Toukepra 25 - Angami Naga CL (Re-edited) Bible (BSI)

Kemesa Chüu la Mha Khakeshü

¹ Jihovae Mosa ki,

² Israelko ki pushücie, uko bu a la mha khashünu di; themia kehoupuorei puo nou nu chü nyü di khakeshü sephra pielie.

³ Mu no uko kinu mha khakeshü hako pielie: Suna, rakachü, mu mese,

⁴ kelo keloshü, teimeziekecü, mu merieyharakecü, mu linen lo mese mu megeikecü, temvümie,

⁵ tekuochü zhürekewa, chüzhü kevi, akasia sei,

⁶ mibouko la tier, u kenhekecü tier nyako mu kethengu nyako,

⁷ onix tsie, mu zievoboulie gei mu uko merükeyau gei kuketuo tsieko.

⁸ Siro uko bu a la kemesachü puo chüshülie, a bu uko donu balieketuo la.

⁹ A puorhi thapie n kiekeshü tuoi rüsuopfhekiu rei, mu puo nya puorako rei chü phreliecie.

Dietseidiekhobouu

¹⁰ Uko bu akasia sei pie dietseidiekhobou chülie, puocha thu kenie di puotie, puozha thu puo di puotie mu puo rükrie thu puo di puotie.

¹¹ Siro no suna ketho pie puo nukou rei puo mho rei dalie, mu suna pie puo toucha puo chü puo houlie.

¹² Siro no suna pie rohou dia chülie di pie puo phi diako nu shülie, kenie tietsapuo mu kenie pie kekreitsa shülie.

¹³ Noe akasia sei pie seizo chülie di suna pie sünie dalie.

¹⁴ Sidi uko bu dietseidiekhobouu pieketuo la seizonie pie dietseidiekhobouu khie rohouko nu pelielie.

¹⁵ Seizonie pie dietseidiekhobouu rohouko nu pie ba zolie; sünunu thapie parwa hie.

¹⁶ Noe a khapie n tsüketuou pie dietseidiekhobouu nu batuo.

¹⁷ Siro no suna ketho pie ngukemezhie ba puo chütuo; puocha thukenie di puotie mu puozha thu puo di puotie.

¹⁸ No suna ketoupie cherub kenie chülie, sidi khapie ngukemezhie bau gei puotsei lutsahatsa shülie.

¹⁹ Cherub puo chüpie puotsei puo tsa mu cherub puo pie kekreitsa shü di cherubnie bu ngukemezhie bau ze kematuo.

²⁰ Cherubnie bu unie shü kelhapie ngukemezhie bau whetuo; cherubnie zie bu kepetsou di ngukemezhie bau mehotuo.

²¹ No ngukemezhie bau pie dietseidiekhobouu mhogei shütuo; mu dietseidiekhobouu nu ae se n tsüshüketuo dietseidiekho-u khapie batuo.

²² Sünunu a n ze kesetuo, süu ngukemezhie bau mhogei; dietseidiekho-u keba dietseidiekhobouu gei ketha cherubnie donunu ae Israelmiako la diekhashüketuo pete pie n ki pushütuo.

Niekhrüda la Mizhüu

²³ Noe akasia sei pie mizhü puo chülie; puocha thu kenie, puozha thu puo, mu puo rükrie thu puo di puotie.

²⁴ No suna ketho pie süu dalie, mu suna pie puo toucha puo chü puo whilie.

²⁵ Mu no puokhie keyau dziezhü de zhakecü puo chüpie whikecü ki suna pie puo toucha puo chüpie süu whilie.

²⁶ Siro no süu la suna rohou dia chülie, di rohouko pie puo phi diako gei puoke diako nu khelie.

²⁷ Rohouko bu puokhie keyau khieki batuo, seizonie pie süko nu shülie di mizhüu pielieketuo la.

²⁸ No akasia sei pie seizonie chülie di suna pie unie da phrelie, sidi hanie pie mizhüu pietuo.

²⁹ No süu la puo khouko tsiu kethengu kethekhouko, süu süko mu kekrie rüsuo rushüketuo tehieko la chülie, süko suna ketho pie chülie.

³⁰ Sidi noe mizhüu gei baya zokecü kepekieniekhrüdau pie a mhodzünu ba seituo.

Suna Mitubau

³¹ Siro no suna ketho pie mituba puo chülie. Süu ketoupie mitubau phi tsiu puo cau chülie, puo hieko, puo tsüko, mu puo pouko puo ze kesa chü puotuo.

³² Siro süu tsei nunu puoco sorou partuo, mitubou co se bu puotie puo nu pratuo, mu mituba co se bu puotie kekreitsa pratuo;

³³ puoco puo gei tehie se chüpie almond pou tuoituo, puo thetse gei puotshü mu puopou batuo; mu puoco kekreiu gei tehie se chüpie almond si tuoikecü puo thetse gei puotshü mu puopou babatuo; mitubau geinu puoco sorou prakecü pete gei sükemhie batuo.

³⁴ Siro mitubau gei zokecü tehie dia chüpie almond pou tuoikecü, uko tshü mu puo pou sa di.

³⁵ Siro mitubau puoco sorouko donu kenie kekhekhekecü khro nu puo tshü puo zokecü puo sa batuo.

³⁶ Uko tshüko nu uko coko süu ze chü puo chütuo, pete suna ketho pie chütuo süu ketou di chütuo.

³⁷ Siro no süu la mitubou thenie chütuo; mu mitubouko bu puo mhodzütsa va pezielieketuo le di khapie ba morosuo.

³⁸ Mitu kepemhe nyako mu puo khouko suna ketho pie chütuo.

³⁹ Süu mu suna khouko suna ketho talent puo se chütuo.

⁴⁰ Mu no kijüthou geinu n pekieshükecü rhi kemhiei di süko chülie morosuo.