Toukepra 30 - Angami Naga CL (Re-edited) Bible (BSI)

Kethengu Ruosuobau

¹ Noe kethengu theketuo la ruosuoba puo chütuo; no akasia sei pie süu chütuo.

² Puocha thu puo, puozha thu puo tuo, süu tsei dia batuo, mu puo rükrie thu kenietuo; puo kiako puo sa puo chütuo,

³ siro no suna ketho pie süu mho datuo, puo mho mu puo tsei lutsahatsa rei mu puo kiako rei; mu no süu la suna pie puo toucha chü puo whituo.

⁴ Siro no süu la suna pie puo rohou kenie chütuo, süko chüpie puo toucha khro lutsahatsa shütuo, mu süko bu ruosuobau pieketuo la puo khei chütuo.

⁵ No akasia sei pie seizo chütuo, di suna pie sünu datuo.

⁶ Mu no süu pie dietseidiekho-u mhogei keba ngukemezhie bau mhodzünu dietseidiekhobouu mhodzü keyapfheu khieki khapie batuo; a sünu n ze kesetuo.

⁷ Aron-e sü geinu kethengu puore kevi thetuo; puo teisoduü mibouko ketsocü ki süu thetuo,

⁸ Aron-e thevatie mibouko pie puo bako nu shü kevo ki, süu thetuo, nieko phou pete la Jihova mhodzünu süu chü seituo.

⁹ Noe süu gei kethengu mesa kemo puorei the lho, morei kethe ruosuo, morei lhacülhale ruosuo puorei khashü lho; no khubezu puorei lapie sügei shü lho.

¹⁰ Aron-e cie puo nu va puo süu kiako geinu rhakelie ruosuo chütuo, puoe cie puo nu kephouma ruosuou zie se rhakelie ruosuo chütuo, mu nieko phou pete nu süu chütuo; hau Jihova la kemesatho-u zo.

Rhakelie Mau

¹¹ Jihovae Mosa ki:

¹² No Israelko phrükecü ki, kehoupuorei no u phrülieta ro puo thuo puo la puo rhakelie ma pie Jihova tsütuo, no uko kephrü ki uko donu thepetheruo ba molieketuo la.

¹³ Nuolhoutsüphrüu phrülieketamia kehoupuorei hau chü morosuo: Kemesachü nu seyakecü shekel-u, (shekel puoe gera mepfü ba) shekel süu tiepuo pie Jihova ki khashü morosuo.

¹⁴ Kehoupuorei tsüphrü kephrü nu phrülieketamia, u kelhouzha cie mepfü mu sümhoko, Jihova ketsüu khashü morosuo.

¹⁵ Nie thuo nie la rhakelie ruosuo pie Jihova tsükeshü ki, shekel tiepuou sie, kenyiu rei kha krashülie lho, mu kejüu rei kha tsashülie lho.

¹⁶ Mu no Israelmiako kinu rhaketuo ruosuo la khakeshü rakako pielietuo, sidi süko pie rüsuopfhekiu meza la khapie batuo; Jihova mhodzünu Israelmiako kerükrau vorlie di nie thuo nie rhalieketuo la.

Mese Dzieteikhouu

¹⁷ Jihovae Mosa ki:

¹⁸ No mha kekhrü la mesekhou puo chülie, puo kedouba rei mese pie chülie, mha khrüketuo la mu no süu pie rüsuopfhekiu tsiu ruosuobau unie donu batuo, sidi dzü pie sünu shülietuo,

¹⁹ sidi Aron mu puo nuonuoko bu uko phi u dzie khrütuo.

²⁰ Ukoe rüsuopfhekiu nu kevo ki, morei lietho chütuo üdi kevor ki, mi pie mha the di ruosuo chüpie Jihova ki shütuo üdi ruosuobau penuo kevor ki dzü pie uko khrütuo, uko bu siata molieketuo la.

²¹ Ukoe uko phi mu uko dzie khrütuo, uko bu siatalie kelho la, siro hau uko la thezho puo chü seitatuo, puo la mu puo nuosenuoyieko la idi thephou pete la.

Kenhekecü la Kemesa Tier

²² Sizomonyü Jihovae Mosa ki:

²³ Mha kethenguthoko selie; mür dzü shekel krie pengou, mu seicü puore kethengu süde tiepuo, süusü, shekel krie kenie di hiepengou, mu kie kethengu shekel krie kenie di hiepengou,

²⁴ tsiu kasia shekel krie pengou, kemesachüu nu seyakecü shekel-u se di, siro oliv tier hin puo salie;

²⁵ mu no hako kereipie kethengu chüyakecümia mhatho tuoi, kenhekecü kemesa tier chülietuo; süu bu kenhekecü kemesa tier puo chütuo.

²⁶ Siro no süu pie rüsuopfhekiu mu dietseidiekhobouu kenhetuo,

²⁷ siro mizhüu mu puo liko pete, mitubou bau mu puo liko, kethengu kethe ruosuobau,

²⁸ mu kethe ruosuo kechü ruosuobau mu seikhouu tsiu kedoubau kenhetuo;

²⁹ no süko chü kemesatuo, uko bu kemesatho chülieketuo la; mha vo uko kenyü khe mesatatuo.

³⁰ Siro no Aron mu puo nuonuoko kenhelietuo, di uko chü kemesatuo, uko bu zievo chü di a lie chüketuo la.

³¹ No Israelko ki, “Nieko phou pete nu hau pie mha kenhekecü a tier kemesau chütuo.

³² Hau pie mia gei rushülie lho, tsiu no hau kemhie di chükecü kekrei rei chülie lho; süu mesa, mu n la mha kemesa puotuo.

³³ Kehoupuorei sütuoikecü chü morei süu pie kekreimia gei keshümia puo themiako kinu puo dathewatuo.”

³⁴ Siro Jihovae Mosa ki: Kethenguko, stacte, onika mu galbanum, kethengu vieko mu cietha dzü kemesa sa (mhaca puotse ketou di selie),

³⁵ sidi kereipie kethengu chüyakecümia mhatho tuoi kethengupfü chülie, di metsie pie valie, mu süu bu mesa tseilie,

³⁶ siro no süu huoyo kepfhüshülie mu huoyo pie rüsuopfhekiu nu dietseidiekhobouu mhodzünu, a n ze keseketuou nu shülie, süu n la kemesatho chütuo.

³⁷ Siro no kethengu kereipie chükecüu kemhie di, n thuo n la chülie lho; süu n la Jihova mhodzünu mesatuo.

³⁸ Kehoupuorei kethengu se tuo üdi sümhie chükecümia puo themiako kinu kelhiwatuo.