Toukepra 37 - Angami Naga CL (Re-edited) Bible (BSI)

Dietseidiekhobouu Kechü

¹ Bezalel-e akasia sei pie dietseidiekhobouu chülie; puocha thu kenie di puotie, puozha thu puo di puotie, mu puo rükrie thu puo di puotie.

² Siro puoe puo nukou rei mu puo mho rei suna ketho pie dalie, tsiu suna pie puo toucha puo chüpie puo whilie.

³ Siro puoe süu la suna rohou dia chülie, puoke diako la. Puo khie tietsapuo la rohou kenie mu puo khie kekreitsa la rohou kenie.

⁴ Mu puoe akasia sei pie seizo kenie chülie, di suna pie sünie dalie,

⁵ sidi seizonie pie dietseidiekhobouu khie nu pelilie, dietseidiekhobou pieketuo la.

⁶ Siro puoe suna ketho pie ngukemezhie ba puo chülie; puocha thu kenie di puotie, mu puozha thu puo di puotie.

⁷ Siro puo suna ketoupie cherub kenie chülie, metevü pie ketou di pie ngukemezhie bau tienie gei shülie,

⁸ cherub puo puotie tietsapuo, mu cherub puo puotie kekreitsa; ngukemezhie bau ze chü puo chü di puoe cherubnie chüpie puotienie gei shülie.

⁹ Cherubnie unie zie pie kepetsou di unie shü kelhapie ngukemezhie bau whe; cherubnie zie pie ngukemezhie bautsatie va.

Ruosuo Mizhüu Kechü

¹⁰ Puoe akasia sei pie mizhüu rei chülie, puocha thu kenie, puozha thu puo; mu puo rükrie thu puo di puotie,

¹¹ tsiu puoe suna ketho pie süu dalie, mu puoe suna ketho pie puo toucha puo chüpie süu whilie.

¹² Siro puoe puokhie keya puozha u dziezhü de puo chüpie puo whilie, di suna pie puo toucha puo chüpie puokhieu whilie.

¹³ Puoe süu la suna rohou dia chülie, di rohouko pie puoke diako nu puophi diako gei shülie.

¹⁴ Mizhüu pieketuo la seizonie se pelilie kevi rohou diako pie mizhü khie keyau kepenuoki shü,

¹⁵ mu puoe akasia sei pie seizonie chülie di suna pie dalie.

¹⁶ Siro puoe suna se mizhü gei khapie baketuo mhakhouko tsiu kethengu kethekhouko, puo hieko mu kekrie ruosuo rushüketuo chülie.

Mitubau Kechü

¹⁷ Puoe mitubau rei suna ketho pie chülie, süu ketoupie mitubau phi mu puo co-u chü; puo hieko, puo tsüko, tsiu puo pou kreko puo ze kesa chü puo zo.

¹⁸ Siro puotsei nunu puo co sorou pra, mitubau co se puotsei tietsa, mu mitubau co se puotsei kekreitsa idi.

¹⁹ Tehie se, almond phro tuoi, puoco puo gei puo pou keze kre siro puo nou kre sa phre, tsiu puoco kekreiu gei tehie se, almond phro tuoikecü puo pou keze kre mu puo nou kre sa phre, sümhie mituba geinu kepra puoco kekrei sorouko tse gei,

²⁰ siro mitubau gei zokecü tehie dia chüpie almond si tuoikecü puo tshü tsiu puo pouko, sa di ba,

²¹ mu puoco sorouko donu kenie kekhekhekecü khro nu puo tshü puo sa chü puo zokecü puo ba.

²² Uko tshüko mu uko coko puo ze chü puo zo; pete suna ketho, chü puo chü di metevü se ketou di chü.

²³ Siro puoe süu la mitubou thenie, puo kebeko mu puo khouko suna ketho pie chülie.

²⁴ Puoe suna ketho talent puo pie hau mu puo khou puo hie pete chülie.

Kethengu Ruosuobau Kechü

²⁵ Puoe kethengu ruosuobau akasia sei pie chülie, puocha thu puo, siro puozha thu puo; puocha puozha ketou tsiu puo rükrie thu kenie; mu süu gei puo kiakoe chü puo.

²⁶ Puoe suna ketho pie süu da, puomho, puo khieko mu puo kiako rei, siro puoe suna pie puo toucha puo chüpie süu whi.

²⁷ Siro puo toucha khro nu suna rohou kenie chüpie lutsahatsa shülie; seizonie pie pelilie di süu pielieketuo la.

²⁸ Mu puoe akasia sei pie seizonie chülie, di suna pie süu dalie.

²⁹ Puoe kenhekecü kemesa tier-u rei chülie, mu kethengu kemesau rei, tier kethengu kechümia mhatho tuoi di chülie.