Toukepra 23 - Angami Naga CL (Re-edited) Bible (BSI)

Pete la Kemezhü Zho

¹ Noe ketho kemo dieyie pu keza lho. Noe kerüzhümia puo ze kedzieselie di, kelhiecü zhapu chü lho.

² Noe mha kesuo chütuo üdi themia krodi siemedzi lho; morei dienya nu kekrükecü krodiu medzi di kemezhüu bie kediwatuoü zhapu chü lho;

³ morei dienya nu kejümia yapie pekrei lho.

⁴ Noe n ngumvüu thudo morei gada yotazhü di ngulie ro, no süu ze la vor puo tsütuo.

⁵ Noe n ngumvüyakecümia puo gada puo pie bu puo krapfü zhü di ngulie ro, no puo bu sizhü di kha zowa lho, no puo khruohi di puo phoushü morosuo.

⁶ Noe kejüu dienya nu puo mezhüu bie kerüpfhiwa lho.

⁷ Ketijü ze kepecie tuolie, siro kejo kejüu mu kemezhüu dukhri lho, ae kerüzhüu khawalie lhocü la.

⁸ Mu noe theso lielie lho, thesoe mhakesimia mhi bie peciewaya mu kemezhü nu ketuoko nyie bie kecürüwayakecü la.

⁹ N donu lhou keba solhimia pese lho, nie solhimia nou sü si eru, nie rei Ijipt kijü nu solhimia chükecü la.

Sabat Teicieu mu Sabat

¹⁰ Teicie sorouko noe n lie nu tsiavatuo mu puo chiebie se vor kengutuo;

¹¹ derei cie thenieu ro no süu bu rüleituo mu puo bu kro zhütuo, nie themia kejüko bu u va ngulieketuo la; mu ukoe vakewako nha nu khunuoko bu rei cütuo. N khubelie mu n oliv zieu rei pie no sükemhie chütuo.

¹² Zha sorou n mhatho chütuo, derei zha thenie nhie no rüleituo; n thudo mu n gada bu rüleilieketuo la; siro n diepfü nuou, mu solhiu bu rei u keleilieketuo la.

¹³ A n ki pukeshü pete le menuolie, sidi terhuo kekrei za puorei se cha hie, morei sikecü nie tie nunu pu par rei hie.

Thenyi Kezha Seko

¹⁴ Niekoe teicie puo nu va se a za nu thenyi nyipie a tsütuo.

¹⁵ Nie khreiüshükemo niekhrüdanyiu nyituo; a nie ki diekhakeshü tuoi, noe Abib-u khrü puotei chiekeshü meseki zha thenie la khreiüshükemo niekhrüda cütuo, nie süu khrü Ijipt nunu parkelie la. Miapuorei dziethuo di a mhodzüki vorlie lho.

¹⁶ Nie nie lie nu ciekeshü, n mhatho si chieshü kerieko, lieyienyiu nyituo. Nie teicie thela ki lieyienyiu nyituo, no n lie nunu n mhatho siu pfhü kengukelie ki.

¹⁷ Cie puo nu va se nie thepfumiako Niepuu Jihova mhodzünu vor pengutuo.

¹⁸ Nie khreiükeshü niekhrüda se a ruotho zie salie lho, morei a nyiu nu chüshuo bu ba khise tsolie lho.

¹⁹ Nie lie nu kepar chieshü keriethoko se Jihova nie Kepenuopfü ki nu vortuo. No temvü nuonuo pie puo krü nudzü nunu chalie lho.

Teigeidielieu Ketsepie Israelko Cha Thaketuo

²⁰ Harie, a teigeidieliemia puo ketsepie nie mhodzünu shüzhie, nie cha nu nie pfhe ze vo nie la thechü kesepie kebau nu shülieketuo la.

²¹ Puo sanyü di puo pfhe rünyülie, puo petsouta hie, nie vajokewa puoe vashü nie tsülie lhokecü la; a zae puo gei tuotacü la.

²² Derei nie menuo di a pfhe rünyülie di a kepu pete chülie ro, süsie ae n ngumvüko ngumvütuo mu n keperhieko perhietuo.

²³ A dielieu nie mhodzü rie di, n ze Amorko, Hitko, Perizko mu Kananko, Hivko, mu Jebusko ki voshü tse, a uko bie pejüwatuo,

²⁴ nie-e uko rhuoko mhodzünu nuketsulie lho, morei uko rüsuolie lho, morei uko mhathoko tuoicü chülie lho, derei niekoe uko penyü tseiwatuo mu uko coko bietshebietshawatuo.

²⁵ Nie Jihova nie Kepenuopfü rüsuotuo, mu ae nie niekhrüda mu nie dzü mhogei jashütuo; mu ae nie donu kechükenyü chü kelhiwatuo.

²⁶ Nie kijü nu miapuorei puo nuo krüta morei nuojü chülie lho; ae nie teisozhako chü pevi tseishütuo.

²⁷ Ae kemichie ketsepie nie mhodzünu shütuo di nie-e vo ze kesekelie pete, nie petsou kevor pete bie kebvüwatuo, mu ae n ngumvümia pete bu rünoupie n tsütuo.

²⁸ Mu ae pfhidi ketsepie nie mhodzü shütuo, sidi süko bu nie mhodzünu Hivko, Kananko, mu Hitko whuowatuo.

²⁹ Ae cie puo nu nieko mhodzü uko whuowalie lho, siüro kijüu bu mekriemeza mota mu nhachü kra par di n petsouta molie kevi la.

³⁰ Rülili di ae nie mhodzü nunu uko whuotuo, nie kra sier kijüu pe balie kemochie.

³¹ Mu ae Kemerie Dzükezha nunu Filistinko dzükezha ketso, mu rayha nunu vo Eufrat ketso pie n kijü rie chütuo; ae rünau nu kelhouko khapie n dzie nu shüwatuo, mu nie mhodzü nunu uko whuowatuo.

³² Nie uko morei uko rhuoko ze dietseidiekho puorei chülie lho.

³³ Uko bu nie kijü nu balie lho, ukoe nie chüpie nie bu a gei kephouma chüta rei silie lhomu; nie uko rhuoko lie chüta ro, süusü nie malieketuo ciephrie puota zotuo.