Zefania 2 - Angami Naga CL (Re-edited) Bible (BSI)

Israel Ngumvüko Ketsoketuo

¹ Vo kenguliecie, kenguliecie, he-i, menga kemo seyieu.

² Shübe tuoi nie he petakewa mhodzü, Jihova nouyie kemeriekecüu nie gei kevor mhodzü, Jihova noupfhü teisozhau nieko gei kevor mhodzü.

³ Jihova pfhüliecie, kijüu nie nou kerünuo peteko, puo diekhakeshü chüyakecüko; kemiatho pfhüliecie, rünuo menekecü pfhüliecie; Jihova noupfhü teisozha nhie nie kevielie rei silie lhomu.

⁴ Kekreilamonyü Gaza khawatuo, siro Ashkelon chü kemethuowatuo; Ashdod themiako khinhieluo geinu whuowatuo, tsiu Ekron phewatuo.

⁵ He-i, dzükezha khie lhou kebako, nie Keret seyieko we ce, chülietie! Jihova die nieko petsouya. He-i Kanan, Filistinmia kijü; mu a n peka zo vo miapuorei bu lhou motatuo.

⁶ Siro no, he-i dzükezha khieko khunuo tuo chütatuo, kuopfhemia phiechü mu tekuo tuo chüwatuo.

⁷ Dzükezha khie kijükoe Juda kiu lhiepie kebako vie chütatuo, sünunu uko nhaliecütuo, mu uko thevatie Ashkelon kiko nu zhütuo. Kekreilamonyü Jihova uko Kepenuopfü uko rükralietuo sidi uko miadie chü ketuo nunu ze la vorshütuo.

⁸ Ae Moabmia mia pesekecü, tsiu Ammonmia mia krenyükecü, uko kimhie di a themiako pese shicü, siro kerüzha di kijü rieko petsou shikecü site.

⁹ Süla, a rhei ketuo tuoi, Krodiko Jihova, Israelko Kepenuopfüe puya, Moab-e Sodom mhietatuo, mu Ammonmia Gomora mhietatuo, zozie mu kezie dzükhou zepfütatuo, sidi kechachie razhütatuo. A themia lhiepie kebakoe süko pekawatuo, tsiu a seyie rhei kebakoe uko pevielietuo.

¹⁰ Uko kemiakokecü la hau pie u yau chüshütuo, kekreilamonyü ukoe mia krenyü, tsiu kemelha di krodiko Jihova themiako petsoukecü la.

¹¹ Jihova kemerie chü di uko petsoutuo; puoe kijü nu terhuoko pekhe khriwatuo, tsiu uko puo ki nuketsutuo, u thuo u tha nunu, dzükezha khie thechü mu kijü rüchütsokemo seyie pete.

¹² Nieko rei, He-i Ethiopiako, a zhiecha bu nieko dukhriwatuo.

¹³ Siro puoe puo dzie yhapie pesotsako petsoutuo, mu Asiria pekawatuo; tsiu puoe Ninevi bie kemethuowatuo, kijükesia mhie chüpie sotowatuo.

¹⁴ Khunuo kro sünu zhütuo, nhachü kehoupuorei; kijükesia puchüü tsiu khruleinuopfü vo kiprü gei rüsetuo; vükhruo khirki nunu ruoshütuo, shüzha kezhapfü kifükhro nu ruotuo, sünu sedar seithoko methuo zhüketa la.

¹⁵ Hau puo nei keba nadiu khrukhre di lhou kebau, puo thuo puo üse, “A zo, mu a sie kekrei tuo mo,” iyakecüu mo me? Kedipuo mhie di rate shi, nhachü bu kezhü chü chüte! Kehoupuorei tuo puo cie kevo pete puo rütse mu puo dzie kesütuo.