Toukepra 34 - Angami Naga CL (Re-edited) Bible (BSI)

Tsiekra Kenieu

¹ Jihovae Mosa ki, “Tsiekra kenie, kerienie tuoikecü phrolie, siro ae no tsiekra biephrowaketa nie gei thukeshü dieko se tsiekranie gei thu lashütuo.

² Khise dojülie, di Sinai kijüthou gei khorlie, di kijüthou mezü geinu n khapie a mhodzünu shülie.

³ Miapuorei bu n ze khor hie mu kijüthouu gei mia puo bu rei tuo di ngu hie, tekuokro morei mithu kro puorei bu kijüthou süu mhodzünu nha pfhücü hie.”

⁴ Süla Mosae tsiekra kerienie tuoikecü kenie phrolie; mu puoe khiserüna sie di Sinai kijüthou gei kholie, Jihova puo ki diekhakeshü tuoi, mu puo dzie nu tsiekranie pietuo.

⁵ Siro Jihovae kimhou nunu ker puo ze thalie di, “Jihova” icü thezau se pesishü.

⁶ Jihovae puo mhodzünu pfüthe phi di pukeshü, “Jihova, Jihova, noushünouzhie kenyi mu mia ngukemezhie Kepenuopfü, puo nou meyie tho, rüdi kemo kekhrie mu kemiatho puo tshu ba,

⁷ Thephou nyienyie la rüdi kemo kekhrie khapie baya, jokewa, moukewa mu phoumakewa vashüyakezhau, derei kejo kechümia we khashü mvü beiyakecüu, sidi u krü kephouma la u nuonuo nuonuo gei, phou se phou dia ketso rei siazha khashüyakecüu.”

⁸ Sitse Mosae rükri nuke kijü tsu di rüsuota.

⁹ Mu puo sie, “A tsie n mhiki n khriepfülieta üro, he-i Niepuu, a n ki chaya, Niepuu bu hieko ze vocie, hiekoe pietsümvükecü themia kro puo zo ürei mu hie kejo mu hie kephouma vashü, di n kayie la hieko zeliecie.”

Dietseidiekho-u Chü Kesa Lakelie

¹⁰ Mu puoe sie: Harie, ae dietseidiekho puo chüshüzhie. Nie themia pete mhodzünu ae mha u ngokecü, kijü pete nu, mu seyie puo nu rei chüshü chie kemo chüshütuo; mu nie uko donu keba themia süko pete bu Jihova mhatho ngushütuo; ae nieko ze mha u ngo zokecü chüketuo la.

¹¹ A thie n ki diekhakeshüu zeliecie. Harie, a n mhodzünu Amorko, Kananko, Hitko, Perizko, Hivko mu Jebusko whuowatuo.

¹² Kijü hanu lhou keba themiako ze dietseidiekho chü molieketuo le terüliecie, süu nieko la ciephrie puo chütatuomu.

¹³ No uko ruosuobako biewatuo, mu uko coko bietshewatuo, mu uko Asherako wiwatuo,

¹⁴ (Noe terhuo kekrei puorei rüsuolie lho, Jihova puo za sü Urokecüu, puo rokenyi Kepenuopfü puo zocü la).

¹⁵ Noe kijü hanu themiako ze dietseidiekho chülie lho zo, kekreilamonyü siümha ro, ukoe thethe lie di uko rhuoko rüsuo mu ruosuo chüpie uko rhuoko ketsü ki mia nie kie di nie bu uko ruotho muou cüwa rei si mocü la.

¹⁶ Sitse nie uko nuopfüko liepie nie nuonuo thepfuko tsü mu uko nuopfükoe thethe lie di terhuo rüsuokecü ki nie nuo thepfuko bu rei uko ze thethelietatuocü la.

¹⁷ No terhuorhiko chü lho.

¹⁸ No khreiüshükemo niekhrüdanyiu nyituo. A n ki diekhakeshü tuoi Abib-u khrü puotei chiekeshü ki zha thenie khreiüshükemo niekhrüda cütuo; noe Abib-u khrü Ijipt nunu ta parkelie la.

¹⁹ Penuo kerieu pete a vie, nie kirinuo donu puochü pete, mithu mu tekuo rei penuoshü kerieu.

²⁰ Gada penuolie kerieu la no tekuonuo puo pie puo rhatuo, morei puo rha moro, puo vo bietshewatuo. N nuo thepfu penuolie kerie pete noe rha morosuo. Mu mia puo bu rei methuo di a ki vorlie lho.

²¹ No zha sorou mhachütuo, derei zha thenie nhie noe rüleituo; khouhie teiki rei mu lieyie teiki rei noe rüleituo.

²² Mu noe zhadoudonyi pie batuo, thoulha chieshü kerieu mu teicie thela ki lieyienyiu rei.

²³ Cie puo nu va se n nuo thepfukoe Jihova nie Kepenuopfü, Israel Kepenuopfü mhodzü vortuo.

²⁴ Ae n mhodzünu seyieko whuowatuo, di n kijü rie chü kemeyashüketuo la; siro no cie puo nu va se Jihova n Kepenuopfü ki khokecü ki, mia puo bu rei n kijü mehoulie lho.

²⁵ “No khrei sa di thezie ruosuo chüpie a tsülie lho; morei ciekevonyi ruotho-u rei khapie ba khise tsolie lho.

²⁶ N lie nu chieshü kerie kevitho-u se Jihova n Kepenuopfü ki vortuo. No temvünuo pie puo krü nudzü nunu chalie lho.”

²⁷ Mu Jihovae Mosa ki, “Die hako thulie, die hako geinu ae no mu Israel ze dietseidiekho puo chüwate.”

²⁸ Siro puo sünu teisozha hiedia mu teizeizha hiedia Jihova ze bata; puoe mha rei cü mo, dzü rei krie mo mu puoe tsiekranie gei dietseidiekho dieko, diekhakeshü kerko thulie.

Mosa Kijüthou geinu Keker

²⁹ Mosae Sinai kijüthou geinu kerta. Mu puoe kijüthou geinu dietseidiekho tsiekranie pie di kercü ki, puo zieu ziekruoi tuota. Sirei puoe süu si tuo mo, puoe Ukepenuopfü ze kerüchükecü la.

³⁰ Derei Aron mu Israelmia pete Mosa ngu tse, harie, puo zie ziekruoi tuota, süla ukoe puo penuo phir michieta.

³¹ Derei Mosa uko kieshü; sitse Aron mu kehou krüta pete puo ki vor, sidi Mosa uko ze kerüchü.

³² Mu kenuotsa Israelmiako pete puo penuo vor, sitse puoe Jihova Sinai kijüthou geinu puo ze kerüchü di diekhakeshü pete pie uko tsüshü.

³³ Siro Mosa uko ki die pu tseiwa tse, puo zie keya puo pie puo zie yawa;

³⁴ derei Mosae Jihova rüchütuoü puo mhodzünu kevo ki, puo zie keyau biewaya, puoe la parta kemochie;

³⁵ tsiu puoe la par di Israelko ki diekhakeshüko pu ro, Israelkoe Mosa zie ziekruoiketa nguya; mu Mosae puo zie keyau pie puo zie ya lalieya. Puoe Jihova ze kerüchütuo üdi la le kemochie.