Toukepra 29 - Angami Naga CL (Re-edited) Bible (BSI)

Aron mu Puo Nuonuoko Rühekelie

¹ No tsie hakemhie di uko chü kemesatuo, uko bu a zievo chüketuo la, thudonuo puo mu tekuochü rhu mo zokecü kenie selie,

² siro khreiüshükemo niekhrüda tier pie nekecü, mu khreiüshükemo niekhrüda rüpfükecü tier salie. Thou memhiekecü pie hako chülie.

³ Siro no süko pie merha puo nu shülie di merha nunu süko pie vorlie, thudo-u mu tekuochü kenie se vorlie.

⁴ No Aron mu puo nuonuoko ze rüsuopfheki kikha nu vorlie, sidi dzü pie uko khrüwalie.

⁵ No pfheneiko selie di boulieu mu zievoboulie kerütshuu siro zievoboulieu, puo merükewheu pie Aron gei shülie, di zievoboulie chiepha do menuokecüu pie puo chie phashülie;

⁶ mu no tsüzeu pie puo tsü gei shülie, sidi kemesa keditsüreu pie tsüzeu gei shülie.

⁷ No kenhekecü tier-u selie, di rupie puo tsügei shü di puo kenhelie.

⁸ Süsie no puo nuonuoko ze vorlie, di boulie pie uko gei shülie,

⁹ siro chiepha pie uko chie phashülie, di tsüze pie uko zeshülie, mu uko bu zievo kechü hau pie kechachie zho puo chütatuo. Hakemhie di no Aron mu puo nuonuoko rühe khashü uko tsütuo.

¹⁰ Süsie no thudo-u ze rüsuopfhekiu mhodzünu vortuo. Aron mu puo nuonuokoe u dzie pie thudo-u tsü gei shütuo,

¹¹ siro no Jihova mhodzünu thudo-u dukhrituo, rüsuopfhekiu kikha kinu,

¹² sidi n dziekinuo se thudo-u zie huo pie ruosuoba kiako gei vashütuo, mu thezie keshako lapie ruosuobau phi nu shüwatuo.

¹³ Siro no puorieko gei ketuo puoshuo pete, puo se gei rhüpfüketuou, mu puo mecünie shuo sa selietuo, sidi ruosuobau geinu süko thewatuo.

¹⁴ Derei thudo-u chü, süu zhü, mu süu buo, noe razhüchü khieümhou nu mi pie thewatuo; hau we kephouma ruosuo zokecü la.

¹⁵ Süsie no tekuochünie puo selietuo, mu Aron siro puo nuonuokoe u dzie pie tekuochüu tsü gei shütuo.

¹⁶ Sidi no tekuochüu dukhrilietuo, di puo zie kelhoupie ruosuobau khieümhou vatuo.

¹⁷ Süsie no tekuochüu khrie petselietuo, di puo rieko mu puo phiko khrüwatuo di süko pie puo khrieko tsiu puo tsü ze kesawatuo.

¹⁸ Sidi tekuochüu pete ruosuobau geinu thetuo, hau Jihova ki keshü kethe ruosuo puo; hau puore kevi puo, mu mi nu pie Jihova ketsü ruosuo puo zo.

¹⁹ No tekuochü kekreiu selietuo; tsiu Aron mu puo nuonuoko u dzie pie tekuochüu tsü gei shütuo,

²⁰ mu no tekuochüu dukhrilietuo, siro puo zie huo se Aron tsiu puo nuonuoko nyietshe thezatsa vashütuo di uko dzie thezatsa u dzie krüko vashütuo, mu uko phi uko zatsa phikrüko vatuo; sidi thezie keshako kegepie ruosuobau gei lutsahatsa vatuo.

²¹ Süsie no ruosuobau gei keba thezie huo mu kenhekecü tier-u selie di kegepie Aron tsiu puo pfheneiko gei, puo nuonuoko pfheneiko gei shütuo, sidi puo mu puo pfheneiko, puo nuonuoko tsiu puo nuonuoko pfheneiko puo ze di mesatatuo.

²² No tekuochüu shuo, mu puo meiu shuo, puorierhuoko, puo se gei rhüpfüketuou tsiu puo mecünie shuo sa, mu puodo puo zatsa (süue tekuochü kedalieketa puocü la.)

²³ Siro Jihova mhodzünu khreiüshükemo niekhrüda pie merha nu keba nunu niekhrüda puo, tier sakecü niekhrüda puo, mu niekhrüda kerüpfü puo selietuo;

²⁴ sidi no hako pete pie Aron mu puo nuonuoko dzie nu shütuo, sidi Jihova mhodzünu kegekecü ruosuo puo la süko kegeshütuo.

