Toukepra 26 - Angami Naga CL (Re-edited) Bible (BSI)

Rüsuopfhekiu

¹ Sizomonyü noe linen keyapfhe puolo kemegei pie dokecü ker pie rüsuopfhekiu chütuo mu puolo keloshü, krü mu merieyharakecü se satuo; siro cherubnie miarhi chü menuopie puo gei shütuo.

² Keyapfhe puo puocha thu mepfüethethatuo, mu puozha thu diatuo; keyapfhe pete kede phretuo.

³ Keyapfhe pengou zu kesatuo; mu kekrei pengouko rei zu kesatuo.

⁴ Siro noe keyapfhe zu kesakelieu mhogei kero keloshükecü pie rothou chülietuo; mu sükemhie di keyapfhe zu kesakecü kekreiu rei puokhietho-u mhogei rothou chülietuo.

⁵ Noe keyapfhe puo gei rothou hiepengou chütuo, mu kekrei keyapfhe khie gei rei rothou hie pengou chütuo, rothouko bu kemedetuo.

⁶ Mu noe suna pie pfhebe hiepengou chütuo, di pfhebeko pie keyapfhenie te kematuo, rüsuopfhekiu pete bu puo chülieketuo la.

⁷ Rüsuopfhekiu mho shüketuo la no temvümie pie keyapfhe chülie morosuo; no pfhelha kerepuokrü chülie.

⁸ Keyapfhe puo puocha thu sertuo, mu puozha thu diatuo; keyapfhe kerepuokrüko kede phretuo.

⁹ Noe keyapfhe pengou zu kesatuo tsiu keyapfhe sorou zu kesatuo mu noe pfhekiu dzütsatie keyapfhe sorouu pie kesetuo.

¹⁰ Siro noe la kerieu la keyapfhe puokhietho-u mhogei rothou hiepengou chülietuo, mu la kenie keyapfhe puokhietho-u mhogei rothou hiepengou chülietuo.

¹¹ Siro noe mese pie pfhebe hiepengou chülie, sidi pfhebeko pie rothouko nu shütuo, sidi pfhekiu pete shü kemapie puo chülietuo.

¹² Mu pfhekiu keyapfhe peshapie kebako, puo tietsa bu rüsuopfhekiu sietsa rütha tsu whetuo.

¹³ Mu pfhekiu keyapfheko puocha geinu thu puo hatsa, thu puo lutsa idi pesha kebako bu rüsuopfhekiu wheketuo la puo tsei hatsa rei lutsa rei rülotuo.

¹⁴ Siro no pfhekiu la tekuo zhürekewa mu temvü zhü pie puo mho kewhe puo chütuo.

¹⁵ Siro no rüsuopfhekiu la akasia sei pie puora kepedou kro puo chülie.

¹⁶ Puora puo kecha thu kertuo, mu puorau kezha thu puo di puotietuo.

¹⁷ Puora puo gei puo khei kenie batuo, kekhielieketuo la, rüsuopfhekiu chükeshü puora peteko la sükemhie chütuo.

¹⁸ Noe rüsuopfhekiu puorako chütuo: puokhrotsa la puora mepfütuo;

¹⁹ tsiu no rakachü pie puo phitou hiedia chüpie puora mepfüko khro shütuo, puo phitou kenie pie puora puo nu puo phinie la, mu puo phitou kenie pie puora kekrei puo khro puo phinie la batuo.

²⁰ Siro rüsuopfhekiu tsei kekreitsa la, pesotsa la puora mepfü batuo,

²¹ mu rakachü pie kechü puo phitou hiedia, puora puo khro nu puo phitou kenie, mu puora kekrei puo khro nu puo phitou kenienie ituo;

²² mu rüsuopfhekiu sietsa, niakratsa la no puora sorou chülie.

²³ Mu no rüsuopfhekiu kithotsa puoke nu la puora kenie chülie;

²⁴ sünie pekhrotsa ketsieyatuo, derei pesotsa kekhetuo, rohou kerieu nunu kekhetuo; kenienie rei sükemhietuo; unie pie puokenie chütuo.

²⁵ Siro puora thetha batuo, rakachü phitou sa di, puo phitou keresorou; puora puo khro puo phitou kenie mu puora kekreiu khro puo phitou kenietuo.

²⁶ Siro noe akasia pie seiphi kro puo chütuo, puora pengou ro rüsuopfheki tsatie puo la tsiu

²⁷ rüsuopfhekiu khie tietsatiepuo puorako la seiphi pengou, mu rüsuopfhekiu kitho niakratsa rako la seiphi pengou.

²⁸ Metsuo nu seiphiu, puorako puo la ketou nu keshüu puotie tietsapuo nu kekreitsa pra tsotuo.

²⁹ Noe puorako suna pie thetuo, mu puo seiphiko pie peliketuo la suna pie rohou chütuo sidi no suna pie seiphiko zetuo.

³⁰ Siro kijüthou geinu n pekiekeshü rhiu mhie tou di no rüsuopfhekiu chütuo.

³¹ Siro no puo lo keloshü, mu merieyharakecü tsiu linen puolo mese mu megeikecü pie keyapfhe puo chütuo; pa menuo se di cherubnie mirhi chüpie puo gei shütuo.

³² Siro noe keyapfhe pie akasia co dia gei lhatuo, coko suna pie zetuo mu puo cawiko suna pie chütuo, mu coko rakachü pie kechü phitou dia gei lhatuo.

³³ Siro noe mhakebeko geinu keyapfhe lhatuo, sidi dietseidiekhobouu pie keyapfhe kelhau puonutsa lerlietuo, mu n la keyapfhe-e thechü kemesau mu kemesatho-u unie kho kekreiwatuo.

³⁴ Noe ngukemezhie bau pie kemesatho chüu nu, dietseidiekhobouu keba mhabouu gei shütuo.

³⁵ Siro no mizhüu pie keyapfhe chazoutsa shütuo, siro mitubau pie rüsuopfhekiu pekhrotsa mizhüu rütsietsa batuo; mu no mizhüu pie pesotsa shütuo.

³⁶ Siro noe pfhekiu kikha la keloshü, teimeziekecü, merieyharakecü tsiu linen puolo mese mu megeikecü pie puo keya puo chütuo, siro sügei thepre pie puokhu katuo.

³⁷ Siro no puo keyau la akasia co pengou chülie di suna pie süko zetuo; uko cawiko suna pie chütuo, mu no süko la mese pie puo phitou pengou chütuo.