Toukepra 24 - Angami Naga CL (Re-edited) Bible (BSI)

Dietseidiekho-u Chü Kemeteikelie

¹ Mu puoe Mosa ki, “Jihova ki kholie, no mu Aron, Nadab mu Abihu, siro Israel phichüko mia hiethenie, sidi pecie nunu rüsuocie.

² Mosa rübei Jihova penuo phirlie, derei uko bu we penuo vor hie, mu themiako bu puo ze khor hie.”

³ Mosa vor di themiako ki Jihova dieko mu thezhoko chükeshü pete pushü; mu themiakoe pfhe puo chü di sie, “Jihova pukeshü dieko pete hie chülietuo.”

⁴ Siro Mosae Jihova pukeshü dieko thulie. Mu puo khiserüna sielie di kijüthou phi nunu ruosuoba puo chülie mu co kerekenieu selie, Israel seyie kerekenie tse.

⁵ Siro puoe Israelmiako donu khriesamia kerekenie ketseshü di uko bu kethe ruosuo khashü mu thudo vitho ruosuo chüpie Jihova ki shü.

⁶ Siro Mosae chüzieu tietsa pie seikhouko nu shülie, mu chüzieu tietsa kegepie ruosuobau vashü.

⁷ Süsie puoe dietseidiekho leshüdau chü pielie di themiako kesi kinu phrüshü; mu uko sie, “Jihova pukeshü pete hie chülietuo, tsiu hie dieze chütuo.”

⁸ Sitse Mosa thezieu pielie di süu kegepie themiako gei shüshü, di sie, “Harie Jihovae die hako pete medzi di nie ze dietseidiekho chükelie zieuwe.”

⁹ Süsie Mosa mu Aron, Nadab mu Abihu, tsiu Israel phichüko mia hiethenie keze kho,

¹⁰ tsiu ukoe Israel Kepenuopfü ngu; mu puo phinie khro safir tsie pie khrakecü mhiei; teigei kemesa mhie zo.

¹¹ Mu puoe puo dzie pie Israelko donu pehüko gei shü mo; uko rei Ukepenuopfü ngu, sidi mhacümhakrie.

Mosa Sinai Kijüthou gei Kekho

¹² Jihovae Mosa ki, “Kijüthou gei a ki khorlie, di sünu pfhe balie, siro ae thezho mu diekhakeshüko uko kepetha la a thuo thukelie, ketsie tsiekranie pie n tsüshütuo.”

¹³ Süla Mosae puo kekhruohiu Joshua ze sa di Ukepenuopfü kijüthouu gei kho.

¹⁴ Mu puoe phichüko ki, “Hanunu hienie pfhe balie, hienie nieko ki la vor kemochie; Aron mu Hur nieko ze batuo; kehoupuorei dienya huo nyita ro, se unie ki volie.”

¹⁵ Süsie Mosae kijüthou gei khota, mu kimhoushü vor kijüthouu zepfülie.

¹⁶ Jihova zapuzayieu Sinai kijüthou gei ba di, kimhouu nunu zha sorou süu zepfü bata; mu zha thenie nhie puoe kimhouu donunu Mosa kie.

¹⁷ Israelko mhinguki we Jihova zapuzayieu sü kijüthou tsüle gei mha the pejüwalie kevi mi puo keba tuoi zo.

¹⁸ Mosae kimhou nu le di kijüthou gei kho. Mosae teisozha hiedia mu teizeizha hiedia kijüthou gei bata.