Toukepra 7 - Angami Naga CL (Re-edited) Bible (BSI)

¹ Sitse Jihovae Mosa ki, “Mehoshüyi, a Faro mhodzüki n pie Kepenuopfü tuoishütuo, mu n dzürieu Aron bu n siedzekesiu tuoishütuo.

² A n ki pukeshü pete noe pushü morosuo, mu n dzürieu Aron-e Faro bu puo kijü nunu Israelko bu pratanucü pu morosuo.

³ Derei a Faro nou chü perewatuo, mu a Ijipt kijü nu zasiko tsiu u ngoko chü phishütuo.

⁴ Sirei Faro nieko pfhe rünyülie lho, sitse ae a dzie pie Ijipt kijü gei shütuo, kepejo kere se di Ijipt kijü nunu a krodiko, a themia Israel nuonuoko ze parshütuo.

⁵ Sitse Ijiptmiakoe a Jihova zo ücü silietuo, a a dzie yhapie Ijipt gei shü di uko donunu Israelko ze parkelie ki.”

⁶ Sitse Mosa mu Aron unie sükemhie chülie, unie-e Jihova unie ki diekhakeshü kemhie chülie.

⁷ Siro unie-e Faro rüchükecü ki Mosae cie hiethethata mu Aron-e cie hiethethaeseta.

Aron Theu

⁸ Jihovae Mosa mu Aron unie ki,

⁹ “Faroe nnie ki, ‘Ungomhatho puo chüshüyi,’ iro, noe Aron ki, ‘N the pielie di kelhoupie Faro mhodzünu shücie, sitse süu tinyhü chülietuo.’ ”

¹⁰ Süla Mosa mu Aron unie Faro mhodzünu vo di Jihova unie ki diekhakeshü kemhie chüshü; Aron-e puo theu kelhoupie Faro mu puo kituoko mhodzünu shüshü, sitse süu tinyhü chüta.

¹¹ Sitse Faro rei puo themia mhakesithoko tsiu themouko kieshü, mu Ijipt nu kemeduoko rei uko kepekhre do se di sükemhie chüshü.

¹² Uko pete rei u theu kelhoushü, mu süko tinyhü mevita; derei Aron the-e uko theko mezulieta.

¹³ Sirei Faro meloue re ba zo, mu Jihova pukeshü tuoi di, puoe unie pfhe rünyü mvüta.

Dzü Chüpie Thezie Mevikewa

¹⁴ Sitse Jihovae Mosa ki, “Faro nou chü perewate, puoe themiako bu tuo mvü ba zo.

¹⁵ Khise Faro ki vocie, puoe dzü nu voyacü la; kerü khie nu puo pfhe thalie, siro n dzie nu kethe tinyhü mevikelieu selie.

¹⁶ Mu no puo ki, ‘Jihova, Ibriko Kepenuopfü, a ketsepie n ki shü di pucü, “A themiako bu tuotacie, uko bu rayha nu a lie chüketuo la,” si. Derei no tsie rei die süu ze mo ba zoluo.

¹⁷ Jihovae puya, “Hageinu noe a Jihova zo ücü silietuo.” Harie, a a dzie nu keba ketheu pie Nail rü nu dzüu vüshütuo, sitse süu thezie mevitatuo.

¹⁸ Tsiu Nail rüu nu khuoko siatatuo, mu kerüu menachütatuo, tsiu Ijiptmiako Nail rüu nu dzü krie mecütatuo.’ ”

¹⁹ Jihovae Mosa ki, “Aron ki pushücie, ‘N theu pielie di n dzie yhase Ijipt dzüko mho, kerüko mho; dzüchako, dzükhouko, mu dzüthouko pete mho shücie, di uko bu thezie mevitalie; sidi Ijipt kijü pete nu thezie batatuo, seikhouko nu rei mu ketsiekhouko nu rei.’ ”

²⁰ Mosa mu Aron unie-e Jihova diekhakeshü kemhie chüshü; Faro mu kituoko mhinguki nu puo theu yhapie Nail rüu nu dzüko vüshü, ru Nail rüu nu dzü pete thezie mevita.

²¹ Sidi Nail nu khuoko siata, sitse Nail rüu menata; sidi Ijiptmia bu Nail rüu nunu dzü krielie kenjüta, mu Ijipt kijü pete nu thezie tuota.

²² Derei Ijipt nu kemeduoko rei uko kepekhre doko se di sükemhie chüshü; süla Faro nou khrü ba zota, sidi puoe Jihova kepu mhiei di unie die rünyü mvü ba zota.

²³ Faroe rüreilie di tuo puo kinu vota, mu puo hau rei pie puo nou shü mo zo.

²⁴ Siro Ijiptmia pete dzü kekrie la Nail rüu khie nu dzükhou ho, ukoe Nail rüu nunu dzü krielie kenjüketa la.

²⁵ Jihovae Nail rüu vükeshü sie zha thenie vota.