Toukepra 39 - Angami Naga CL (Re-edited) Bible (BSI)

Zievoko Pfhenei Kechü

¹ Siro ukoe kelo keloshü, teimezie, mu merieyharakecüko pie kemesachüu nu seketuo la pfhenei zivi sekecü chülie; ukoe Aron la kemesa pfheneiko chülie; Jihovae Mosa ki diekhakeshü mhiei.

² Tsiu puoe suna mu keloshü, teimezie, merieyhara siro linen puolo mese mu megeikecü pie zievoboulieu chülie.

³ Tsiu puoe suna ketoudapie rüpfüpfelie di bepie kelo chülie, di pie keloshü, teimezie, mu merieyharakecüko linen la kemese kesalie di se puokhu zivi sekecü pfhenei do menuolie.

⁴ Uko zievoboulie la puo boukanie kerha chülie di puomhounie pie sügei zu kesalie.

⁵ Tsiu boulieu mhogei chiepha chüketuo la do menuo di chükecüu puolo siro puo mhatho rei kemhie, suna mu kelo keloshü, teimezie, siro merieyharakecü tsiu linen puolo kemese mu megeikecü pie chü, Jihovae Mosa ki diekhakeshü tuoi.

⁶ Siro zasikevü gei leshükhu kethu tuoi onix tsienie gei Israel nuonuo thepfuko za thulie di suna kechiepie sünie peralie.

⁷ Tsiu puoe sünie pie zievoboulie boukanie kerha gei shülie. Israel nuonuoko kerükra tsie chüketuo la; Jihovae Mosa ki diekhakeshü tuoi.

⁸ Puoe merükewheu chülie, zievoboulie kechü tuoi, suna, kelo keloshü, teimezie, merieyharakecü linen puolo mese mu megeikecü pie kemenuo rhitho chülie.

⁹ Süu puocha puozha ketou; merükewheu kekhre, mu kekhreshü ro puocha puozha pfü puo phre.

¹⁰ Tsiu ukoe sügei ketsie cha dia pie kulie. Siro karnelian, krisolit mu emerald se cha kerieu chü.

¹¹ Turkuois, safir mu moonston se cha kenieu chü.

¹² Jasint, agat mu amethist se cha seu chü.

¹³ Siro beril, onix tsiu jasper se cha diau chü, mu suna kechiepie süko zu kesalie.

¹⁴ Israel nuonuo thepfuko za medzi di ketsie kerekenie tuo; zasikevü tuoi, puotse gei puo za thu, seyie kerekenieko la.

¹⁵ Tsiu ukoe merükewheu gei suna ketho pie kero kepeü tuoikecü chülie;

¹⁶ siro ukoe suna kechiekecü kenie mu suna rohou kenie chülie, di suna rohounie pie merükewheu mhounie gei shülie;

¹⁷ tsiu ukoe suna ronie pie merükewheu mho gei rohounie nu pelilie.

¹⁸ Suna ronie tie pie suna kechiekecü gei khelie; sidi ukoe süu pie zievoboulie mhodzütsa shü di u bouka kerhanie gei khelie.

¹⁹ Siro ukoe suna rohou kenie chülie, di sünie pie merükewheu khienie nu shülie, zievoboulieu keku puonutsa mhou gei.

²⁰ Süsie ukoe suna rohou kenie chülie, di sünie pie zievoboulie mhodzütsa boukanie kerha pekhrotsa khelie, zievoboulie chiepha do menuokecüu mho kemethoukecü nu.

²¹ Tsiu ukoe mha kepha puo pie rohouko nu shülie di merükewheu zupie zievoboulie sa kesalie, sidi süu bu zievoboulie gei menuo di dopie keba chiephau gei balie, merükewheu bu zievoboulieu geinu rülhe parta molieketuo la; Jihovae Mosa ki diekhakeshü tuoi.

²² Puoe kelo keloshü rübei pie zievoboulie kerütshu dolie;

²³ mu boulieu nu kecieu puo bu rürhata molieketuo la puo khie kemvü.

²⁴ Boulieu chieca mhou gei, ukoe kelo keloshü, teimezie siro merieyharakecü tsiu linen puolo mese mu megeikecü pie turaü si kemhiecü rhi,

²⁵ ukoe suna ketho pie thetsei rei chü di thetseiko pie boulieu chieca gei turaü siko donu shü;

²⁶ thetsei puo mu turaü si puo, thetsei puo mu turaü si puo idi lietho nu kese boulieu phi khie whi vo; Jihovae Mosa ki diekhakeshü tuoi.

²⁷ Ukoe Aron mu puo nuo thepfuko la linen kemese dopie uko boulie chülie,

²⁸ tsiu linen kevi pie tsüze mu tsüreko chülie, siro linen lo mese mu megeikecü pie pfhenei pekhroko dolie.

²⁹ Mu chiephau linen lo mese tsiu megeikecü mu kelo keloshü, teimezie mu merieyharakecü thepre pie puokhu ka; Jihovae Mosa ki diekhakeshü tuoi.

³⁰ Siro ukoe suna ketho pie kemesa tsüreu gei keshü mekhou kemhieu chülie, di sügei zasi gei keshü khu tuoi di, “Jihova ki mesakeshü” icü thulie.

³¹ Siro ukoe mha kepha keloshükecü pie süu khielie, pie pesogei tsüzeu gei pfüketuo la; Jihovae Mosa ki diekhakeshü tuoi.

Rüsuopfhekiu Chü Tseikelie

³² Hamhie di rüsuopfhekiu tho pete chü tseilie, mu Jihovae Mosa ki diekhakeshü tuoi Israelkoe pete chülie; ukoe sükemhie chülie zo.

³³ Siro ukoe rüsuopfhekiu se Mosa ki vor, pfhekiu, puo li peteko, puo cawiko, puorako, puo kiphiko, puo coko, siro puo phitouko;

³⁴ tekuo zhürekewa tsiu temvü zhü pie puo kewhe kechüu rei mu puo keyapfheu,

³⁵ dietseidiekhobouu siro puo seizonie mu ngukemezhie bau rei;

³⁶ mizhüu mu puo nyako pete sa, kepekieniekhrüdau rei;

³⁷ suna ketho pie chükecü mituboubau, puo mitubouko tsiu mhanyako pete pie uko bako nu ba phrelie, mu kepetu tier rei;

³⁸ suna ruosuobau, u kenhekecü tier-u siro kethenguu; rüsuopfheki kikhau la keyapfheu;

³⁹ mese ruosuobau, mu mese dorüu, puo seizonie tsiu puo nyako pete; seikhou siro puo kedoubau;

⁴⁰ kitiezhau keyapfheko, puo coko, tsiu puo phitouko, mu kitiezha la keyapfheu, puo roko, tsiu puo seizhieko; mu rüsuopfhekiu nu liethoko la, siro mechükehou rüsuopfhekiu la mhanya pete;

⁴¹ kemesa thechüu nu lietho la pfhenei menuo di chükecüko, Aron zievo la kemesa pfheneiko, mu puo nuo thepfuko bu zievo kechü la uko pfheneiko.

⁴² Jihovae Mosa ki diekhakeshü tuoi, Israelmiakoe mhatho pete chülie.

⁴³ Mu Mosae mhatho pete meho sie ru harie, ukoe chülieta; Jihovae diekhakeshü tuoi, ukoe sümhie chülie. Sitse Mosae japie uko tsüshü.