²⁵ Süsie no süko uko dzie nunu pielietuo, mu no kethe ruosuou sa di süko ruosuoba geinu thewatuo, Jihova mhodzünu puore kevi puo chülietuo, mi nu pie Jihova ketsü kethe ruosuo puo zocü la.

²⁶ Siro no Aron keda pekreikeshü tekuochüu puo khouzü chü pielie di Jihova mhodzünu kegekecü ruosuo chü di kegeshütuo; mu süu n ya chütuo.

²⁷ Siro noe kelakreikelie tekuochüu kegekecü ruosuo nu kese puo khouzüu, mu kegekecü ruosuo nu kese puodo, Aron mu puo nuonuoko la zokecüu chü kemesalietuo.

²⁸ Hau Israelko bu pie Aron mu puo nuonuoko yachü seitatuo, kekreilamonyü hau we Israelko vitho ruosuo nunu khashüketuo zievoko yau zo; haue Jihova ki khakeshü uko ruosuo zo.

²⁹ Aron pfhenei kemesako, puo sie puo nuonuoko la zotuo, süko nunu tier pie uko kenhe mu uko keda pekreituo.

³⁰ Puo nuo puo sou nu zievo chüketuou bu zha thenie süko setuo, puo kemesa thechüu nu lietho chütuo üdi rüsuopfhekiu nu kevor ki.

³¹ Noe keda pekreikeshü nu tekuochüu selie, di puo chü se vo kemesa thechüu nunu chalietuo;

³² siro Aron mu puo nuonuoko rüsuopfhekiu kikha kinu tekuochüu chü mu merha nu keba niekhrüdau cütuo.

³³ Ukoe keda pekrei mu chü kemesapie rhakelie ruosuo nu sekecüko cütuo, derei kekreimia bu we süko cülie lho, sükoe mesakecü la.

³⁴ Mu mhachü kemesakecü la sekecü themuo morei niekhrüda huo peshapie ba khise tso ro, no mi pie pesha kebako thewatuo; süu cü lalie lho, süu mesakecü la.

³⁵ A n ki diekhakeshü mhiei di noe Aron mu puo nuonuoko gei chüshütuo; zha thenie no uko chü kemesatuo,

³⁶ siro teisonhie noe thudo puo pie rhalieketuo la kephouma ruosuo khashütuo. Süsie rei no ruosuobau chü kemesakecü ki, süu la kephouma ruosuo puo chütuo, di süu chü kemesaketuo la tier pie süu kenhetuo.

³⁷ Ruosuobau la noe zha thenie chü kemesakecü ruotho chütuo, di süu chü kemesawatuo, sitse ruosuobau mesathotatuo; mhakehoupuorei ruosuobau nyükecüu mesatatuo.

Teisonhie Ruosuo

³⁸ Siro noe ruosuoba gei hakemhie di khashütuo, teicie puo keta tekuonuo kenie khashü seituo.

³⁹ Tekuonuo puo noe khise khashütuo, mu tekuonuo kekreiu thevatietuo.

⁴⁰ No mu tekuonuo kerieu nu thou kevithopfü mha kemejü ker-zapuo mu tier thekelie hin dia-zapuo sa di khashütuo, mu khubezu hin dia-zapuo pie nanyü chü di rushütuo.

⁴¹ Siro no tekuonuo kekreiu mu khubezu rei sa khakeshü khise gei thou rei mu khubezu rei sa khakeshü mhiei di khashütuo, mi nunu mha pie Jihova ketsü puore kevi puo chülieketuo la.

⁴² Hau n nuosenuoyie pete bu rüsuopfhekiu kicieki nu Jihova mhodzü kethe ruosuo chü seiketuo puo chütuo, a sünu n ki die puketuo la n ze kesetuo.

⁴³ Sünunu Israelmiako ze kesetuo, mu a zapuzayieu thuo thechü süu bie kemesawatuo.

⁴⁴ Ae rüsuopfhekiu tsiu ruosuobau chü kemesashütuo; Aron mu puo nuonuoko rei a chü kemesashütuo, uko bu zievo chü di a lie chüketuo la.

⁴⁵ Mu a Israelko donu lhoutuo, mu ae uko Kepenuopfü chütuo,

⁴⁶ mu ukoe a Jihova uko Kepenuopfü, uko donu lhouketuo la a thuo Ijipt kijü nunu uko ze parkeshü silietuo; a sü Jihova uko Kepenuopfü zo.