Toukepra 31 - Angami Naga CL (Re-edited) Bible (BSI)

Bezalel mu Oholiab

¹ Jihovae Mosa ki:

² Mehoshüyi, ae Juda yiemia Hur nuou Uri, süu nuou Bezalel kedaliete;

³ mu a Kepenuopfü ruopfüu pie puo tsüwate, mhachülie kevi mu kemecie, mhasi tsiu mhakechü do pete,

⁴ mhachü kezivi sikecü, suna, rakachü tsiu mese se mhachükecü nu rei,

⁵ ketsie phro mu sei kepie mhachükecü nu rei, mhathomhachü pete.

⁶ Siro harie, ae Dan yieu, Ahisamak nuou Oholiab rei puo sa kedaliete; mu mhachülie kevi pie mhachü kesiko pete tsüwate, uko bu a n ki diekhakeshü pete chülieketuo la:

⁷ Rüsuopfhekiu, dietseidiekhobouu mu süu gei keba ngukemezhie bau, mu pfhekiu nu mhanya pete,

⁸ mizhüu mu puo liko, tsiu mituba kemesau mu puo li pete, kethengu kethe ruosuobau,

⁹ siro kethe ruosuobau mu puo li peteko, tsiu seikhou mu puo kedoubau,

¹⁰ tsiu pfhemenei chü kemenuokecüko, Aron zievo-u la kemesa pfheneiko mu puo nuo thepfuko zievo kechü la uko pfheneiko,

¹¹ siro kenhekecü tier mu kemesa thechüu la mhare kethenguko. Ae n ki diekhakeshü pete tuoi ukoe chütuo.

Sabat-u

¹² Mu Jihovae Mosa ki:

¹³ Israelko ki pushülie, “Niekoe sabatko pie batuo, hau a mu nieko phou pete donu zasi puo zo, nie bu a Jihova nie chü kemesakeshü silieketuo la.

¹⁴ Nieko sabat pie batuo, kekreilamonyü süue nie la mesakecü la; kehoupuorei süu perhukecüu pesiawatuo, kehoupuorei sünhie mhachükecüu, puo themiako donunu puo kelhiwatuo.

¹⁵ Zha sorouko mhachütuo, derei zha thenie nhie we sabat rülei pecükecü zha, Jihova kitsa mesakecü zha; kehoupuorei sabat nhie mhachükecüu pesiawatuo.

¹⁶ Süla Israelko sabat pie batuo, kechachie dietseidiekho puo la thephou pete nu sabat zetuo.

¹⁷ Süue Jihova zha sorou donu tei mu kijü chülie di zha thenie nhie puo rüleilie di puo keleilie ücü zasi puo, a mu Israelko donu kechachie tuoketuo zasi puo zo.”

Dietseidiekho Tsiekranie

¹⁸ Siro puoe Sinai kijüthou geinu puo ze kerüchü tseiwa tse dietseidiekho tsiekranie pie Mosa tsüshü, Ukepenuopfü dziekinuo se thukecü tsiekranie.