Toukepra 40 - Angami Naga CL (Re-edited) Bible (BSI)

Rüsuopfhekiu Chü Kemesakelie

¹ Jihovae Mosa ki:

² Khrü kerieu zha puo nhie noe kemesachü rüsuopfhekiu pethoulie morosuo.

³ Mu no dietseidiekhobou pie sünu batuo, siro no keyapfhe pie süu yatuo.

⁴ Mu no mizhüu se ler di mha khapie sügei ba touwatuo; mu noe mitubau se ler di mitubouko pie puobako nu shülie morosuo.

⁵ Mu noe kethengu kethe la suna ruosuobau pie dietseidiekhoubouu, mhodzünu shülietuo, tsiu rüsuopfhekiu kikha la puokeyau lhawatuo.

⁶ Noe kethe ruosuo kechü ruosuobau pie kemesachü rüsuopfhekiu kikha mhodzünu shülietuo,

⁷ di seikhou pie rüsuopfhekiu mu ruosuobau unie donu shütuo, di dzü pie sünu shülietuo.

⁸ Tsiu noe kitiezhau keselietuo, mu kitiezha care la keyapfheu lhawatuo.

⁹ Süsie noe kenhekecü tier-u selie di rüsuopfhekiu siro puo nu keba mha pete kenhewatuo, di süu mu puonyapuora pete chü kemesawatuo; sitse süu mesatatuo.

¹⁰ No kethe ruosuo kechü ruosuobau rei mu puo nyako pete rei tier pie kenhewatuo; di ruosuobau kemesatho chütatuo.

¹¹ Noe seikhouu mu puo kedoubau rei tier pie kenhetuo, di süu chü kemesatuo.

¹² Süsie noe Aron mu puo nuo thepfuko ze rüsuopfhekiu kikha nu vor di dzü pie uko khrüwatuo,

¹³ di Aron gei kemesa pfheneiko khashütuo, tsiu noe tier pie puo kenheshü di puo chü kemesatuo, puo bu zievo chü di a lie chüketuo la.

¹⁴ Noe puo nuo thepfuko rei ze vor di boulie pie uko gei shütuo,

¹⁵ di tier pie uko puou kenhekecü tuoi uko kenhetuo, uko bu zievo chü di a lie chüketuo la; mu uko kenhekewau la mu uko nuosenuoyie bu kechachie zievo chüketuo pie uko tsüwatuo.

¹⁶ Mosae hakemhie chülie, Jihovae puo ki diekhakeshü kemhie di puoe pete chülie.

¹⁷ Siro cie kenie cie, khrü kerieu nu, khrülhou zha kerie nhie rüsuopfhekiu pethoulie.

¹⁸ Mosae rüsuopfhekiu pethoushü; puoe puo phitouko khapie balie, puorako doulie, mu puo seizoko pelilie; di puo coko doulie;

¹⁹ di puoe dzüpfheu pie rüsuopfhekiu mho whelie, di pfheki kewheu pie sügei shülie, Jihovae Mosa ki diekhakeshü tuoi.

²⁰ Siro puoe dietseidiekho-u pie dietseidiekhobouu nu shülie, di seizonie pie dietseidiekhobouu gei shülie mu ngukemezhie bau pie dietseidiekhobou mhogei shülie;

²¹ mu puoe dietseidiekhobouu pie rüsuopfhekiu nu lerlie, di keyapfheu lhalie, di keyapfheu pie dietseidiekhobouu yawa; Jihovae Mosa ki diekhakeshü tuoi.

²² Puoe mizhüu pie rüsuopfhekiu nu, kemesachüu pesotsatie, keyapfheu chazoutsa shülie,

²³ di niekhrüdau pie süu mho menuo di Jihova mhodzünu balie, Jihovae Mosa ki diekhakeshü tuoi.

²⁴ Puo mitubau pie rüsuopfhekiu nu, kemesachüu pekhrotsatie mizhüu rütsietsa shülie,

²⁵ mu mitubouko pie Jihovae mhodzünu shülie; Jihova Mosa ki diekhakeshü tuoi.

²⁶ Puoe suna ruosuobau pie rüsuopfhekiu nu keyapfheu mhodzünu shülie,

²⁷ di sü geinu kethengu puore kevi theshü, Jihovae Mosa ki diekhakeshü tuoi.

²⁸ Puoe rüsuopfhekiu kikha la keyapfheu pie puochü nu lhalie.

²⁹ Siro puoe kethe ruosuo kechü ruosuobau pie kemesachü rüsuopfhekiu kikha ki balie, di sügei kethe ruosuo mu telha ruosuo khashü; Jihovae Mosa ki diekhakeshü tuoi.

³⁰ Puoe seikhouu pie rüsuopfhekiu mu ruosuobanie donu shülie, di kekhrü la dzü pie sünu shülie,

³¹ süu pie Aron tsiu puo nuo thepfuko bu u dzie metei mu u phi khrü,

³² ukoe rüsuopfhekiu nu kele ki, mu ukoe ruosuobau penuo kevo ki, ukoe u khrüya, Jihovae Mosa ki diekhakeshü tuoi.

³³ Puoe kemesachüu mu ruosuobau khieümhou kitiezhau chülie di kitiezha careu keyapfheu khapie balie. Sidi Mosae mhatho-u chü tseilie.

Rüsuopfhekiu Mhogei Kimhouu Baketa

³⁴ Süsie kimhou ker rüsuopfhekiu zelie, mu Jihova zapuzayieu thuo rüsuopfhekiu tshuta.

³⁵ Ru Mosae rüsuopfhekiu nu lelie kenjüta, kimhouue sügei baketa la mu Jihova zapuzayieu thuo kemesachüu tshuta.

³⁶ Uko rüve pete nu, rüsuopfhekiu mhonu kimhouu sesieta ro Israelmiakoe tuoshütuo;

³⁷ derei kimhouu sieta moro, ukoe tuoshü mo zo ba süu sesieketa tsoya.

³⁸ Uko rüve pete nu Israel kinumia peteko mhingu nu khinhie gei ro Jihova kimhoue kemesachüu mhogei ba, mu theva gei ro sünu mi tu batatayacü la.