhe rünyüya mo; puo chü kemezhükeshü lieya mo. Puoe Jihova peleya mo; puoe puo Kepenuopfü penuo vorya mo.

³ Sünu keba kezhakoe losha meho kebako zo; puo capiko sü thevatie socieko zo, teisolie kemochie laya mo.

⁴ Puo siedzekesikoe kehoukeruo chü, kepele kejü themia zo; puo zievokoe mha kemesako bie perhuwaya, ukoe thezho-u gei zhosuo chü.

⁵ Jihova puo kemiatho nunu; mhapuorei chü kekrüya mo. Teisoduü puoe capi chüshüya, khuduü rei chü motaya mo; derei thetou kemoko we thenga siya mo.

⁶ A seyieko dathewate; uko dahouko ruozhüte; a uko chako chü kemethuowa, süla süko nu miapuorei tuoya mote; uko nadiko chü peruowate, themia tuo mo, miapuorei lhou tuo mote.

⁷ Ae sie, “Ketho zo nadiu a preituo, puoe chü kemezhükeshü lielietuo; a puo gei chükeshüko pete puoe ngu motalie lho,” siya. Derei ukoe kenourhei u mhatho pete bie pesuowate.

Siazha mu Seyieko Thenou Kedikecü

⁸ Süla a pfhe baliecie, Jihovae siya, a zhapu khashütuoü kesie teisozhau. Kekreilamonyü a pepikelieu sü, seyieko teshü kenguketuo, kedirüvieko pfhü kengukelie, süko gei a nou kerüpe, a nouyie kesier pete rushüketuou zo; a nouyie miu pie kijüu pete the pejüwatuo.

⁹ Süki a themiako die chü kedipie kemesa die chüshütuo, sitse uko pete Jihova zau kielie sidi nou puo chü puo lie chülietuo.

¹⁰ Ethiopia nu kerüko khietsatie nu, a ki mhachayakezhako, a themiako cüreketuoko a ruosuo se vortuo.

¹¹ Sünhie n pie thenga nu shülie lho, no a perhiekecü mhatho pete chüwa zorei, kekreilamonyü a sünhie n donunu kemiako di u neiketuoko chüwatatuo, sidi noe a kemesa kijüthou geinu kerüzhakecü chü sa motatuo.

¹² Kekreilamonyü a n donu rünuo, tsiu menekecümia khashütuo. Ukoe Jihova za nunu rüzhükelie pfhütuo.

¹³ Lhiekelie Israelko, uko mha kesuo chü lho mu kemeda pu lho, morei kecürü meüu uko me nunu ngulie lho, ukoe nhaliecü mu ke zhü ituo rei, miapuorei uko chüpie uko bu michietalie lho.

Thenou Kenei Tsali

¹⁴ Keli petoshülie, He-i Zion nuopfü; shieshülie, He-i Israel! N melou pete se di shie mu n noumvüliecie; He-i Jerusalem nuopfü!

¹⁵ Jihova n petsoukecü chüsete, puoe n ngumvüko chü kereiwate. Israel kediu, Jihova sü n donu bate; noe kepeka prei sa morei vite.

¹⁶ Sünhie Jerusalem ki pushütuo; Michie hiecie, he-i Zion; n dzie bu thachüta hie.

¹⁷ Jihova, n Kepenuopfü n donu ba, terhümiavi kuokelie khashüyakecüu; puoe n gei puo nei mu puo noumvülietuo, puo kekhrie nunu n chü kesalietuo; puoe keli peto di n pu kerükrieshütuo.

¹⁸ Thenyi tei nhie tuoi di a n geinu kepeka chüwatuo, sidi süu la n kerhie sa motatuo.

¹⁹ Süki a n pesekecüko pete gei mhachüshütuo. Tsiu a phiyhoko kelalietuo mu kelhiwaketamia pfhü kengulietuo, sidi uko ngau chüpie ketshe mu kijü pete nu zayie chüshütuo.

²⁰ Süki a n ze kinu vortatuo, a n pfhü kengukelie teiki; kijü nu themia pete donunu n chü kemeyie mu n tsheshütuo, sidi n mhiki nu n ruo chü pevishütuo, Jihovae siya.