Toukepra 8 - Angami Naga CL (Re-edited) Bible (BSI)

Guorünuo Chüpie Tshukewa

¹ Sitse Jihovae Mosa ki, “Faro ki vo di puo ki, ‘Jihovae puya: A themiako bu tuotacie, uko bu a lie chüketuo la.

² Mhanuü noe uko bu tuo mvüta ro, harie, a guorünuo pie n rüna pete pelhashütuo.

³ Nail nu guorünuo thuo tshutatuo, di süko n kinu lertuo, n zhübou nu tsiu n zhü gei votuo, siro n kituoko mu n themiako kiko nu, n miphuko nu mu thoukenekhouko nu rei votuo.

⁴ Guorünuokoe n gei mu n themiako tsiu n kituoko pete gei vortuo.’ ”

⁵ Siro Jihovae Mosa ki, “Aron ki pushülie, ‘N dzie nu n theu yhapie kerüko mho, dzükhouko mho, mu dzüthouko mho shülie, sidi guorünuo chüpie Ijipt kijü pete mho shüwalie!’ ”

⁶ Süla Aron Ijipt dzüko mho puo dzie yhashü; sitse guorünuoko par Ijipt kijü ketshu chülie.

⁷ Derei kemeduoko rei uko kepekhre doko se di sükemhie chülie, sidi guorünuoko ze vor Ijipt kijü nu shü.

⁸ Sitse Faroe Mosa mu Aron kieshü di unie ki, “Jihova bu a kinu tsiu a themiako kinu guorünuoko setanu di chashücie; sitse themiako bu vo Jihova ki ruosuo chüketuo la a uko bu tuolietuo.”

⁹ Mosae Faro ki, “N la mu n kituoko la tsiu n themiako la, n gei siro n kiko nunu guorünuoko bie pejüwa di uko bu Nail rüu nu rübei batanukecü, kicükipuo chashü ro n nei shi, pushülie.”

¹⁰ Puoe sie, “Sodu,” sishü. Mosae sie, “Süu bu n kepu mhieliecie, sidi n bu Jihova hie Kepenuopfü tuoikecü miapuorei ba kemo silieketuo la.

¹¹ Guorünuoko n gei mu n kiko nunu tsiu n kituoko siro n themiako kinu tuotatuo, ukoe Nail rüu nu rübei bacü zotatuo.”

¹² Süsie Mosa mu Aron unie Faro kinu tuo prata, sidi Mosae guorünuoko la Jihova ki chashü, puoe Faro ze kepfhekhokeshü tuoi di.

¹³ Siro Jihovae Mosa die kemhie chüshü; guorünuokoe kiko nu, phetsuoko nu mu lieko nunu siata.

¹⁴ Sidi uko süko pfhü kengupie pfhepie zhüwa mu kijüu menachüta.

¹⁵ Derei Faroe rüü lakelie ngushü tse, puo nou re lata di unie die rünyü mvüta; Jihova pukeshü mhiei.

Mimhienuo Chüpie Tshukewa

¹⁶ Sitse Jihovae Mosa ki, “Aron ki pushülie, ‘N theu yhapie kijü nu nyopheko vüshüyi, uko bu Ijipt kijü pete nu mimhienuo chülieketuo la.’”

¹⁷ Sitse unie sükemhie chüshü; Aron-e puo dzie nu ketheu yha se kijü nu nyophe vüshü, ru mimhienuo themia mu khunuoko gei vorta; Ijipt kijü nu nyophe pete mimhienuo chüta.

¹⁸ Siro kemeduoko rei uko kepekhre doko se di mimhienuo se parshütuo üdi thehie chü, derei chülie kenjüta. Sidi mimhienuo themia gei mu khunuo gei tshuta.

¹⁹ Sitse kemeduokoe Faro ki, “Hau we Kepenuopfü dziekinuoute.” Derei Faro nou chü perewa, sidi puoe unie die rünyü mvüta; Jihova pukeshü mhiei.

Teizie Chüpie Ijipt Tshukewa

²⁰ Süsie Jihovae Mosa ki, “No khiserüna sielie, di Faro kerü nu vokecü ki puo ze kesecie, sidi puo ki, ‘Jihovae puya: A themiako bu tuotacie, uko bu a lie chüketuo la.

²¹ Mo di, mhanuü no a themiako bu tuo mvü ro, harie, a teizie krodi ketsepie n gei siro n kituoko gei tsiu n themiako gei mu n kiko nu shütuo; siro Ijiptmia kiko nu mu uko keba pheko nu rei teizie bu tshutatuo.

²² Derei sünhiesü a Goshen kijü, a themia bayakecüu kho pekreishütuo, sidi sünu teizie krodi puorei bu balie lho, n bu kijü hau nu a Jihovae ba zo ücü silieketuo la.

²³ Sidi ae a themiako mu n themiako kho kekreishütuo. Zasi hau sodu batatuo.’ ”

²⁴ Mu Jihovae sü kemhie chüshü; teizie krodidi chü Faro kinu tsiu puo kituoko kinu vorta, mu Ijipt kijü pete nu teizie la kijüu bie pesuowa.

²⁵ Süsie Faroe Mosa mu Aron unie kielie di sie, “Volie, di kijü hau nunu nie Kepenuopfü ki ruosuo chüliecie.”

²⁶ Mosae sie, “Süu sidi chükecü puotoulie lho; hie-e Jihova hie Kepenuopfü ki ruosuo kechü Ijiptmiako mhodzü mha kerütse kro puo zotuocü la. Mhanuü hie Ijiptmiako mhingu nu chüshü ro, uko ketsie pie hieko vatalie lho me?

²⁷ Hieko rayha nu zha se tuo nu vo di Jihova hie Kepenuopfü hie ki diekhakeshü tuoi ruosuo chü morosuo bei zo.”

²⁸ Süla Faroe sie, “A nie bu vo rayha nu Jihova nie Kepenuopfü ki ruosuo chüketuo la voketuo khashütuo, tuou tuo pecie se vota hie; a la nie Kepenuopfü ki chashücie.”

²⁹ Süsie Mosae sie, “Harie, a n ki nu tuo pratazhie mu a teizie krodiko bu Faro kinu, puo kituoko kinu mu puo themiako kinu sodu tuotaketuo la Jihova ki chashütuo. Faro bu cürü lata hie, themiako bu vo Jihova ki ruosuo chüketuo khashü mvü lata di.”

³⁰ Süla Mosae Faro ki nu prata di Jihova ki chashü.

³¹ Sitse Jihovae Mosa chakeshü tuoi chüshü, sidi teizie krodiko Faro gei, puo kituoko kinu, mu puo themiako kinu yopuorei ba sa mota.

³² Derei tsieu va rei Faro puo nou re lata, sidi themiako bu tuo mvüta.